ಸಂಪಾದಕೀಯ್:
ಕಾಯ್ಲಿಂತ್ಲೆಂ ಸಾಸಾಂವ್ ಉಸಳ್ತಾನಾ ಕಾಳ್ಜಾಕ್ ಖರ್‍ವಣಾಂ ಪಡ್ತಾತ್
ಏಜೆಂಟಾಕ್ ದಿಲ್ಲೊ ದುಡು ವರ್ಸಾಂ ಗೆಲ್ಯಾರ್‌ಯ್ ಭರ್‍ತಿ ಕರ್‍ಚೆಬರಿ ನಾ. ಗಲ್ಫಾಚ್ಯಾ ಗಾಂವಾಂತ್ ಆಯ್ಲ್ಯಾ ಉಪ್ರಾಂತ್ ಕುಡಿಚಿ ಖಿರ್ ಜಾಲ್ಯಾ, ಪೊಟಾಕ್ ಕೊಕೊ ವೆಳಾರ್ ನಾ, ಆಂಗಾಕ್ ಪಾಪೊ ಸಾರ್ಕೊ ನಾ. ವೊತಾಚೆ ಧಾವೆಕ್ ಕುಡಿಚಿ ಕಾತ್ ಹಾಪೊಳ್ ಜಾತಾ, ಕುಟ್ಟೆಂ ರಗತ್ ಲೆಗುನ್ ಆಟೊನ್ ಕುಲೆರಾಚೆರ್ ರಾವ್ತಾ. ಇತ್ಲೆಂ ಆಸ್ತಾಂ ಗಾಂವಾಂತ್ಲಿ ಬಾಯ್ಲ್ ಕಾಯ್ಲಿಂತ್ಲೆಂ ಸಾಸಾಂವ್ ಉಸಳ್‌ಲ್ಲೆಬರಿ ಉಸಾಳ್ಳ್ಯಾರ್ ಹೆಂ ಕಾಳೀಜ್ ತರೀ ಕಶೆಂ ಸೊಶಿತ್?
ತ್ಯಾ ಎಕೆ ಶಿಜವ್ಣೆಂತ್ ಹಿ ಕವಿತಾ ಉಬ್ಜಾಲ್ಯಾ. ಹ್ಯೂಬರ್ಟ್ ಲಸ್ರಾದೊನ್ ಪಯ್ಲ್ಯಾನ್ ಪಯ್ಲೆಂ ಕವಿತಾ ಕುಳಾರಾಂತ್ ಕವಿತಾ ಬರಂವ್ಚೆಂ ಧೈರ್ ಘೆತ್ಲಾಂ. ಹ್ಯಾ ತಾಚ್ಯಾ ಧೈರಾಕ್ ಲಾಗೊನ್ ಕವಿತೆಚೆ ಅವ್ಗೂಣ್ ಸಗ್ಳೆ ಮಾಫ್ ಕರ್‍ಚ್ಯಾ ತಸಲೆ. ಹಾಂಗ ಥಾವ್ನ್ ಹುಮೆದ್ ಜೊಡುನ್ ಫುಡಾರಾಂತ್ ಉತ್ತೀಮ್ ಕವಿತಾ ತೊ ರಚುಂಕ್ ಸಕ್ತಲೊ ಮ್ಹಳ್ಳೊ ಭರ್‍ವಸೊ ಆಮ್ಚೊ.
ಕವಿತಾ ಸಂಸಾರ್ ವಿಸ್ತಾರ್ ಕರ್‍ಚೆ ದಿಶೆನ್ ಹ್ಯೂಬರ್ಟ್ ತಸಲ್ಯಾ ಕವಿಂಕ್ ಕವಿತಾ ಕುಳಾರ್ ಸದಾಂಚ್ ಯೆವ್ಕಾರ್ ದಿತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಫಳ್ ಆನಿ ಪಾಳ್
ಏಜೆಂಟಾಕ್ ದಿಲ್ಲ್ಯಾ ಪಯ್ಶಾಂಚೊ ಫಳ್
ಗಲ್ಫಾಕ್ ಪಾವೊನ್ ಜಾಲಾ ಗೋಳ್
ವೊತ್ ತಾಪ್ತಾ ಮಾತ್ಯಾರ್ ಅಶೆಂ
ತಾಂತಿಂ ಮಾರ್‍ಲ್ಯಾರ್ ಭಾಜ್ತಾ
ವೇಳ್ ಮೆಳ್ತಾನಾ ಚಿಂತುನ್ ಬಸ್ತಾಂ
ಸಿಸ್ಟರಿಚಿ ದೊತೊರ್ನ್ ನಿಯಾಳ್ತಾಂ
ಕೆಲ್ಲ್ಯಾ ಪಾಪಾಂಚೆಂ ಭೊಗ್ಸಾಣೆಂ ಕೊಣ್ಣಾ
ಪುಲ್ಗತ್ರಿಚೆ ಕಷ್ಟ್ ಭೊಗ್ತಾಂ
ಮ್ಹಯ್ನ್ಯಾಚೆ ಆಕ್ರೇಕ್ ಪಾಗಾಕ್ ರಾಕ್ತಾಂ
ಮೆಳ್‌ಲ್ಲ್ಯಾಂತ್ಲೆ ತೀನ್ ವಾಂಟೆ ಕರ್‍ತಾಂ
ಮ್ಹಜೊ, ಮಾಂಯ್ಚೊ ಆನಿ ಬಾಯ್ಲೆಚೊ
ಘೆವ್ನ್ ಬೆಂಕಾಚಿ ವಾಟ್ ಧರ್‍ತಾಂ
ಥೊಡ್ಯಾಚ್ ದಿಸಾಂನಿ ಬಾಯ್ಲೆಚೆಂ ಫೊನ್
ಮಾಂಯ್ಕ್ ಕಿತ್ಯಾ ಚಡ್, ಮ್ಹಾಕಾ ಉಣೆ?
ಗಾಂವಾಕ್ ಆಯ್ಲ್ಯಾರ್ ತುಕಾ ನಾ ಭಿಚಾಣೆಂ
ಹಾಂವ್ ಜಾಯ್ ತರ್ ಮಾಂಯ್ಕ್ ಧಾಡ್ ಉಣೆಂ
ಗಾಂವಾಕ್ ಹಾಂವ್ ರಜೆರ್ ಪಾವ್ಲೊಂ
ಏರ್‌ಪೊರ್ಟಾಂತ್ ಬಾಯ್ಲೆನ್ ಮ್ಹಾಕಾ ವೆಂಗ್ಲೆಂ
ಮಾಂಯ್ಚೆಂ ಕಿತೇಂಯ್ ಆಯ್ಕನಾಕಾ
ಕೀಸ್ ದಿಂವ್ಚೆ ಆದಿಂ ಕಾನಾಂತ್ ಫುಂಕ್ಲೆಂ
ಆದಾಂವ್ ಬಾಪಾ ನಾತ್‌ಲ್ಲೊ ತುಕಾ ವೇಳ್?
ಎವೆನ್ ತುಕಾ ದಿತಾನಾ ಫಳ್
ಕಿತ್ಯಾಕ್ ದಿಲೆಂನಾಂಯ್ ಖೊರೊಜ್ ಕಾಡುಂಕ್
ಜಿಬೆಕ್ ತಿಚ್ಯಾ ಚಿಂಚೆ ಪಾಳ್?
-ಹ್ಯೂಬರ್ಟ್ ಲಸ್ರಾದೊ, ಆಂಜೆಲೊರ್