ಸಂಪಾದಕೀಯ್:
ಇತಿಹಾಸಾಂತ್ ಹಿಂ ರಗ್ತಾಂ ಜಿವಿಂ ಉರ್ತಲಿಂ
ಜಂತರ್ ಮಂತರ್ ಪ್ರತಿಭಟನಾಂತ್ ಜೆಂ 2026 ಜುಲಾಯ್ 20 ಥಾವ್ನ್ 22 ತಾರಿಕೆ ಪಾಸುನ್ ಘಡ್ಲಾಂ ತೆಂ ಭಿರಾಂಕೂಳ್ ಚಿತ್ರಣ್ ಕಾಂಯ್ ಥೊಡ್ಯಾ ಉತ್ರಾಂನಿ ಫಿಚಾರ್ ಕರ್ಚೆಂ ಪ್ರೇತನ್ ಕಿಶೂ ಬಾರ್ಕೂರಾನ್ ಹೆ ಕವಿತೆಂತ್ ಕೆಲಾಂ. ಇತಿಹಾಸ್ ಜೆನ್ನಾಂ ಹ್ಯೆ ಪ್ರತಿಭಟನಾವಿಶಿಂ ಉಲಯ್ತಲೊ, ತೆನ್ನಾಂ ಕೊಂಕಣಿ ತರ್ಫೆನ್ ಹಿ ಕವಿತಾಯ್ ಉಬಿ ಜಾತಲಿ.
ಖರ್ಯಾನ್ ಮ್ಹಾಕಾ ಸಾಂಗುಂಕ್ ಜಾಯ್, ಜುಲಾಯ್ 19 ತಾರಿಕೆರ್ ಮ್ಹಜ್ಯಾ ಎಕಾ ಇಶ್ಟಾಕ್ ಮರಣ್ ಆಯ್ಲೆಂ. ಮ್ಹಾಕಾ ದೂಖ್ ಭೊಗ್ಲಿ ಜಾಲ್ಯಾರೀ ದೂಕ್ ದೆಂವ್ಲೆಂನಾ. ಪುಣ್ ಜುಲಾಯ್ 20 ತಾರಿಕೆರ್ ಸೋಶಿಯಲ್ ಮೀಡಿಯಾಚೆರ್ ಜಿಂ ಚಿತ್ರಾಂ ಹಾಂವೆಂ ಪಳೆಲಿಂ, ತಿಂ ಪಳೆವ್ನ್ ಮ್ಹಜ್ಯಾ ದೊಳ್ಯಾಂತ್ಲ್ಯಾನ್ ದುಕಾಂ ದೆಂವ್ಲಿಂ. ದೇಶಾ ಖಾತೀರ್ ಹಾಂವ್ ರಡಲ್ಲೊಂ ಜಿವಿತಾಂತ್ ಪಯ್ಲೆ ಪಾವ್ಟಿಂ. ಹ್ಯಾ ಮ್ಹಜ್ಯಾ ದುಕಾಂಕ್ ಸಾಂಗಾತ್ ದಿಲ್ಲಿ - ಫಾಂತ್ಯಾ ಉಪ್ರಾಂತ್ಲಿ ಸಕಾಳ್, ಮೋವ್ ಸುರ್ಯಾಚಿಂ ಕಿರ್ಣಾಂ, ತವಳಚ್ ಯೇವ್ನ್ ಗೆಲ್ಲ್ಯಾ ಪಾವ್ಸಾಉಪ್ರಾಂತ್ಲೆಂ ಶೀತಳ್ ವಾರೆಂ - ಹಾಕಾ ಗೊವಾಯ್ ಆಸಾತ್.
