ಸಂಪಾದಕೀಯ್:
ಸತಾಚೆಂ ಮೋಲ್ ಉಕ್ಲುನ್ ಧರ್‍ಚಿ ಧೈರಾದಿಕ್ ಕವಿತಾ
ಸತಾಭಿತರ್ ಫಟಿಚಿ ವೋಪ್ ನಾಂತರ್ ತ್ಯಾ ಸತಾಕ್ ಸತ್ ಮ್ಹಣೊನ್ ಮಾಂದುನ್ ಘೆಂವ್ಚೇಂಯ್ ಆಯ್ಚ್ಯಾ ದಿಸಾ ಕಷ್ಟಾಂಚೆಂ ಜಾಲಾಂ. ಆಯ್ಲೆವಾರ್ ಹಾಂವೆಂ ಏಕ್ ವರ್ದಿ ವಾಚ್ಲಿ. ವಾಚುನ್ ಹಾಂವ್ ಥಟಾಕ್ಕ್! ಕೊಣ್ ದಾದ್ಲೆ ಆಪ್ಲೆ ಬಾಯ್ಲೆಕಡೆ ಸತ್ ಉಲಯ್ತಾತ್, ತಾಂಚೆ ಮಧೆಂ ವೆಗ್ಳಾಚಾರ್ ಚಡ್ಲ್ಯಾತ್ ಖಂಯ್. ಫಟಿ ಮಾರ್‌ಲ್ಲ್ಯಾಂಚಿ ಲಗ್ನಾಂ ಸತ್ ಸಾಂಗ್‌ಲ್ಲ್ಯಾಂಚ್ಯಾಕ್‌ಯ್ ಚಡ್ ಕಾಳ್ ಬಾಳ್ವತಾತ್ ಮ್ಹಣ್ತಾನಾ ಸತಾಕ್ ಆಜ್ ಮೋಲ್ ನಾ ಮ್ಹಣ್ ಜಾಲೆಂ. ಮಾಗೀರ್ ಕೆದಳಾ ಸತಾಕ್ ಮೋಲ್ ಆಸ್‌ಲ್ಲೆಂ?
ಟೈಟಸ್ ನೊರೊನ್ಹಾ, ತಾಕೊಡೆ ತಾಚ್ಯಾ ಖಡಕ್ಕ್ ಉತ್ರಾಂಚ್ಯಾ ಕವಿತಾಂ ಖಾತೀರ್ ಫಾಮಾದ್. ಸತ್ ಉಲಂವ್ಚ್ಯಾಖಾತೀರ್ ಆನಿ ತೆಂ ಆಯ್ಕತಲ್ಯಾಂನಿ ಮಾಂದುನ್ ಘೆಂವ್ಚ್ಯಾಖಾತೀರ್ ಗರ್ಜ್ ಆಸ್ಚಿ ಸಗ್ಳಿ ಜಾಗ್ರುತ್ಕಾಯ್ ತಾಣೆ ಹೆ ಕವಿತೆಂತ್ ಘೆತ್‌ಲ್ಲಿ ಝಳ್ಕತಾ. ಸತ್ ಸಾಂಗ್ಚ್ಯಾಂಚೆ ಕಷ್ಟ್ ಪಳೆಯಾ! ದಾರಾಭಿತರ್ ಭಾಣ್ಶಿರ್‍ಯಾಂತ್ ತೊಂಡ್ ಧಾಂಪುನ್ ಬಸ್‌ಲ್ಲ್ಯಾ ಸತಾಕ್ ಉಗ್ತಾಡಾಕ್ ಹಾಡ್ಚೆಂ ವಿಶೇಸ್ ಧೈರ್ ಹಾಂಗಾಸರ್ ವೆಕ್ತ್ ಜಾಲಾಂ.
