ಸಂಪಾದಕೀಯ್:
ಬಾರ್ಕುರ್‍ಚ್ಯಾ ಕವಿತಾ ಬೆಳ್ಯಾಕ್ ಆತಾಂ ಭಾಂಗರ್ ಮೋಲ್
ಗರಿಯೆಕ್ ಗೆಲ್ಲೋಯ್ ಪೊಟ್ ಭರ್‍ತಾ ಆನಿ ನವ್ಕರಿ ಕರ್‍ಚೋಯ್ ಪೊಟ್ ಭರ್‍ತಾ. ಶೆವೊಟ್ ಏಕ್‌ಚ್ - ಪೊಟಾಚಿ ಭುಕ್ ಥಾಂಬಂವ್ಚೊ. ಪುಣ್ ಹ್ಯೊ ದೋನ್‌ಯ್ ವಾಟೊ ವೆಗ್ಳ್ಯೊ ವೆಗ್ಳ್ಯೊ. ಗರಿಯೆಕ್ ಕೊರ್‍ವೊ ಮೆಳೊಂಕ್ ವಾಪರ್‍ಚೆ ವಾಟೆರ್ ಕೊಣಾಯ್ಚಿಂ ಮನಾಂ ಕುಸ್ಕನಾಂತ್. ನವ್ಕರಿಚ್ಯಾ ಪೊಂತಾರ್ ಪಾಗಾಚೊ ಶೆಕ್ ಲಾಬಜೆ ಜಾಲ್ಯಾರ್ ಧಾ ಜಣಾಂಚ್ಯಾ ಕಾಳ್ಜಾಂಚೆರ್ ದಾಂತ್ಯಾಫಾತರ್ ದವರಿಜಾಯ್ ಪಡ್ತಾ. ಅಸಲ್ಯಾ ಎಕಾ ಚಿಂತ್ಪಾಂತ್ ಹಿ ಕವಿತಾ ಶಿಜ್ಲ್ಯಾ.
ಆಂಟನಿ ಬಾರ್ಕುರ್ ಮ್ಹಾಕಾ ದಿಸ್ತಾ, ನವ್ಯಾನ್ ಬರಂವ್ಕ್ ಸುರು ಕೆಲ್ಲ್ಯಾ ಕವಿಂ ಪಯ್ಕಿ ಶೀದಾ ಅಂತ್ರಳಾಚಿ ಪದ್ವಿ ಆಪ್ಣಾಯಿಲ್ಲೊ ಕವಿ. ತಾಚ್ಯಾ ಚಿಂತ್ಪಾಚಿ ಧಾರ್, ಉತ್ರಾಂಚಿ ಸಕತ್, ಸಂಗೀತಾಚಿ ತಾಂಕ್ ಆನಿ ಮಾಗೀರ್ ಹೆಂ ಸಗ್ಳೆಂ ಸಾಂಗಾತಾ ಮೊಳುನ್ ಕವಿತೆರುಪಿಂ ಮಾಂಡುನ್ ಹಾಡ್ಚಿ ತಿ ಕಲಾ - ತೇಂಯ್ ಹ್ಯಾ ಫುಡ್ಲದ್ ಪಾವ್ಲಾಂನಿ ದೆಖ್ತಾನಾ ಹಾಂವ್ ವಿಜ್ಮಿತ್ ಪಾವ್ತಾಂ.
ಅಸಲಿ ತಾಂಕ್ ಭೋವ್ ಥೊಡ್ಯಾಂ ಥಂಯ್ ಆಸ್ತಾ. ಆಂಟನಿ ಥಂಯ್ ಆಸಾ. ಆತಾತಾಂ ಬಾರ್ಕುರ್ ಥಾವ್ನ್ ಕವಿತ್ವಾಚೆಂ ಬೆಳೆಂ ಜೆಂ ಆಮ್ಕಾಂ ಮೆಳೊಂಕ್ ಲಾಗ್ಲಾಂ, ತಾಕಾ ಭಾಂಗರ್ ಮೋಲ್. ಹ್ಯಾ ವಾವ್ರಾಂತ್ ಯೆದೊಳ್ ಕಿಶೂ, ಎರಿಕ್, ಪಿಯುಸ್ ಆಸ್‌ಲ್ಲೆ. ಆತಾಂ ಆಂಟನಿ ಮೆಳ್ಳಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಗರಿ ಆನಿ ನವ್ಕರಿ
ಬಾರೀಕ್ ಚ್ಯಾರ್ ಸುಂಗ್ಟಾಂ ಧರುನ್
ಗರಿ ಸಿಶೆಂ ಮೊಕ್ಕೆರಿ ಘೆವುನ್
ಘರಾ ನಿಸ್ತ್ಯಾಕ್ ಮಾಸ್ಳಿ ಧರುಂಕ್ ನಂಯ್ಕ್ ವೆತಾಲೊಂ
ಖರ್ ಸುಕ್ತಿ ಆಯಿಲ್ಲಿ ಪಳೆವ್ನ್
