ಸಂಪಾದಕೀಯ್:
ಹಾತಾಕ್ ಮ್ಹೆಳೆಂ ಜಾಲ್ಯಾ ಶಿವಾಯ್ ತೊಂಡಾಕ್ ಕೆಳೆಂ ಮೆಳನಾ!
’ಹಾತಾಕ್ ಮ್ಹೆಳೆಂ ತರ್ ತೊಂಡಾಕ್ ಕೆಳೆಂ’ ಅಶೆಂ ಏಕ್ ಸಾಂಗಪ್ ಆಸಾ. ಆಮ್ಚ್ಯಾ ದೋನ್ ಹಾತಾಂನಿ ಕರ್‍ಯೆತ್ ಜಾಲ್ಲಿಂ ಬರಿಂ ಕಾಮಾಂ ತಶೆಂ ವಾಯ್ಟ್ ಕಾಮಾಂ ಕೊಣೆ ಆಜೂನ್ ಮೆಜ್ಲ್ಯಾಂತ್? ಕವಿ ಜಾಲ್ಲ್ಯಾಂನಿ ಹಿಂ ಕಾಮಾಂ ಕೆಲಿಂ ಜಾಲ್ಯಾರ್ ತಾಂಕಾಂ ಬೊಟಾಂಚೆರ್ ಲಕ್ಷಿ, ತಳಾತಾರ್ ಸರಸ್ವತಿ, ಮಾಗೀರ್ ಗೋವಿಂದ ದಿಸನಾಸ್ತಾಂ ರಾವತ್? ತಶೆಂ ಕೊಣ್ಣಾ, ಹಾಂಗಾಚಿ ಕವಯಿತ್ರಿ ಹಾತಾಂಕ್ ಪಳೆವ್ನ್ ರಾವ್ತಾಂ, ತಿಕಾ ಅಪ್ರೂಪಾಚ್ಯಾ ಝರಿಂಚಿ ವೊಳಕ್ ಜಾತಾ.
ಬಾಯ್ ಅರುಣಾ ಯೆದೊಳ್ ಖಂಯ್ ಆಸ್‌ಲ್ಲಿ ಕೊಣ್ ಜಾಣಾ? ಕಾಂಯ್ ಅಂತರ್‌ಜಾಳಿಚೆರ್ ದೋನ್ ತೀನ್ ಕವಿತಾ ಪಾಟ್ಲ್ಯಾ ಪಾಂಚ್ ವರ್ಸಾಂ ಆದಿಂ ಥಾವ್ನ್ ಆಮಿ ವಾಚ್‌ಲ್ಲ್ಯೊ ಸೊಡ್ಲ್ಯಾರ್, ತಿಚ್ಯಾ ಕವಿತೆಚ್ಯಾ ಖಜಾನಾವಿಶಿಂ ಆಮ್ಕಾಂ ಖಬರ್ ನಾತ್‌ಲ್ಲಿ. ಕೊಂಕಣಿ ಕವಿತೆಚೊ ತಿಣೆ ಬರೋಚ್ ಪೋಸ್ ಕೆಲಾ ಆನಿ ಭುರ್ಗ್ಯಾಂ ಖಾತೀರ್ ಜಾಯ್ತಿಂ ಗಾಣಾಂ ಬರಯ್ಲ್ಯಾಂತ್.
ಹಾಂಗಾ ದಿಲ್ಲಿ ಕವಿತಾ ಠರಾವಣೆಚೆ ದಿಷ್ಟಿನ್ ಜಾಂವ್, ತಾಂತ್ರಿಕ್ ದಿಷ್ಟಿನ್ ಜಾಂವ್ ಕಾಂಯ್ ಊಣ್ ನಾತ್‌ಲ್ಲಿ. ಪುಣ್ ತಿಣೆಂ ಮಾತ್ಶೆಂ ಪ್ರಾಸಾತೆವ್ಶಿಂ ಚಡ್ತಿಕ್ ಧ್ಯಾನ್ ದಿಲ್ಲೆಂ ತರ್ ಹೆ ಕವಿತೆಚಿ ಸೊಭಾಯ್ ಕಾಂಯ್ ದೊಡ್ತಿ ಜಾತಿ ಕೊಣ್ಣಾ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಹಾತ್
ಹಾತ್ ದಾಕ್ಕೊವ್ನ್ ಭವಿಷ್ಯ್ ಪಳೊನಯೆ
ಹಾತ್ ಮಡ್‌ಚೂನ್ ನಿಷ್ಚಿಂತ್ ಬೈಸುನಯೆ
ನಶಿಬ್ ಆಸನಾ ಹಾತ್ತಾ ಗೆರ್‍ಯಾಂರಿ
ನಶಿಬ್ ಆಸ್ತಾ ಮೆಹನತಿ ಹಾತ್ತಾರಿ
ಹಾತ್ ಆಪ್ಪುಣ್ ಸ್ವತಾ ಶಕ್ತಿವಾನ್
ದೊನ್ನಿ ಹಾತ್ತಾಂನಿ ಜಾಂವ್ಚೆಂ ದುಪ್ಪಟ್ ಕಾಮ್!
ಹಾತ್ ದೀವ್‌ನು ಬುಡ್ತಲ್ಯಾಕ್ ಕಾಡ್ಯೆದ್ ಉದ್ಕಾ ಭಾಯ್ರ್
ಹಾತ್ ಧೋರ್‍ನು ಪರ್ಕ್ಯಾಕ್ ಕೋರ್‍ಯೆದ್ ಜೀವ್‌ಲಗ್ ಮಿತ್ರ್
ಹಾತ್ ಸೋಣು ದುರ್ಬಳ್ಯಾಂಕ್ ದಾನ್ ಕೋರ್‍ಯೆದ್
ಹಾತ್ತಾ ಬಳಾನ್ ಆಪ್‌ಣಾಲೊ ಜೀವ್ ರಾಖ್‌ಯೆದ್!
ಹಾತ್ ಆಸ್ತಾ ಏಕ್ ಪುಲ್ಲೆಲೆಂ ಕಮಳ್ ಪುಷ್ಪ್
ಮನ್‌ಗಟ್ ತಾಜಿ ದೇಂಟ್
ಬೊಟ್ಟಂ ಕೋಮಲ್ ಪಾಕ್‌ಳ್ಯೊ
ಹಾತ್ತಾ ಗುಣಾನೆ ಜಾತ್ತಾ, ಬರೆ ನಶಿಬಾಚಿ ಭೆಟ್!
ಹಾತ್ ಆಸ್ತಾ ಮನಾನೆ ನಾಜುಕ್
ದುಖಿತಾಂಕ್ ದಿತ್ತಾ ಸುಖ್
ತಾಂಗೆಲೆ ದೊಳ್ಯಾಚೆ ಪುಸೂನ್ ಉದ್ದಾಕ್
ಆನಿ ಫಾಟೀರಿ ಪೊರ್ಸುನ್ ಹಾತ್!
ಹಾತ್ತಾ ಬೊಟ್ಟಾಂರ್ ಖೆಳ್ತಾ ಲಕ್ಷಿ
ತಳ್ ಹಾತ್ತಾರಿ ಸರಸ್ವತಿ
ಮುಳಾಕ್ ಸಾಕ್ಷಾತ್ ಗೋವಿಂದ್
ಅಶಿ ಆಸ್ತಾತ್ ಹಾತ್ತಾರಿ ಆಶೀರ್ವಾದ್!
-ಅರುಣಾ ರಾವ್, ಕುಂದಾಜೆ
by folding, ಗೆರೆ = lines, ಮನ್‌ಗಟ್ = wrist)