ಸಂಪಾದಕೀಯ್:
ಪಾವ್ಸಾಚ್ಯಾ ಝೊಡಾಕ್ ಶಿರ್‍ಕಲ್ಲೊ ಅನ್ಭೋಗ್ ದಿಂವ್ಚಿ ಕವಿತಾ
ಆನಿ ಹೊ ಪಾವ್ಸ್ ಮ್ಹಳ್ಯಾರ್ ಕಸೊ ಯೆತಾ ಮ್ಹಳ್ಳೆವಿಶಿಂ ಏಕ್ ಆಪುರ್ಬಾಯೆಚಿ ಕವಿತಾ ವಿಣ್ಲ್ಯಾ ಮ್ಹಾಲ್ಗಡೊ ಕವಿ ವಲ್ಲಿ ವಗ್ಗಾನ್. 'ದೋ' ಕರುನ್ ಪಾವ್ಸ್ ಪಡ್ತಾ ಕಿತ್ಯಾಕ್ ಮ್ಹಳ್ಯಾರ್ ಹೊ ಮೈಸುರ್‍ಚೊ ಪಾವ್ಸ್. ಕೊಡಿಯಾಳ್ಚೊ ಪಾವ್ಸ್ ತಸಲೊ ಆವಾಜ್ ಕರಿನಾ. ತೊ 'ಭರ್ರ್' ಕರುನ್ ವೊತ್ತಾ. ಪಾವ್ಸಾಚಿಂ ಅತರ್ವಣಾಂ, ತಾಚಿಂ ಲಕ್ಷಣಾಂ ಪುರಾಯ್ ಹೆ ಕವಿತೆಂತ್ ಕವಿನ್ ದಿಪ್ಕಯ್ಲ್ಯಾಂತ್. ಪಾವ್ಸ್ ನಾತ್‌ಲ್ಲ್ಯಾ ಗಾಂವಾಂತ್ಲ್ಯಾಂಕ್ ಏಕ್ ಪಾವ್ಟಿಂ ಹ್ಯಾ ಪಾವ್ಸಾಚ್ಯಾ ಝೊಡಾಕ್ ಭಿಜ್‌ಲ್ಲೊ ಅನ್ಭೋಗ್ ಜಾಯ್ನಾಸ್ತಾಂ ರಾವಸೊನಾ.
ವಲ್ಲಿ ವಗ್ಗ ಉತ್ರಾಂಚಿ ಕಶಿಶಿ ಕರ್‍ಚೊ ಮನೀಸ್. ಚಡಾವತ್ ಚುಟ್ಕುಲಾಂಚ್ ಬರಯ್ತಾ. ಪುಣ್ ಹ್ಯಾ ಪಾವ್ಟಿಂ ತಿ ವಾಟ್ ಸಾಂಡುನ್ ದುಸ್ರೆ ವಾಟೆನ್ ತೊ ಚಮ್ಕಲಾ ಜಾಲ್ಲ್ಯಾನ್ ತಾಚ್ಯಾ ಆಂಗಾರ್ ಚಡ್‌ಲ್ಲ್ಯಾ ರಂಗಾಚಿ ಖಬರ್ ಕೊಣಾಯ್ಕಿ ಆದ್ಳನಾಸ್ತಾಂ ರಾವಶಿನಾ.
ಹಾಂವೆಂ ಮೈಸುರ್‍ಚೊ ಪಾವ್ಸ್ ಮ್ಹಳೆಂ. ಪುಣ್ ಮೈಸುರಾಂತ್ ದರ್ಯೊ ಖಂಯ್ಚೊ? ಕಾಂಯ್ ಮೈಸುರ್‍ಚೊ ಮನೀಸ್ ಮಂಗ್ಳುರ್ ಪಾವ್‌ಲ್ಲೊ ಆಸೊನ್ ಪಾವ್ಸಾಕ್ ಶಿರ್‍ಕಲೊ ಆಸ್ತಲೊ. ಹೆ ಕವಿತೆನ್ ದಾಕಂವ್ಚ್ಯೊ ಪ್ರತಿಮಾ ಪುರಾಯ್ ಉಗ್ತ್ಯೊ ಜಾಲ್ಲ್ಯಾನ್ ಚೂಡ್ ಘೆವ್ನ್ ಸೊಧ್ಚೆಂ ಪ್ರೇತನ್ ಹಾಂವ್ ಕಿತ್ಯಾ ಕರುಂ?
