ಸಂಪಾದಕೀಯ್:
ಎಕ್ಶೆಂ ಕವಿತೆಚಿಂ ಬಿಯಾಂ ಮುಂಗೆಂವ್ಕ್ ಆಶೆತಾತ್
ಖಂಯ್ಚಿ ಸಂಗತ್ ಕವಿತಾ ಜಾತಾ ಮ್ಹಣೊನ್ ವಿಚಾರುಂಕ್ ವಚೊನ್ ಪ್ರತಿಮಾಂಚಿ ರಾಸ್‌ಚ್ ಹಾತಾಳ್ಳ್ಯಾ ಮಿಯಾರ್‍ಚ್ಯಾ ಆವಿನಾನ್. ಹರ್‍ಯೆಕೆ ಪ್ರತಿಮಾ ಭೊಂವ್ತಿಂ ಎಕೇಕ್ ಕವಿತಾ ಬರವ್ನ್ ಕಾಡ್ಯೆತ್. ಪುಣ್ ಆಮ್ಚೆ ಮುಕಾರ್ ಸಗ್ಳ್ಯೋಯ್ ರಾಸ್ ಘಾಲುನ್ ಕವಿತಾ ವಿಂಚ್ಚೆಂ ಕಾಮ್ ದೀವ್ನ್, ಆಪುಣ್ ಶಾಬಿತಾಯೆನ್ ಪಯ್ಸ್ ರಾವೊನ್ ಹಾಸ್ತಾಶಿ ದಿಸ್ತಾ ಹೆ ಕವಿತೆಂತ್ಲಿ ನಾಯಕಿ. ಕವಿತಾ ಬರಂವ್ಕ್ ಸುರು ಕರ್‍ತಾನಾ ಆಸ್ಚೆಂ ಭ್ಯೆಂ ಕಾಂಯ್ ಹೆಂ?
ಅಸಲೆಂ ಅಪಧೈರ್ ಕಿತ್ಯಾಕ್, ಕವಿತೆಕ್ ಗರ್ಜ್ ಆಸ್ಚೆಂ ಹರ್‍ಯೆಕ್ ಲಕ್ಷಣ್ ಹೆ ಕವಿತೆಂತ್ ಆಸ್ತಾನಾ? ಅಸಲಿ ಭಿರಾಂತ್ ಕಿತ್ಯಾಕ್, ಹೆ ಕವಿತೆಂತ್ ಎಕ್ಶೆಂ ಕವಿತೆಚಿಂ ಬಿಯಾಂ ಮುಂಗೆಂವ್ಕ್ ರಾಕೊನ್ ರಾವ್ಲ್ಯಾಂತ್ ಆಸ್ತಾನಾ!?
ವರ್ಸಾ ಆದಿಂ ಅಕಾಡೆಮಿ ತರ್ಫೆನ್ ಹಾಂವೆಂಚ್ ಚಲವ್ನ್ ವೆಲ್ಲ್ಯಾ ಕಾರ್ಯಾಸಾಳಾಂತ್ ಆವಿನಾನ್ ಭಾಗ್ ಘೆತ್‌ಲ್ಲೊ. ತಿಚಿ ಹುಮೆದ್ ಮಾತ್ರ್ ನ್ಹಯ್, ಹುಶಾರ್‍ಗಾಯ್ ಹಾಂವೆಂ ತವಳ್ ಪಾರ್ಕಿಲ್ಲಿ. ಪುಣ್ ಆತಾಂ ಧಾ ಮ್ಹಯ್ನೆ ಪಾಶಾರ್ ಜಾತಾನಾ ಸಕ್ತೆಚ್ಯಾ ಭುಜಾಂನಿ, ಸತ್ವಾಚ್ಯಾ ಮಾಸಾಂನಿ ತಿಚಿ ಕವಿತಾ ಭರ್‌ಲ್ಲಿ ದಿಸ್ತಾ. ಆಯ್ಲೆವಾರ್ 'ರಾಕ್ಣೊ'ನ್ ಚಲಯಿಲ್ಲ್ಯಾ ಕವಿಗೋಷ್ಟಿವೆಳಾರ್ ತಿಣೆ ವಾಚ್‌ಲ್ಲಿ ಕವಿತಾ ಆಸಾ ತಶಿ ಹಾಂಗಾ ಪರ್ಗಟ್ ಕೆಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕವಿತಾ
ಖಂಯ್ಚ್ಯಾಕ್ ಕವಿತಾ ಮ್ಹಣೊಂ?
