ಸಂಪಾದಕೀಯ್:
ಮೊನೆಪಣ್, ದೇಶಾಚೆ ಪಾಟಿರ್ ಚೀರ್ ಘಾಲ್ತಾ
ಪ್ರತಿಭಟನ್ - ಸಾರ್ವಜನಿಕಾಂಕ್ ಬರೆಪಣ್ ಆಶೆಂವ್ಚ್ಯಾಕ್ ಕಾರಣ್ ಜಾಲೆಂ ಜಾಲ್ಯಾರ್, ಸ್ವತಾಚ್ಯಾ ಅಂತಸ್ಕರ್ನಾಚಿ ತನ್ಖಿ ಚಲೊವ್ನ್, ಬರೆಪಣಾಚೆ ಫಾಯ್ದೆ ತಾಕ್ಡೆರ್ ತುಕುನ್, ತ್ಯಾ ಪ್ರತಿಭಟನಾಕ್ ಸಮರ್ಥನ್ ದಿಂವ್ಚೊ ಕಾಯ್ದೊ ಸಗ್ಳ್ಯಾಂಕ್ ಬಾಂದ್ತಾ. ಸ್ವತಾ ಪ್ರತಿಭಟನಾಂತ್ ವಾಂಟೆಲಿ ಜಾವ್ನ್, ಆಯ್ಚ್ಯಾ ಕಾಳಾರ್ ತರ್ ವೀಡಿಯೊ ರೀಲ್ಸ್ ಕರುನ್, ಕವಿಂನಿ ತರ್ ಕವಿತಾ ಬರೊವ್ನ್ - ಆಪಾಪ್ಲೆಂ ಸಮರ್ಥನ್ ದೀಂವ್ಕ್ ಜಾತಾ, ಜಶೆಂ ಕವಿ ಆಂಡ್ರ್ಯೂನ್ ಹಾಂಗಾಸರ್ ಕೆಲಾಂ.
ಪುಣ್ ಮೊನೆಪಣ್ ಸಾಂಬಾಳ್ಚೆಂ ಮಾರೆಕಾರ್ ಪಿಡೆಚೆಂ ಲಕ್ಷಣ್. ಅಸಲೆಂ ಮೊನೆಪಣ್ ವ್ಯಕ್ತಿಚ್ಯಾ ಪೊಳ್ಕುರ್ಪಣಾಕ್ ಸಾಕ್ಸ್ ದಿತಾ. ಕವಿಚ್ಯಾ ಉತ್ರಾಂನಿ ಸಾಂಗ್ಚೆಂ ತರ್ ಹ್ಯೊ ಮೊನೆಪಣಾಚ್ಯೊ ಲಾಠಿ ಭಾರತ್ ದೇಶಾಚೆ ಪಾಟಿರ್ ಚೀರ್ ಘಾಲುನ್ ಘಾಯ್ ಕರ್ತಾತ್.
ಮಾಗೀರ್ ತುಂ ಕಿತ್ಯಾಕ್ ವೊಗೊ?
- ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಘಾಯ್
ವಿದ್ಯಾರ್ಥಿಂಚ್ಯಾ ಪಾಟಿರ್
ಲಾಠಿಂಚ್ಯಾ ಮಾರಾಂಚೆ ಘಾಯ್
ಮ್ಹಜ್ಯಾ ಹಾತಾಚೆರ್
ಯುವ ರಗ್ತಾಚಿ ಸಾಯ್!
ಲಾಠಿ ಮಾರಲ್ಲೊ ಹಾತ್
ಮ್ಹಜೊ ನ್ಹಯ್
ಪುಣ್ ಮಾರುಂಕ್ ಬಳ್ ದಿಲ್ಲೆಂ
ತೆಂ ಬೊಟ್ ಮ್ಹಜೆಂಚ್ ಹಾಯ್!
ಆತಾಂ ಸವಾಲ್ ಆಸಾ
ಹಾಂವೆಂ ಕಿತೆಂ ಕೆಲೆಂ
ಹಾಂವ್ ಕಿತೆಂ ಕರ್ತಾಂ?
ಮ್ಹಜೆಂ ವೊಗೆಪಣ್ ಆಸಾ
ಆನ್ಯೇಕ್ ದಿಸನಾತಲ್ಲಿ ಖೊಟಿ ಲಾಠಿ
ಭಾರತಾಚ್ಯೆ ಪಾಟಿರ್
ಚಿರ್ಲ್ಲೊ ಘಾಯ್!
- ಆಂಡ್ರ್ಯೂ ಎಲ್ ಡಿಕುನ್ಹಾ
संपादकीय:
मोनेपण, देशाचे फाटीर चीर घालता
प्रतीभटन - सार्वजनीकांक बरेपण आशेंवच्याक कारण जालें जाल्यार, स्वताच्या अंतस्कर्नाची झडती चलोवन, बरेपणाचे फायदे ताकडेर तुकून, त्या प्रतीभटनाक समर्थन दिंवचो कायदो सगळ्यांक बांदता. स्वता प्रतीभटनांत वांटेली जावन, आयच्या काळार तर वीडियो रील्स करून, कविंनी तर कविता बरोवन - आपापलें समर्थन दीवंक जाता, जशें कवी आंड्र्यून हांगासर केलां.
पुण मोनेपण सांबाळचें मारेकार पिडेचें लक्षण. असलें मोनेपण व्यक्तिच्या पोळकूरपणाक साक्स दिता. कविच्या उत्रांनी सांगचें तर ह्यो मोनेपणाच्यो लाठी भारत देशाचे फाटीर चीर घालून घाय करतात.
मागीर तूं कित्याक वोगो?
- मेल्विन रोड्रीगस
कविता:
घाय
विद्यार्थिंच्या फाटीर
लाठींच्या मारांचे घाय
म्हज्या हाताचेर
युव रगताची साय!
लाठी मारल्लो हात
म्हजो न्हय
पुण मारुंक बळ दिल्लें
तें बोट म्हजेंच हाय!
आतां सवाल आसा
हांवें कितें केलें
हांव कितें करतां?
म्हजें वोगेपण आसा
आन्येक दिसनातल्ली खोटी लाठी
भारताच्ये फाटीर
चिरल्लो घाय!
- आंड्र्यू एल. डिकुन्हा