ಸಂಪಾದಕೀಯ್:
ಕಳ್ಶೆ ಪೊಂದಾ ಧಾಂಪುನ್ ದವರ್‌ಲ್ಲೆ ದಿವೆ ಉಪ್ಕಾರನಾಂತ್
ಹುಮಿಣಿ ಕಶಿ ಹಿ ಕವಿತಾ ಆಪುರ್ಬಾಯೆನ್ ಹಾಂಗಾಸರ್ ವ್ಹಾಳ್ಳ್ಯಾ. ಅಸಲಿ ಝರ್ ದೊಂಗ್ರಾ ತಸಲ್ಯಾ ಘಟ್‌ಮೂಟ್, ಶ್ಯಾತಿವಂತ್, ಸಂಪತ್ತೆನ್ ಪಿಕ್‌ಲ್ಲ್ಯಾ ಥಳಾಥಾವ್ನ್ ಉಬ್ಜಲ್ಯಾ ಜಾಲ್ಯಾರ್ ಮಾಗೀರ್ ಕೊಣ್ ತೊ ತಿಕಾ ಕಾಟೆಂ ಬಾಂಧುನ್ ಆಡಾಯ್ನಾಸ್ತಾಂ ರಾವತ್? ಆಮ್ಚೆ ಮಧೆಂ ಜಾಯ್ತೆ ಅಸಲೆ ದೊಂಗೊರ್ ಆಸಾತ್ - ಮನ್ಶಾಕುಳಾಕ್ ಝರ್ ದೀವ್ನ್. ಜಾಯ್ತ್ಯಾ ಜಣಾಂಕ್ ಹಿ ಝರ್ ಥಂಯ್ಸೂನ್ ವ್ಹಾಳೊನ್ ಆಸಾ ಮ್ಹಣೊನ್‌ಯ್ ಖಬರ್ ಆಸ್ಚಿನಾ.
ದೊಂಗ್ರಾಥಾವ್ನ್ ಝರ್ ಫುಟ್ತಾ, ಹಿ ಝರ್ ಶೆತಾ ಭಾಟಾಂಕ್ ಉಪ್ಕಾರ್ತಾ. ಶೆತಾಂ ಪಿಕಯ್ತಾ, ಫಳಾಂ ದೆಂವಯ್ತಾ, ಫುಲಾಂ ಫುಲಯ್ತಾ, ಚಿಕಲ್ ನಿತ್ಳಾಯ್ತಾ ಆನಿ ತಾನ್ ಸೈತ್ ಥಾಂಬಯ್ತಾ. ಆಮೀಂಯ್ ಮನೀಸ್ ಅಶೆಚ್. ಆಮ್ಚೆಂ ಗಿನ್ಯಾನ್, ಬುದ್ವಂತ್ಕಾಯ್, ಹುಶಾರ್‍ಗಾಯ್, ಪ್ರತಿಭಾ ಖಂಯ್ ಥಾವ್ನ್‌ಕಿ ಜೊಡ್ತಾಂವ್. ಜೊಡ್‌ಲ್ಲೆಂ ತೆಂ ಚ್ಯಾರ್ ಜಣಾಂಕ್ ವಾಂಟ್ಚೆಂ ಕಾಮ್ ಕೆಲೆಂ ಜಾಲ್ಯಾರ್ ಆಮ್ಚಿ ಜಿಣಿ ಸಾರ್ಥಕ್ ಕೊಣ್ಣಾ! ನಾಂತರ್ ಕಳ್ಶೆ ಪೊಂದಾ ಧಾಂಪುನ್ ದವರ್‌ಲ್ಲ್ಯಾ ದಿವ್ಯಾ ಭಾಶೆನ್ ಆಮ್ಚೆಂ ಜಿವಿತ್.
ಮ್ಯಾಕ್ಸಿಮ್ ಪಿರೇರಾ ಪಯ್ಲೆಚ್ ಪಾವ್ಟಿಂ ಕವಿತಾ ಕುಳಾರಾಕ್ ಆಯ್ಲಾ. ಕವಿತೆಂತ್ ಸಾಂಗ್‌ಲ್ಲೆಂ ಆಪ್ಲ್ಯಾ ಯಾಜಕ್‌ಪಣಾಚ್ಯಾ ಜಿವಿತಾದ್ವಾರಿಂ ದಾಕಂವ್ಚೊ ಮನೀಸ್. ತಸಲ್ಯಾ ಮನ್ಶಾಂಕ್ ಮಾತ್ರ್ ಅಶೆಂ ಸಾಂಗೊಂಕ್ ಧೈರ್ ಆಪಾಪಿಂಚ್ ಯೆತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಹಾಂವ್ ಕೋಣ್?
ಚಲ್ತಾಂ ಧಾಂವ್ತಾಂ ಗಾಂವಾನ್ ಗಾಂವ್
ಸಾಂಗ್ಶಿ-ಗಿ ತುಂ ಮ್ಹಜೆಂ ನಾಂವ್?
ದೊಂಗ್ರಾ ತಾಳ್ವೆರ್ ಮ್ಹಜೊ ಜಲ್ಮ್
ತರೀ ನೆಣಾಂ ಬಡಾಯ್ ಭರ್ಮ್
ಏಕ್‌ಚ್ ಶೆಣೊ ಶಿರೊ ಸಭಾರ್
ದೆಂವ್ತಾಂ ದೆಂವ್ಣಿ, ಚಡ್ನಾ ಉಬಾರ್
ತಾನೆಕ್ ಲೊಕಾಕ್ ಜಾತಾಂ ಆಸ್ರೊ
ದಾಳ್ತಿತ್ ತರೀ ಮ್ಹಜೆರ್ ಕಚ್ರೊ
ಗಿಮಾಂತ್ ಸಕ್ಡಾಂಕ್ ಮ್ಹಜೆರ್ ದೊಳೊ
ಕೃಷಿ ಕರ್‍ತಾತ್ ಆಡಾವ್ನ್ ವ್ಹಾಳೊ
ಭಿಜವ್ನ್ ದುಕೊಳ್ ಲೊಕಾಂಗೆಲೊ
ವ್ಹಾವವ್ನ್ ವ್ಹರ್‍ತಾಂ ಚಿಕಲ್ ಮ್ಹೆಳೊ
ನಿಮ್ಣೆಂ ದರ್ಯಾಂತ್ ಲಿಪ್ತಾಂ ಹಾಂವ್
ಕಳ್ಳೆಂ ತುಕಾ ಮ್ಹಜೆಂ ನಾಂವ್?
ಜಲ್ಮಾನ್ ಹಾಂವ್ ನ್ಹಯ್‌ಗಿ ಖಾಲ್ತಿಂ
ಜಿಣ್ಯೆನ್ ಮ್ಹಜೆ ಜಾತಾಂ ವ್ಹರ್ತಿಂ
ಶಿಕ್ ತುಂ ಮನ್ಶಾ ಏಕ್ ಲಿಸಾಂವ್
ಪಳೆವ್ನ್ ಮ್ಹಜೆಂ ಜಿಣ್ಯೆ ಮಿಸಾಂವ್
-ಮ್ಯಾಕ್ಸಿಮ್ ಪಿರೇರಾ