ಸಂಪಾದಕೀಯ್:
ಜಾತಿಚ್ಯಾ ಜಾಳಾಂತ್ ಶಿರ್‍ಕಲ್ಲ್ಯಾಂಕ್ ಸಮಾಧಾನ್ ದಿಂವ್ಚಿ ಕವಿತಾ
ಹಿ ಏಕ್ ಕ್ರಾಂತಿಕಾರಿ ಕವಿತಾ. ಬಾಮೊಣ್ ವರ್ಗಾಚ್ಯಾ ಕವಿನ್ ಬರಯ್ಲ್ಯಾ ಜಾಲ್ಲ್ಯಾನ್ ತಿಕಾ ತಿದೊಡೆಂ ಮೋಲ್. ಜಾತಿಂಚ್ಯಾ ಜಾಳಾಂತ್ ಕಿತ್ಲೆಶೆ ಜೀವ್ ಆಯ್ಚ್ಯಾ ಕಾಳಾರ್ ಪಾಸುನ್ ಚಡ್ಪಡೊನ್ ಆಸಾತ್. ಬ್ರಾಹ್ಮಣಾಂನಿ - ಸುಧ್ರಾಂಕ್, ಮ್ಹಾರಾಂಕ್ ಆನಿ ಕೊರ್ಗಾರಾಂಕ್ ಉಶ್ಟೆಂ ಖಾಂವ್ಕ್ ಮಾತ್ರ್ ಯೋಗ್ಯ್ ಮ್ಹಣೊನ್ ಲೆಕ್ಚೆ ದೀಸ್ ಆಸ್‌ಲ್ಲೆ, ಆತಾಂಯ್ ಆಸಾತ್. ಹ್ಯಾ ಎಕಾ ಘೋರ್ ಚಿಂತ್ಪಾಕ್‌ಚ್ ಕುರಾಡಿನ್ ಕಾತ್ರುಂಚೆಂ ಬಳ್ವಂತ್ ಕಾಮ್ ಹೆ ಕವಿತೆನ್ ಹಾಂಗಾಸರ್ ಕೆಲ್ಲೆಂ ದಿಸ್ತಾ.
ಮಾಗೀರ್ ಬ್ರಾಹ್ಮಣ್ ಸಯ್ತ್ ಕಶೆ ಉಶ್ಟ್ಯಾಂತ್ ಜಿಯೆತಾತ್ ಮ್ಹಳ್ಳೆಂ ಹಿ ಕವಿತಾ ಸಾಂಗ್ತಾನಾ ಕವಿ ನಾರದಾಕ್‌ಯ್ ಮಧೆಂ ಹಾಡ್ತಾ. ಕೊಚ್ಚಿನ್‌ಚಿ ಕೊಂಕಣಿ ಮೋಡ್ ಕವಿತಾ ಕುಳಾರಾಂತ್ ಪಯ್ಲೆ ಪಾವ್ಟಿಂ ಆಮಿ ತುಮ್ಕಾಂ ದಿಲ್ಯಾ. ಕೊಚ್ಚಿನಾಂತ್ ಕಾಂಯ್ ಬರೆ ಕವಿ ಆಸಾತ್. ಫುಡಾರಾಂತ್ ಎಕೆಕ್ಲ್ಯಾಚಿ ವೊಳಕ್ ಆಮಿ ತುಮ್ಕಾಂ ಕರುನ್ ದಿತಲ್ಯಾಂವ್.
