ಸಂಪಾದಕೀಯ್:
ಮೊಂತಿಚ್ಯಾ ಫೆಸ್ತಾಂತ್ ಕುಟ್ಮಾಚ್ಯಾ ಎಕ್ತಾರಾಚೆ ಗಾಂಚ್ ಬಳ್ವಂತ್ ಜಾಂವ್ದಿತ್!
ಕ್ರಿಸ್ತಾಂವ್ ಧರ್ಮ್ ಸಗ್ಳ್ಯಾ ಎಕಾ ವರ್ಸಾಂತ್ ಫಕತ್ ತೀನ್ ಬಡ್ಡೆ ಆಚರ್‍ಶಿತಾ. ಪಯ್ಲೊ ಬಡ್ಡೆ ದಶೆಂಬರ್ ಪಂಚ್ವೀಸ್ ತಾರಿಕೆರ್ - ಜೆಜು ಸ್ವಾಮಿಚೊ. ದುಸ್ರೊ ಬಡ್ಡೆ ಜ್ಯೂನ್ ಚೊವೀಸ್ ತಾರಿಕೆರ್ - ಜುವಾಂವ್ ಬಾವ್ತಿಸಾಚೊ ಆನಿ ತಿಸ್ರೊ ಬಡ್ಡೆ ಸಪ್ಟೆಂಬರ್ ಆಟ್ ತಾರಿಕೆರ್ - ಮೇರಿ ಮಾಯೆಚೊ. ಮೇರಿ ಮಾಯ್ ಸಪ್ಟೆಂಬರ್ ಆಟ್ ತಾರಿಕೆರ್ ಜಲ್ಮಲ್ಲಿ ಮ್ಹಣ್ಚ್ಯಾಕ್ ಖಂಯ್ಚ್ಯಾಯ್ ಧರ್ಮಿಕ್ ದಸ್ತಾವೆಜಾಂನಿ ಗೊವಾಯೊ ಮೆಳನಾಂತ್.
ಮೇರಿ ಮಾಯೆಚಿಂ ಆವಯ್ ಬಾಪಯ್ ಜೊಕಿಮ್ ಆನಿ ಸಾಂತಾನ್. ತಾಂಕಾಂ ಸಭಾರ್ ಕಾಳ್ ಭುರ್ಗಿಂ ನಾತ್‌ಲ್ಲಿಂ. ಆನ್ನಾಬಾಯ್ ಗುರ್ವಾರ್ ಜಾಂವ್ಚ್ಯಾ ಪಯ್ಲೆಂ ತಾಂಕಾಂ ಎಕ್ಲೊ ದೇವ್‌ದೂತ್ ದಿಷ್ಟಿಕ್ ಪಡ್ತಾ. ಹ್ಯಾ ದೇವ್‌ದುತಾಲಾಗಿಂ- ಜರೀ ತಾಂಕಾಂ ಭುರ್ಗಿಂ ಜಾಲಿಂ ತರ್ ತೆಂಪ್ಲಾಂತ್ ಚಾಕ್ರಿ ಕರುಂಕ್ ಧಾಡ್ತಲ್ಯಾಂವ್ ಮ್ಹಣೊನ್ ತಿಂ ಭಾಸಾವ್ಣಿ ಕರ್‍ತಾತ್. ಹ್ಯಾಪರ್ಮಾಣೆ ಜಲ್ಮೊನ್ ತೀನ್ ವರ್ಸಾಂನಿ ತಿ ಜುದೆವಾಂಚ್ಯಾ ತೆಂಪ್ಲಾಕ್ ವೆತಾ, ಸಂಸಾರಿಸುಕಾಚ್ಯಾ ತ್ಯಾಗಾಚಿ ಆಂಗವ್ಣ್ ಕರ್‍ತಾ, ಜುದೆವಾಂಚೆ ಸಂಪ್ರದಾಯ್ ಜಿವಿತಾಂತ್ ಪಾಳ್ತಾ ಆನಿ ಉಪಾಸ್ ಆಧಾರುನ್ ಉರಯಿಲ್ಲೆಂ ಜೆವಣ್ ದುಬ್ಳ್ಯಾಂಕ್ ದಿತಾ.