ಕಿಶೂ ಬಾರ್ಕೂರಾನ್ ಆಬುಧಾಬಿ ಆಸುನ್ ಹಿ ಕವಿತಾ ಬರಯ್ಲ್ಯಾ. ಮ್ಹಜಿ ಅಸ್ವಸ್ತಕಾಯ್ ಮ್ಹಾಕಾ ಬರೊಂವ್ಕ್ ಸೊಡಿನಾ. ತುಮ್ಕಾಂ ಜಾಲೆಂ ತರ್ ಆನಿ ತುಮಿ ಜರ್ಲ್ಯಾಂಚೆಂ ಮಾಗ್ಣೆಂ ಮಾಂದುನ್ ಘೆತಾತ್ ತರ್, ಬರಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಫಾತ್ರಾವಯ್ಲಿಂ ರಗ್ತಾಂ
ಜಂತರ್ ಮಂತರ್ ಆಪ್ಲೆಂ ಪೊರ್ನೆಂ ತೊಂಡ್ ಘುಂವ್ಡಾಯ್ತಾ,
ಮೆಜುನ್ ಮೊನ್ಯಾ ನಕ್ತಿರಾಂಕ್,
ತರ್ನೆ ಫುಡಾರ್ ಪಾವ್ಸಾಂತ್ ಕಡುನ್ ವೆತಾನಾ,
ತಿಂತಾಂಬರಿಂ.
ತೆ ಆಯ್ಲೆ-
ಪರ್ಜಳ್ತ್ಯಾ ದೊಳ್ಯಾಂಚೆ ತರ್ನಾಟೆ,
ಆಜೂನೀ ವ್ಹಾವುನ್ ವೊಜಿಂ,
ಅಧುರ್ಯಾ ಸ್ವಪ್ಣಾಂಚಿಂ-
ಲ್ಹಾನ್, ಪುಣ್ ಥಕನಾಸ್ಲೆ,
ಸಾಂಗಾತಾ ಹಜ್ರಾಂನಿ .
ಚೆಂಚಾಂವ್ಕ್ ಕೆಲ್ಲ್ಯಾ ಹರ್
ಯತ್ನಾಂತುನ್ ಚುಕೊವ್ನ್ ಘೆಂವ್ಚೆ,
ಜರ್ಲ್ಯಾಂಬರಿಂ.
ವೆವಸ್ಥಾ ಕಾಂಪ್ತಾ.
ಯುನಿಫೊರ್ಮಾಚ್ಯೊ ಸಾವ್ಳ್ಯೊ ದೆಂವ್ತಾತ್.
ಬೆತಾಂ ನಾಜೂಕ್ ಪಾಟಿಂಚೆರ್ ನಾಚ್ತಾತ್.
ಕಾಂಪ್ತ್ಯಾ ತಾಳ್ಯಾಂಚೆರ್ ಕೊಡು ಮೊಡಾಂ ಉಟ್ತಾತ್.
ಹಾಡಾಂ ಮೊಡ್ತಾತ್.
ರಡ್ಣ್ಯಾಂಕ್ ಸಾಂಜೆಚಿ ಧುಳ್ ಗಿಳ್ತಾ.
ರಾಯ್ಪಾಟ್ ದೊರ್ಯಾಂ ಪಾಟ್ಲ್ಯಾನಚ್ ಉರ್ತಾ
ಹಳ್ತಾರ್ ಜಾಂಬೆವ್ನ್, ಹುಕುಮ್ ದಿತಾ,
ಫಾಲ್ಯಾಂಕ್ ಆವಾಜ್ ನಾಸ್ತಾಂ ಲಿಲಾಂವ್ ಘಾಲ್ತಾ.
ತಾಣಿಂ ಚೆಂಚಲ್ಲೆಂ ಚುಕಿದಾರಾಂಕ್ ನ್ಹಯ್,
ಪುಣ್ ಭರ್ವಸ್ಲಲ್ಯಾಂಕ್-
ತುಟಲ್ಲ್ಯಾ ಖೆಳಾಂತ್
ಸವಾಲಾಂ ವಿಚಾರ್ಚೆಂ ಧಯ್ರ್ ಕೆಲ್ಲ್ಯಾಂಕ್.
ಪೂಣ್ ದರೇಕ್ ಮಾರ್
ತಾಂಕಾಂ ಆನಿಕೀ ವಾಡಯ್ತಾ.
ಲ್ಹಾನ್.ನೆಣ್ತೆ. ಪುಣ್
ಚೆಂಚಾಂವ್ಕ್ ಜಾಯ್ನಾತಲ್ಲೆ.
ನೆಕೆತ್ರಾಂ ಚೊಯ್ತಾತ್ ಕಾಕುಳ್ತ್ ನಾಸ್ತಾಂ.