ಭರ್‍ತಿ ಯೆಂವ್ಚೊ ವೇಳ್ ರಾಕುನ್
ಸರ್‍ಸರಿತ್ ಜೆವ್ಯಾಂ ಮ್ಹಣೊನ್ ಮಾಸ್ಳಿ ಪಾಗ್ತಾಲೊಂ
ಎರೆ ಮೆಳ್ಳ್ಯಾರ್ ಶೆತ್ಕಾಂ ಧರುನ್
ಘೂರ್ ಧರುಂಕ್ ದೆಂಕ್ಳೆ ಗುಂತುನ್
ಬರೋ ಮಾಣ್ಕೊ ಆಟ್ಟ್ಯಾಕ್ ಶಿರ್ಕಾವ್ನ್ ಕುರ್ಲ್ಯೊ ಧರ್‍ತಾಲೊಂ
ಚಣೆ ಹಾಪೊಳ್ ಭಿಂಗ್ಟಾಂ ಚಾಬತ್
ಕೊಂಕ್ಣಿ ಪದಾಂ ಹಳೂ ಗಾಯೀತ್
ಕಾಣೆ, ಕಾಳ್ಶಿ, ಕೊಂತ್ಯೊ ಮ್ಹಣೊನ್ ಕೊಳ್ಸೊ ಭರ್‍ತಾಲೊಂ
ಚ್ಯಾರ್‌ಚ್ ಖೊರ್ವೊ ಭಾಜುಂಕ್ ದವರ್ನ್
ಉರ್‌ಲ್ಲ್ಯೊ ಶೆಜಾರಾ ಆಮಾಂಯ್ಕ್ ದಿವುನ್
ಬರೀ ಶಿತ್ ಕಡಿ ಕರುನ್ ಘಟ್ಟ್ ಜೆವ್ತಾಲೊಂ
ಸಾದ್ಯಾ ಮನಾನ್ ದೆವಾಕ್ ಹರ್ಸುನ್
ಮಾತ್ಯಾಕ್ ಲ್ಹಾನ್ ಉಶೆಂ ತೆಂಕುನ್
ನಿದೊನ್ ಬರೊ ವಿಶೆವ್ ಘೆಂವ್ಕ್ ತಯಾರ್ ಜಾತಾಲೊಂ
ಮತಿಂತ್ ಹಜಾರ್ ಇರಾದೆ ಭರುನ್
ಚಿಂತ್ನಾಂ ಕುಸ್ಕಟ್ ಕಾಳ್ಜಾಂತ್ ಧರುನ್
ನಿತಳ್ ನಿರ್ಮಳ್ ನ್ಹೆಸಪ್ ನ್ಹೆಸುನ್ ದಫ್ತರಾಕ್ ವೆತಾಂ
ಸತಾನ್ ಮೆಳ್ಚ್ಯಾ ಗಿರಾಯ್ಕಾಂಕ್ ನಾಗುಂಕ್
ಕಿತೆಂಯ್ ಕರುನ್ ನಾಂವ್ ಜೊಡುಂಕ್
ರಾತ್ ದೀಸ್ ಥರಾವಳ್ ಆವ್ತಾರ್ ಹಾಂವ್ ಕರ್ತಾಂ
ಚುಕೊನ್ ಪಡ್ಚ್ಯಾ ಇಷ್ಟಾಂಕ್ ಚೆಂಚುಂಕ್
ವಿಕುಂಕ್ ವಿಕುಂಕ್ ವಿಕುಂಕ್ ವಿಕುಂಕ್
ಭಿಕಾರ್ಪಣಾಚಿ ನವ್ಕರಿ ರಾಕುಂಕ್ ಆವ್ಕಾಸ್ ಸೊಧ್ತಾಂ
ಮ್ಹಾಕಾಚ್ ಆನಿಕೀ ಗಿರೇಸ್ತ್ ಕರುನ್
ಮುಖಮಳಾರ್ ಫಟ್ಕಿರೆಂ ಹಾಸುನ್
ಸುಖಾಳ್ ಜಿಣಿ ಜಿಯೆತಾಂ ಮ್ಹಣ್ ಕಲ್ಪನಾಂ ಬಾಂದ್ತಾಂ
ಪೆಲ್ಯಾಚ್ಯಾ ಕಾಮಾಚಿ ಶಾಭಾಸ್ಕಿ ಚೊರುಂಕ್
ಫಾಲ್ಯಾಂಚ್ಯಾ ಕಾಮಾಚಿ ವರ್ದಿ ಬರಂವ್ಕ್
ಕುಲೊ ಕುಸ್ತಾವರೇಗ್ ಬಸೊನ್ ತಕ್ಲಿ ಆಟಯ್ತಾಂ
ಜೊಡ್‌ಲ್ಲೆಂ ದಿರ್ವೆಂ ಪುಂಜಾವ್ಕ್ ಸೊಡುನ್
ಬಿಡಾರ್ ಭುರ್ಗ್ಯಾಂಚೊ ಸಾಂಗಾತ್ ಹೊಗ್ಡಾವ್ನ್
ಫುಡಾರ್ ಸುಖಿ ಕರ್ತಾಂ ಮ್ಹಣೊನ್ ಮ್ಹಾಕಾಚ್ ಫಟಯ್ತಾಂ
-ಆಂಟನಿ, ಬಾರ್ಕುರ್