ಟೈಟಸ್ ನೊರೊನ್ಹಾ ಕೊಂಕಣಿ ಕವಿತಾಶೆತಾಚ್ಯಾ ನವೆ ದಿಶೆಕ್ ವಾವುರ್‌ಲ್ಲ್ಯಾಂ ಪಯ್ಕಿ ಎಕ್ಲೊ ಆನಿ ಮುಕ್ಲೊ. ಹುಮೆದಿಂಕ್ ತೊ ಸೊಧುನ್ ವಚನಾ. ಸ್ವ-ಹುಮೆದಿಚ್ಯೊ ಝರಿ ತಾಚೆಲಾಗಿಂ ವ್ಹಾಳೊನ್ ಆಸಾತ್. ತೆ ಹುಮೆದಿನ್, ಆಪ್ಲ್ಯಾ ವೆವ್ಹಾರಾ ಮಧೇಂಯ್ ಭೆಟ್ವೊಳ್ ಕರುನ್ ಕವಿತಾ ಬರಯ್ತಾನಾ ಖಿಣಾನ್ ಸರ್ವಾಂಚ್ಯಾ ಮೊಗಾಂತ್ ಬುಡೊನ್ ವೆತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಮಿ ಸತ್ ಉಲಯ್ತಾಂವ್
ಹ್ಯಾ ಗಾಂವಾಂತ್
ಹ್ಯಾ ಸುತ್ತುರಾಂತ್
ಹ್ಯಾ ಭೊಂವಾರಾಂತ್
ಲೋಕ್ ಸಗ್ಳೊ ಸತ್‌ಚ್ ಉಲಯ್ತಾ
ಹ್ಯಾ ಗಾಂವಾಂತ್ ಆಮಿ ನಾಕ್‌ಭರ್ ಪಿಯೆತಾಂವ್
ಪುಣ್ ಲಿಮಿಟ್ ಚುಕನಾಂವ್
ಹ್ಯಾ ಗಾಂವ್ಚ್ಯಾ ಪಾದ್ರಿಂಕ್ ಬಾರಾ ಬಾಯ್ಲೊ
ಆಮಿ ಶೀದಾ ಉಲಂವ್ಚೆಂ, ಆಮ್ಕಾಂ ಎಕೇಕ್ ಮಾತ್ರ್
ಆಮಿ ಸಗ್ಳೆ ಸತ್‌ಚ್ ಉಲಯ್ತಾಂವ್
ಸಾವೆರಾಚಿ ಭಯ್ಣ್ ನಾಯ್ತ್ಯಾಂ ಪಾಟ್ಲ್ಯಾನ್ ಗೆಲಾಂ
ಕಿತ್ಯಾಕ್ ಮ್ಹಳ್ಯಾರ್ ಆವಯ್ಚಿ ಚಾಲ್ ವಾಂಕ್ಡಿ
ಮ್ಹಜ್ಯಾ ಘರ್‍ಚಿಂ ಧರ್‍ಣಿ ವಯ್ಲಿ ದೀಷ್ಟ್ ಕಾಡಿನಾಂತ್
ಮಾನ್ಸುಗಿ-ಮಾನ್ ಕ್ರೇಚಿಟ್ ಕೆಲ್ಯಾ
ಆಮಿ ಸಗ್ಳೆ ಸತ್‌ಚ್ ಉಲಯ್ತಾಂವ್
ಹ್ಯಾ ಗಾಂವ್ಚೆ ರಾಜ್‌ಕಾರ್ಭಾರಿ ಲೊಂಚಾನ್ ನ್ಹಾತಾತ್
ಕಾಮಾಂ ಕರಯ್ತಲೆ ದುಡ್ವಾನ್ ತಾಂಕಾಂ ಪುರ್‍ತಾತ್
ಆಮಿ ಲೊಂಚಾಕ್ ಬದ್ದ್ ವಿರೋಧ್
ಆಮ್ಚೆಂ ಜಾಂವ್ಚೆಂ ಕಾಮ್ ಜಾಲ್ಲೆಂಚ್
ಆಮಿ ಸಗ್ಳೆ ಸತ್‌ಚ್ ಉಲಯ್ತಾಂವ್
ಶೆಜಾರ್‍ಚ್ಯಾ ವಾಡ್ಯಾಚಿಂ ಬಾಯ್ಲಾಂ ಲಾಂಬ್ ಜಿಬೆಚಿಂ
ವಸ್ತುರಾಚ್ಯಾ ಫಾತ್ರಾಕ್ ಘಾಸ್ಲ್ಯಾರೀ ಖೊರೊಜ್ ರಾವನಾ