ಮೊಡಾಂ ಝಡ್ಲ್ಯಾರ್ ದಿಸ್ಚ್ಯಾ ನಿಳ್ಶ್ಯಾ ರಂಗಾಕ್
ಸುರ್ಯೊ ಬುಡೊನ್ ಉರ್‍ಚೆ ಧಗಿಕ್
ಚಂದ್ರ್ ಲಿಪೊನ್ ಉರ್‍ಚ್ಯಾ ಚಾಂದ್ನ್ಯಾಕ್
ಉದಕ್ ಜಿರವ್ನ್ ಉರ್‍ಚೆ ಶೆಳಿಕ್
ಕೋಯ್ರ್ ಝಾಡುನ್ ಉರ್‍ಚೆ ಧುಳಿಕ್
ವಾ ದೊಳ್ಯಾಂಕ್ ದಿಸನಾತ್ಲ್ಯಾರಿ ಉರ್‍ಚ್ಯಾ ಅನ್ಭೋಗಾಂಕ್?
ಖಂಯ್ಚ್ಯಾಕ್ ಕವಿತಾ ಮ್ಹಣೊಂ?
ಮಿಟಾ ದುಖಾಂನಿ ಫುಟ್ಚ್ಯಾ ದುಧಾಕ್
ಉತ್ರಾಂ ವ್ಹಾಳೊನ್ ಫುಟ್ಚ್ಯಾ ಕಾಳ್ಜಾಕ್
ರಗತ್ ವ್ಹಾಳೊನ್ ಆಟಂವ್ಚ್ಯಾ ಕುಡಿಂಕ್
ನೀದ್ ಚಿಂವೊನ್ ತುಟ್ಚ್ಯಾ ಸಪ್ಣಾಂಕ್
ಸೊಭಾಯ್ ದೀವ್ನ್ ತೊಪ್ಚ್ಯಾ ಕಾಂಟ್ಯಾಂಕ್
ವಾ ಜಿಣಿಯೆಂತ್ ಪಾಟ್ಲಾವ್ ಕರ್‍ಚೆ ಮೊರ್ನಾ ಸಾವ್ಳೆಕ್?
ಖಂಯ್ಚ್ಯಾಕ್ ಕವಿತಾ ಮ್ಹಣೊಂ?
ದುಖಾಂ ಗಳವ್ನ್ ಪರ್ಜಳ್ಚ್ಯಾ ದೊಳ್ಯಾಂಕ್
ವೋಂಟ್ ಶಿಂದುನ್ ಉಟ್ಚ್ಯಾ ಹಾಶಾಂಕ್
ಕರ್ಪಲ್ಲ್ಯಾ ಇಟ್ಯಾವಯ್ರ್ ಜಲ್ಮಲ್ಲ್ಯಾ ತಣಾಕ್
ಗಡಿ ಆಸ್ಲ್ಯಾರಿ ಮೆಳ್ಚ್ಯಾ ಕಾಳ್ಜಾಂಕ್
ಕಾಳೀಜ್ ನಾತ್ಲ್ಯಾರಿ ಉರ್‍ಚ್ಯಾ ಮೊಗಾಕ್
ಮಾತಿಯೆಂತ್ ಪುರ್‍ಲ್ಯಾರಿ ಕಿರ್‍ಲೊಂಚೆ ಬಿಯೆಕ್?
ಕವಿತಾ ಸೊಧುನ್ ಕವಿ ಜಾಲಿಂ
ಪುಣ್ ಮ್ಹಜಿ ಕವಿತಾ ಖಂಯ್ ಪಾವ್ಲಿ?
ಓ ಥಂಯ್ ರಸ್ತ್ಯಾ ಘುಂವ್ಡೆರ್, ಗುಜ್ರಿ ಆಂಗ್ಡಿಂತ್
ಕುಸೊನ್ ಘಾಣ್ಚ್ಯಾ ಮುನ್ಸಿಪಾಲ್ಟಿ ಡಬ್ಬ್ಯಾಂತ್
ಪುಸುನ್ ಲೆಂವ್‌ಲ್ಲೆ ಶಿರೊತೆಚ್ಯಾ ಪರ್ಜಳಾಂತ್
ಶಿತಾ ಉಂಡಿ ಮಾಗ್ಚ್ಯಾ ಹಜಾರೊಂ ಹಾತಾಂ ಮಧೆಂ
ಕವಿತಾ ಮ್ಹಜಿ ನಪಯಿಂಚ್ ಜಾಲಿ
ಆತಾಂ ಖಂಯ್ಚ್ಯಾಕ್ ಹಾಂವ್ ಮ್ಹಜಿ ಕವಿತಾ ಮ್ಹಣೊಂ?
-ಆವಿನಾ ಮಿಯಾರ್