ಚಡುಣೆ ಪಾಂಚ್ವ್ಯಾ ಶೆಕ್ಡ್ಯಾಂತ್ ಜೆರುಸಲೆಮಾಂತ್ ಬೆತ್ಸಾಯ್ದಾ ತಳ್ಯಾಲಾಗಿಂ ಮೇರಿಮಾಯೆಚ್ಯಾ ಮಾನಾಕ್ ಏಕ್ ತೇಂಪ್ಲ್ ಉಬಾರ್‌ಲ್ಲೆಂ ಮ್ಹಣೊನ್ ಸಾಂಗ್ತಾತ್. ಹಾಂಗಾಸರ್ ತಿಚೊ ಜಾಲ್ಲೊದೀಸ್ ಆಚರ್‍ಶಿತಾಲೆ. ಮಾಗೀರ್ ಆಟ್ವ್ಯಾ ಶೆಕ್ಡ್ಯಾಂತ್ ಹೆ ಫೆಸ್ತ್ ರೊಮಾಗಾರಾಂ ಮಧೇಂಯ್ ಆಯ್ಲೆಂ. ಹೆಂ ಫೆಸ್ತ್ ಆಮ್ಚ್ಯಾ ಗಾಂವಾಂತ್ ಕಶೆಂ ಆಸಾ, ಹ್ಯಾ ಫೆಸ್ತಾ ಪಾಟ್ಲ್ಯಾನ್ ಕುಟ್ಮಾಚ್ಯಾ ಎಕ್ತಾರಾಚೊ ಸಂಕೇತ್ ಆಟಾಪ್ಲಾ ಮ್ಹಳ್ಳೆವಿಶಿಂ ಕವಿನ್ ಸೊಂಪ್ಯಾ ಉತ್ರಾಂನಿ ಹಿ ಕವಿತಾ ವಿಣ್ಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಮ್ಕಾಂ ತಿ ಮೊಂತಿ ಸಾಯ್ಬಿಣ್
ಆಮೆರಿಕಾಕ್
ಇಂಗ್ಲೆಂಡಾಕ್
ಸಗ್ಳ್ಯಾ ಹ್ಯಾ
ಸಂಸಾರಾಕ್
ತಿ ಜಾವ್ನಾಸಾ
ಆಂಕ್ವಾರ್ ಸಾಯ್ಬಿಣ್
ಫ್ರಾನ್ಸಾಕ್ ತಿ
ಲೂರ್ಡ್ಸ್ ಸಾಯ್ಬಿಣ್
ಪೊರ್ಚುಗಲಾಕ್
ಫಾತಿಮಾ ಸಾಯ್ಬಿಣ್
ಪೊಂಪೈ ಗಾಂವ್ಚ್ಯಾಂಕ್
ಪೊಂಪೈ ಸಾಯ್ಬಿಣ್
ಪರ್‍ನ್ಯಾ ಕಮ್ಯುನಿಸ್ತ್ ಗಾಂವಾಂಕ್
ಭರ್‍ವಶ್ಯಾಚಿ ಕಾಳಿ ಸಾಯ್ಬಿಣ್
ಆಮ್ಕಾಂ ಮಾತ್ರ್
ಸಗ್ಳ್ಯಾ ಸಂಸಾರಾರ್
ಶಿಂಪಡ್ಲಲ್ಯಾ
ಕೆನರಾ ಕೊಂಕ್ಣಿ
ಕಥೊಲಿಕಾಂಕ್
ಸಕ್ಕಡ್ ಸಾಂಗಾತಾ
ಮೆಳೊನ್
ಫುಲಾಂ ಉಡಂವ್ಚಿ
ಕೊಬು ವಾಂಟ್ಚಿ
ನವೆಂ ಜೆಂವ್ಚಿ
ವ್ಹಡಾ ಮೊಗಾಚಿ
ಮೊಂತಿ ಸಾಯ್ಬಿಣ್!
-ವಲ್ಲಿ ವಗ್ಗ