ಆಮಿ ಆಸ್‌ಲ್ಲೆಂ ಆಸ್‌ಲ್ಲೆಬರಿ ಉಲಂವ್ಚೆಂ
ಸಾಂಗ್ಚೆಂ ಸಗ್ಳೆಂ ತೊಂಡಾರ್‌ಚ್ ಸಾಂಗ್ಚೆಂ
ಆಮಿ ಬಿಲ್ಕುಲ್ ಸತ್ ಉಲಯ್ತಾಂವ್
ಆಮ್ಚೊ ವಯ್ವಾಟ್ ಎಕ್ದಮ್ ಶೀದಾ
ಪಾಟ್ಲ್ಯಾನ್ ಏಕ್ ಮುಕ್ಲ್ಯಾನ್ ಏಕ್ ಆಮ್ಚ್ಯಾ ಸುತ್ತುರಾಂತ್ ನಾ
ಆನಿತಿಚಿ ದೆಡ್ಕಿ ಏಕ್ ಪರ್‍ಯಾಂತ್ ಆಪ್ಡುಂಕ್ ನಾ
ಸರ್ಕಾರಾಚೆಂ ಕಿತೆಂಚ್ ಬಾಕಿ ಕೆಲ್ಲೆಂನಾ
ಆಮಿ ಶೆಂಭರಾಂತ್ ಶೆಂಭರ್ ಸತ್ ಉಲಯ್ತಾಂವ್
ತೆ ರಗತ್ ದಾನ್ ದಿತಾತ್
ವಿಶೆಂತ್ ಪಾವ್ಲಾಚೆ ಸಭೆಂತ್ ತಾಂದುಳ್ ವಾಂಟ್ತಾತ್
ಭೆಷ್ಟೊ ಡ್ರಾಮಾ, ದೊಳ್ಯಾಂಕ್ ಮಾತಿ ಘಾಲ್ತಾತ್
ಸಗ್ಳೇಂಯ್ ಕರ್‍ಚೆಂ ನಾಂವಾ ಪಾಟ್ಲ್ಯಾನ್
ಆಮಿ ಪುರಾಯ್ ಸತ್‌ಚ್ ಉಲಯ್ತಾಂವ್
ಆಮ್ಚೆ ಭಿತರ್‍ಲೆ ದಾದ್ಲೆ ಪೂರಾ, ಸಗ್ಳೆ ಸತ್ತಿ
cheat, hurt ಕರ್‍ನಾಂತ್
ಮೋಸ್ ಕರ್‍ತಾತ್, ಸಾಂಗೊನ್ ದುಖಯ್ನಾಂತ್
ಆಮ್ಚಿಂ ಬಾಯ್ಲಾಂ ಭೋವ್ ನಾಜೂಕ್
cheat ಕರ್‍ತಾತ್
ಭಾರಿ ಹುಶ್ಯಾರ್, cheat ಕರ್‍ತಾಂ ಕರ್‍ತಾಂ
ಆಪ್ಲ್ಯಾ ಘೊವಾಕ್ ನಿದ್ಚ್ಯಾ ಕುಡಾಚೊಚ್ ರಾಕ್ವಲಿ ಕರ್‍ತಾತ್
ದೆಕುನ್ ಆಮ್ಚ್ಯೊ ಫಟಿ ಸತಾಕ್ ಲಜೆಕ್ ಘಾಲ್ತಾತ್
ಫಟಿಂಕ್ ಹಜಾರ್ ತೊಂಡಾಂ
ಸತಾಕ್ ಏಕ್ ವಾ ತೊಂಡ್‌ಚ್ ನಾ?
ಸತ್ ಲಜೆನ್ ದೊಡುನ್ ಗೆಲಾಂ
ದಾರಾ ಪಾಟ್ಲ್ಯಾನ್ ಲಿಪೊನ್ ರಾವ್ಲಾಂ
ಭಾಣ್ಶಿರ್‍ಯಾಂತ್ ಆಪ್ಲೆಂ ತೊಂಡ್ ಲಿಪವ್ನ್
ರಡ್ತಾ ರಡ್ತಾ ರಡ್ತಾ ರಡ್ತಾ ಆನಿ ರಡ್ತಾ
ತುಮಿ ಸತ್ ಉಲಂವ್ಚೆ ಸಗ್ಳೆ ಮೆಲ್ಲೆಚ್ ದಾರ್ ಕಾಡ್ತಾಂ ಮ್ಹಣ್ತಾ
-ಟೈಟಸ್ ನೊರೊನ್ಹಾ, ತಾಕೊಡೆ