ಸಂಪಾದಕೀಯ್:
ಮಾತ್ಯಾರ್ ನಿರಾಶೆಚೊ ಬುಡ್ಕುಲೊ ವ್ಹಾವಂವ್ಚಿಂ ಮನ್ಶಾಂ
ಸಗ್ಳ್ಯಾಂನಿ ಸಮಾಧಾನ್, ಸಂತೊಸ್, ಸುಶೆಗ್‌ಚ್ ಆಸ್‌ಲ್ಲೊ ತರ್ ಕಿತ್ಲೆಂ ಬರೆಂ ಆಸ್ತೆಂ ನ್ಹಯ್? ಹೊ ಸಂಸಾರ್ ತಸೊ ನ್ಹಯ್, ಏಕ್ ಚಿಂತಾನಾ ಆನ್ಯೇಕ್‌ಚ್ ಘಡ್ತಾ. ಎಕ್ಲೊ ಹೆಣೆಂ ವೊಡ್ತಾನಾ ಆನ್ಯೇಕ್ಲೊ ತೆಣೆಂ ವೊಡ್ತಾ. ಕೊಣಾಕ್ ಬಳ್ ಆಸಾ, ತಾಚೆಂ ಬೊಳ್ಕೆಂ ಶಿಜ್ತಾ. ಕುಡಿಂತ್ ಅಸ್ಕತ್, ಮನಾಂತ್ ಆಸ್ಕತ್, ದುಡ್ವಾನ್ ಆಸ್ಕತ್ ಮನೀಸ್ ಹಾರ್‍ತಾ. ಹೆಂ ಸಂಸಾರಾಚೆಂ ನಿಯಮ್.
ಹ್ಯಾ ನೆಮಾಕ್ ಹಾಂಗಾಚಿ ನಾಯಕಿ ಕಾಂಯ್ ಅಪವಾದ್ ನ್ಹಯ್. ನಿರಾಶೆಚೊ ಬುಡ್ಕುಲೊ ತಿಚ್ಯಾ ಮಾತ್ಯಾರ್ ತಿ ವ್ಹಾವೊನ್ ಚಮ್ಕಲ್ಯಾ. ಕಿತ್ಯಾಕ್ ಅಸಲಿ ಏಕ್ ನಿರಾಶಾ? ಮನ್ಶಾ ಸೈಂಭ್ ನಿರಾಶೆಂತ್ ಕೊಟಾರ್‍ಲಿ ಗುಟ್ಲಿ ಜಾಂವ್ಚೆಬರಿ ಗುಟ್ಲಿ ಜಾತಾ. ಫಕತ್ ಆಶಾ, ಹಟ್, ಮಿಸಾಂವ್ ಹ್ಯಾ ಗುಟ್ಲಿಪಣಾಂತ್ಲೆಂ, ಗುಲಾಮ್‌ಪಣಾಂತ್ಲೆಂ ಮನ್ಶಾಕ್ ಸುಟ್ಕಾ ಲಾಭಂವ್ಕ್ ಸಕ್ತಾ.
ಮಾಗೀರ್ ನಿರಾಶಾ, ಸಲ್ವಣಿ ಖಿಣಾನ್ ಕವಿತೆಕ್ ಜಲ್ಮ್ ದಿತಾ ಕೊಣ್ಣಾ. ಸಂತೊಸ್, ಜೀಕ್ ಕವಿತೆಚ್ಯಾ ಜಲ್ಮಾಕ್ ಕಾರಣ್ ಕಿತ್ಲೆ ಪಾವ್ಟಿಂ ಜಾತಾತ್?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ರುದಾನ್
ಫಾಂತ್ಯಾಫಾರಾಚೊ ಧೋವ್ ಹಾಂವ್
ತರ್‍ನ್ಯಾ ತಣಾರ್ ಮೊತಿಂ ಜಾತಾಂ
ಸರ್ ಗುಂತ್ಚ್ಯಾ ಆದಿಂಚ್
ಸುರ್ಯಾ ಧಾವೆಕ್ ಕರ್ಗೊನ್ ವೆತಾಂ
ಮೊಗ್ರ್ಯಾ ಫುಲಾಚೊ ಕಳೊ ಹಾಂವ್
ಪುರ್‍ತೆಂ ಫುಲೊನ್ ಪರ್ಮಳೊಂಕ್ ಆಶೆತಾಂ
ಬೊಂಗೊ ಆಸ್ತಾನಾಂಚ್ ಖುಂಟ್ತಾತ್ ಮ್ಹಾಕಾ
ಫುಲ್ಚ್ಯಾ ಆದಿಂಚ್ ಬಾವೊನ್ ವೆತಾಂ
ತಳ್ಯಾಂತ್ಲೊ ಉದ್ಕಾ ಥೆಂಬೊ ಹಾಂವ್
ವ್ಹಾಳೊನ್ ದರ್ಯಾಕ್ ಮೆಳೊಂಕ್ ಆಶೆತಾಂ
ಮಿಲನ್ ಜಾಂವ್ಚೆ ಆದಿಂಚ್
ರೆಂವೆ-ಕಣಾಂತ್ ಜಿರೊನ್ ವೆತಾಂ
ಮೊಳ್ಬಾ ವಯ್ಲೊ ಚಂದ್ರೆಮ್ ಹಾಂವ್
ಹರ್ಯೆಕ್ ರಾತಿಂ ಪುನವ್ ಆಶೆತಾಂ
ಆಮಾಶೆಚೊ ದಾಟ್ ಕಾಳೊಕ್
ಚಾಂದ್ನ್ಯಾಕ್ ಮ್ಹಜ್ಯಾ ಧಾಂಪಣ್ ಘಾಲ್ತಾ
ಹರ್ಧ್ಯಾ ಭಿತರ್‍ಲೆಂ ಕಾಳೀಜ್ ಹಾಂವ್
ಮೊಗಾನ್ ಭರೊನ್ ಉಡೊಂಕ್ ಆಶೆತಾಂ
ನಂಜಿ ರಗತ್ ರಾಗಾ ಮೊಸ್ರಾಚೆಂ
ಉಡ್ಕಿ ಮಾರ್‍ತಾಂ-ಮಾರ್‍ತಾನಾಂಚ್ ಸ್ತಬ್ದ್ ಜಾತಾಂ
-ಆಶಾ ಪಿಂಟೊ