ಭುರ್ಗೆ ಪರತ್ ಉಟ್ತಾತ್-
ಆಂಗಾರ್ ದಾಧ್ಡಾಂ ಘೆವುನ್,
ಪುಣ್ ಸತಾಪಾಸುನ್ ಜಳುನ್.
ಇತಿಹಾಸ್ ಆಪ್ಲಿ ಧಾರ್ ಪಾಜ್ತಾ,
ತಾಂಚ್ಯಾ ಅಸ್ಕತ್ ಪುಣ್
ಥಕನಾಸ್ಚ್ಯಾ ಪಾಟಿಕಣ್ಯಾರ್.
-ಕಿಶೂ, ಬಾರ್ಕುರ್
संपादकीय:
इतीहासांत हीं रगतां जिवीं उरतलीं
जंतर मंतर प्रतीभटनांत जें 2026 जुलाय 20 थावन 22 तारके पासून घडलां तें भिरांकूळ चित्रण कांय थोड्या उतरांनी फिचार करचें प्रेतन किशू बार्कूरान हे कवितेंत केलां. इतीहास जेन्नां ह्ये प्रतिभटनाविशीं उलयतलो, तेन्नां कोंकणी तर्फेन ही कविताय उबी जातली.
खर्यान म्हाका सांगुंक जाय, जुलाय 19 तारकेर म्हज्या एका इश्टाक मरण आयलें. म्हाका दूख भोगली जाल्यारी दूक देंवलेंना. पूण जुलाय 20 तारकेर सोशियल मीडियाचेर जीं चित्रां हांवें पळेलीं, तीं पळेवन म्हज्या दोळ्यांतल्यान दुकां देंवलीं. देशा खातीर हांव रडल्लों जिवितांत पयले फावटीं. ह्या म्हज्या दुकांक सांगात दिल्ली - फांत्या उपरांतली सकाळ्, मोव सुर्याचीं किर्णां, तवळच येवन गेल्ल्या पावसा उपरांतलें शीतळ वारें - हाका गोवाय आसात.
किशू बार्कूरान आबुधाबी आसून ही कविता बरयल्या. म्हजी अस्वस्तकाय म्हाका बरोवंक सोडीना. तुमकां जालें तर आनी तुमी जरल्यांचें मागणें मांदून घेतात तर, बरया.
-मेल्विन रोड्रीगस
कविता:
फात्रावयलीं रगतां
जंतर मंतर आपलें पोरनें तोंड घुंवडायता,
मेजून मोन्या नक्तिरांक,
तरने फुडार पावसांत कडून वेताना,
तिंतांबरीं.
ते आयले-
पर्जळत्या दोळ्यांचे तरनाटे,
आजूनी व्हावून वोजीं,
अधुर्या स्वपणांचीं-
ल्हान, पूण थकनासले,
सांगाता हज्रांनी .
चेंचावंक केल्ल्या हर
यत्नांतून चुकोवन घेंवचे,
जरल्यांबरीं.
वेवस्था कांपता.
युनीफॉर्माच्यो सावळ्यो देंवतात.
बेतां नाजूक फाटींचेर नाचतात.
कांपत्या ताळ्यांचेर कोडू मोडां उटतात.
हाडां मोडतात.
रडण्यांक सांजेची धूळ गिळता.
रायपाट दोर्यां फाटल्यानंच उरता
हळतार जांबेवन, हुकूम दिता,
फाल्यांक आवाज नासतां लिलांव घालता.
ताणीं चेंचल्लें चुकीदारांक न्हय,
पूण भरवसलल्यांक-
तुटल्ल्या खेळांत
सवालां विचारचें धयर केल्ल्यांक.
पूण दरेक मार
तांकां आनिकी वाडयता.
ल्हान .नेणते. पूण
चेंचावंक जायनातल्ले.
नेकेत्रां चोयतात काकुळत नासतां.
भुरगे परत उटतात-
आंगार दाधडां घेवून,
पूण सतापासून जळून.
इतीहास आपली धार पाजता,
तांच्या अस्कत पुण
थकनासच्या फाटीकण्यार.
-किशू, बार्कूर