ಪಿ.ಜಿ.ಕಾಮತ್ ಪಾಲಿ, ಪ್ರಾಕೃತ್, ಅಪಭೃಂಶ್. ಸಂಸ್ಕೃತ್, ಹಿಂದಿ, ಇಂಗ್ಲಿಷ್ -ಅಶೆಂ ಜಾಯ್ತ್ಯಾ ಭಾಶೆಂಚೊ ವಿಧ್ವಾನ್. ಶಿಕ್ಷಣ್ ಶೆತಾಂತ್ ತಾಣೆ ಜಾಯ್ತಿಂ ನವಲಾಂ ಕೆಲ್ಯಾಂತ್. ಕೇರಳ ಕೊಂಕಣಿ ಅಕಾಡೆಮಿಚೊ ಅಧ್ಯಕ್ಷ್ ಜಾವ್ನ್‌ಯ್ ವಾವ್ರ್ ಭೆಟಯಿಲ್ಲ್ಯಾ ತಾಚೆಂ 'ಪವ್ಳಿಂ' ಕವಿತಾ ಪುಸ್ತಕ್ ಪರ್ಗಟ್ ಜಾಲಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಉಶ್ಟಿ ಪರಂಪರಾ
ಉಶ್ಟೆಂ ಖಾ ಉಶ್ಟೆಂ ಖಾ
ಸ್ವಾಮ್ಯಾಚೆಂ ಉಶ್ಟೆಂ ಖಾ
ಉಶ್ಟೆಂ ಖಾವ್ನ್ ಶ್ರೇಷ್ಟ್ ಜಾ
ಉಶ್ಟೆಂ ಖಾವ್ನ್ ಶುದ್ಧ್ ಜಾ
ಉಶ್ಟೆಂ ಖಾವುಂ ಶಿಷ್ಯ್
ಗುರುಲೆಂ ಉಶ್ಟೆಂ ಖಾವುಂ
ವೇದ್-ಶಾಸ್ತ್ರ್ ಮ್ಹಣ್ತಾ ಕಿತೆಂ?
ಗುರೋರುಚ್ಛಿಷ್ಟ್ ಭೋಜನಮ್
ಉಶ್ಟೆಂ ವಾಂಟಾತ್ ಸಗ್ಳ್ಯಾಂಕ್
ಘೆವೊತ್ ಸಗ್ಳೆ ಭಕ್ತಿನ್
ಖಾವೊತ್ ಸಗ್ಳೆ ರುಚಿನ್
ಖೋಶೆನ್ ಆನಿ ತೃಪ್ತೀನ್
ಉಶ್ಟೆಂ ಖೆಲೆಂ ನಾರದಾನ್
ಜಾಲೊ ತೊ ಮ್ಹಾಮುನಿ
ಉಶ್ಟೆಂ ಖಾವ್ನ್ ಸಡಳ್ ಜಾಲೊ
ತಾಳೊ ತಾಚೊ ಗೋಡ್
ಆಯೆನ್ ಖೆಲೆಂ 'ಆಜ್ಜಾಲೆಂ'
ಅಮ್ಮಾನ್ ಖೆಲೆಂ 'ಬಾಪ್ಪಾಲೆಂ'
ಬಾಯ್ಲೆನ್ ಖೆಲೆಂ 'ಮೆಗೆಲೆಂ'
ಸುನ್ ಖಾವುಂ 'ಪುತಾಲೆಂ'
ಹಿ ಆಮ್ಚಿ ಪರಂಪರಾ
ಉಶ್ಟ್ಯಾಂಚಿ ಪರಂಪರಾ
ಚಲಾ ಮುಕಾರ್, ವ್ಹರಾ ಮುಕಾರ್
ಹಿ ಸನಾತನ್ ಪರಂಪರಾ
ಅಳ್ಶಿಕ್ ನಾ ಗಾ ತುಮ್ಕಾಂ?
ಉಶ್ಟೆಂ ಖಾವುಂಚೆ ಮನೀಸ್ ತುಮಿ?
ಕಸಲೆ ಬ್ರಾಹ್ಮಣ್ ಗಾ ತುಮಿ?
ನರಕಾಂತ್ ಚಲುನ್ ಆಯ್ಲ್ಯಾತ್
ಮಾನ್ ಕಿತ್ಯಾ ಬಾಗಾಯ್ತಾ?
ಲಜ್ ಕಾಂಯ್ ದಿಸ್ತಾ ತುಕಾ?
'ಆಮಿ ಶ್ರೇಷ್ಟ್ ಬಿರಾಮಣ್ ಗಾ
ತುಂ ಕೋಣ್ ಆಮ್ಕಾಂ ಶಿಕಯ್ತಾ?'
-ಪಿ.ಜಿ. ಕಾಮತ್