-ಮೆಲ್ವಿನ್ ರೊಡ್ರಿಗಸ್
ಕವಿತಾ
ಆಮ್ಚ್ಯಾ ಗಾಂವ್ಚೊ ಪಾವ್ಸ್
ಆಮ್ಚ್ಯಾ ಹ್ಯಾ ಗಾಂವಾಂತ್
ಪಾವ್ಸ್ ಪಡ್ಲಾ ಮ್ಹಳ್ಯಾರ್ ಕಿತ್ಲೊ
ಪಾವ್ಸ್ ಪಾವ್ಸ್ ಆನಿ ಪಾವ್ಸ್
ಮೊಳ್ಬಾಕ್ ದೊಂಪ್ಳೆ ಪಡ್ಚೆ ತಿತ್ಲೊ
ಆಕಾಸಾರ್ ಮಾಂಡ್ಲಿಂ ಮೊಡಾಂ
ಕಾಳಿಂಚ್ ಕಾಳ್ಬಾಣೆಚಿಂ ಕುಪಾಂ
ಘಡ್ಛಡೊ ಝಗ್ಲಾಣೆಂ ವಾರೆಂ ವಾದಾಳ್
ದಿಸಾಕ್ ಭಿರಾಂಕುಳ್ ಅಂಧ್ಕಾರ್
ದೊಳೆ ಕುರ್ಡೆ ಕರ್‍ಚೆ ತಿತ್ಲೊ
ಆಮ್ಚ್ಯಾ ಹ್ಯಾ ಗಾಂವಾಂತ್
ಪಾವ್ಸ್ ಪಡ್ಲಾ ಮ್ಹಳ್ಯಾರ್ ಕಿತ್ಲೊ
ಪಾವ್ಸ್ ಪಾವ್ಸ್ ಆನಿ ಪಾವ್ಸ್
ಲೊಕಾಕ್ ಕಾಂಠಾಳೊ ಯೆಂವ್ಚೆ ತಿತ್ಲೊ
ಕಠಿಣಾಯೆಚ್ಯಾ ವಾರ್‍ಯಾ ವಾದಾಳಾ ಪಾಟ್ಲ್ಯಾನ್
'ದೋ' ಕರುನ್ ಪಡ್ಲೊ ಪಳೆ ಪಾವ್ಸ್
ಸಂತೊಸ್ ಪಾವ್ಲಿಂ ರೂಕ್ ಆನಿ ಝಾಡಾಂ
ಪಾವ್ಸಾ ಉದ್ಕಾಂತ್ ವ್ಹಾಳೊಂಕ್ ಲಾಗ್ಲ್ಯೊ
ದೊಂಗ್ರಾಂಚ್ಯೊ ಸರ್ವ್ ಖಣಿಯೊಂ ಆನಿ ಝಿರಿಯೊ
ಆಮ್ಚ್ಯಾ ಹ್ಯಾ ಗಾಂವಾಂತ್
ಪಾವ್ಸ್ ಪಡ್ಲಾ ಮ್ಹಳ್ಯಾರ್ ಕಿತ್ಲೊ
ಪಾವ್ಸ್ ಪಾವ್ಸ್ ಆನಿ ಪಾವ್ಸ್
ಪುರೊ ಪುರೊ ನಾಕಾ ನಾಕಾ ಮ್ಹಣ್ಚೆ ತಿತ್ಲೊ
ಪಾವ್ಸ್ ರಾವನಾ ವೊತಾಚಿ ಝಳಕ್ ನಾ
ವೊಮ್ತೊಂಕ್ ಲಾಗ್ಲಿಂ ತಳಿಂ, ಭರೊನ್ ಗೆಲ್ಯೊ ಬಾಂಯೊಂ
ಪಾವ್ಸಾಚೆಂ ಉದಕ್ ವ್ಹಾಳಾಂಕ್
ವ್ಹಾಳಾಂಚೆಂ ಪಯಣ್ ನ್ಹಂಯಾಂಕ್
ದರ್ಯಾಂತ್ ನಾ ಜಾಗೊ ದೆಕುನ್ ಆವ್ರ್‌ಚ್ ಆವ್ರ್
ಆಮ್ಚ್ಯಾ ಹ್ಯಾ ಗಾಂವಾಂತ್
ಪಾವ್ಸ್ ಪಡ್ಲಾ ಮ್ಹಳ್ಯಾರ್ ಕಿತ್ಲೊ
ದಿಸಾಕ್ ಪಾವ್ಸ್ ರಾತಿಕ್ ಪಾವ್ಸ್
ಸಕಾಳಿಂ ಪಾವ್ಸ್ ಸಾಂಜೆರ್ ಪಾವ್ಸ್
ಕಿತೆಂ ಸಾಂಗೊಂ ಹಾಂವ್,
ಹೆರ್ ಕಿತೆಂಚ್ ನಾ ದುಸ್ರೆಂ
ಫಕತ್ ಪಾವ್ಸ್‌ಚ್ ಪಾವ್ಸ್!
-ವಲ್ಲಿ ವಗ್ಗ