ಸಂಪಾದಕೀಯ್
ತೆಲಾಚ್ಯಾ ಮಾಲಿಶಾ ಪಾಟ್ಲೆಂ ಮೊನೆಪಣ್ ಕಿತೆಂ ಸಾಂಗ್ತಾ?
ಹೊ `ತೆಲಾಚೊ ವೆಪಾರ್' ಮನ್ಶಾಕುಳಾಚೆ ಸುರ್‍ವಾತೆಥಾವ್ನ್ ಆಸಾ. ತೆಲಾಂತ್ ಕೇಸ್ ಬುಡವ್ನ್ ಪಾಯಾಂಚೆಂ ಮಾಲಿಶ್ ಕರ್‍ತಾನಾ ಕೊಣಾಚೆ ವೋಂಟ್ ಕೊಣಾಚ್ಯಾ ತೊಂಡಾರ್ ಜಿರ್‍ತಾತ್, ಕೊಣಾಚೆ ವೆಂಗೆಂತ್ ಸಂಸಾರ್ ಹಾರ್‍ತಾತ್, ವಸ್ತುರ್ ಚಿರೊನ್ ವೆತಾ ಆನಿ ಮಾಸ್ ಖಿರೊನ್ ವೆತಾನಾ, ಎಕಾ ಖಿಣಾಕ್ ತರೀ ಸರ್ಗಾ ಮುಕಾರ್ ಹೊ ಸೈತಾನ್ ಜಿಕ್ತಾ.
ಹೆ ಗಜಾಲಿಂನಿ ಸತ್ ಆಸಾ. ಫಟ್ ನಾ. ಸತ್ ತಶೆಂ ಆಸೊನ್‌ಯ್ ಮಾಗ್ದಲೆನಾನ್ ಜೆಜುಚ್ಯಾ ತರ್ನ್ಯಾ ಪಾಂವ್ಯಾಂಕ್ ಆಪ್ಲ್ಯಾ ಕೆಸಾಂನಿ ಮಾಲಿಶ್ ಕರ್‍ತಾನಾ, ತಾಚೆಂ ಮನ್ಶಾ ಸೈಂಭ್ ಕಶೆಂ ಮೊನೆಂ ರಾವ್ಲೆಂ ಮ್ಹಣೊನ್ ಕವಿತೆಂತ್ಲೊ ನಾಯಕ್ ವಿಚಾರ್‍ತಾ. ನೊವೊದಾಂಚೊ ಮ್ಹಾತಾರೊ ಸಯ್ತ್ ಹ್ಯಾ ತೆಲಾಚ್ಯಾ ಮಾಲಿಶಾಕ್ ಆತುರಾಯೆನ್ ಜೀವ್ ಸೊಡ್ತಾನಾ, ಜೆಜುಚೆಂ ಮೊನೆಪಣ್ ಹಾಂಗಾ ಸವಾಲಾಂಚೆಂ ಜಾತಾ.
ಹಿ ಕವಿತಾ ಬರವ್ನ್ ಚಡುಣೆಂ ಧಾ ವರ್ಸಾಂ ಜಾತಾತ್. `ವಾಟ್' ಪುಸ್ತಕಾಂತ್ ಪರ್ಗಟ್ ಜಾಲ್ಲಿ ಹಿ ಕವಿತಾ, ಆಯ್ಲೆವಾರ್ ಮ್ಹಜ್ಯಾ ಇಷ್ಟಾಂನಿ ವಾಚುನ್ ಘಂಟೊಭರ್ ತಾಚೊ ನಿಯಾಳ್ ಕೆಲ್ಲಿ ಖಬರ್ ಕಳ್ತಾನಾ, ಹಾಂಗಾಸರ್ ತಿ ಪರ್ಗಟ್ ಕರ್‍ಯಾಂ ಮ್ಹಳ್ಳೆಂ ಮನ್ ಜಾಲೆಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತೆಲಾಚೊ ವೆಪಾರ್
ತೆಲಾಂತ್ ತುಂವೆಂ ಕೇಸ್ ಭಿಜವ್ನ್
ಪಾಂವೆ ಮ್ಹಜೆ ಮಾಖ್ಲೆ
ಯೆಮ್ಕೊಂಡಾಂತ್ಲೆ ಸೈತಾನ್ ಸಯ್ತ್
ಖಿಣಾನ್ ಸರ್ಗಾಕ್ ಜಿಕ್ಲೆ
ಕೇಸ್ ಪಾಂವ್ಯಾರ್ ಲೊಳ್ಳೆ ಆನಿ
ತೇಲ್ ಕಾತಿರ್ ಚರ್‍ಲೆಂ
ಕುಲ್ಕುಲ್ಯಾಂಚ್ಯಾ ಲ್ಹಾರಾನ್ ಲ್ಹಾರಾಂಕ್
ಕಾಳೀಜ್ ಮ್ಹಜೆಂ ಫಿರ್‍ಲೆಂ
ದೊಳೆ ದೊಳ್ಯಾಂತ್ ಇರ್‍ಲೆ
ವೋಂಟ್ ತೊಂಡಾರ್ ಜಿರ್‍ಲೆ
ಮ್ಹಜೆ ಕುಸ್ಕುಟ್ ವೆಂಗೆಭಿತರ್
ಸಾಸ್ ಸಂಸಾರ್ ಹಾರ್‍ಲೆ
ವಿಸ್ತಿದ್ ಲಜೆನ್ ಚಿರ್‍ಲೆಂ
ಮಾಸ್ ರಗ್ತಾಂತ್ ಖಿರ್‍ಲೆಂ
ವೊಂಟ್ಯೆಂತ್ ಎಕೆ ಖಬ್ರೆವಿಣೆಂ
ದುದಾಳ್ ದೂದ್ ಭರ್‍ಲೆಂ
ಅಶೆಂಚ್ ಮಿಸ್ತಾ ಜೆಜುಕ್ ಆಮ್ಚ್ಯಾ
ಮಾಲಿಶ್ ತುಂವೆಂ ಕೆಲ್ಲೆಂ
ಉಪ್ಕಾರಾಂಚ್ಯಾ ರಿಣಾಂತ್ ಬುಡೊನ್
ವಾಡಿಕ್ ತಾಕಾ ಧುಲ್ಲೆಂ
ಹಾಂವ್ ನೆಣಾ ತೊ ಬಾವ್ಡೊ
ಮೊನೊ ಕಸೊ ರಾವ್ಲೊ
ನೊವೊದಾಂಚೊ ಶೆಜಾರಿ ಆತ್ತಾಂ
ತೇಲ್ ಹಾಡುಂಕ್ ಧಾಂವ್ಲೊ!
-ಮೆಲ್ವಿನ್ ರೊಡ್ರಿಗಸ್