ಸಂಪಾದಕೀಯ್:
ಕೊಂಕಣಿ ಕವಿತಾ ತಿಸ್ರ್ಯಾ ಎಕಾ ಪಾಂವ್ಡ್ಯಾ ತೆವ್ಶಿಂ?
ಏಕ್ ತೇಂಪ್ ಆಸ್‌ಲ್ಲೊ. ಸಾಂಪ್ರದಾಯಿಕ್ ಶೈಲೆರ್ - ಪ್ರಾಸಾಂನಿಂಚ್ ಕೊಂಕಣಿಂತ್ ಕವಿತಾ ನಿರ್ಮಾಣ್ ಜಾತಾಲಿ. ಕಾಂಯ್ ಠರಾವಣೆಂಚೆರ್ ಹೊಂದೊನ್ ಕವಿತೆಂತ್ ಬದ್ಲಾವಣ್ ಜಾಲಿ ಜಾಲ್ಯಾರ್‌ಯ್ ರುಪಾಂತ್ ಹಿ ಬದ್ಲಾವಣ್ ದಿಸೊನ್ ಆಯ್ಲಿಚ್ ನಾ. ಮಾಗೀರ್ ಕಾಂಯ್ ಪಾಂಚ್ ವರ್ಸಾಂ ಆದಿಂ ಕವಿತೆಚ್ಯಾ ರುಪಾಂತ್ ತಶೆಂ ವಿಷಯಾಂನಿ ಎಕಾನೇಕ್ ಬದ್ಲಾವಣ್ ದಿಸೊನ್ ಯೆತಾನಾ, ಸರ್ವಾಂಕ್ ಭೊಗ್ಲೆಂಕಿ ಕೊಂಕಣಿ ಕವಿತಾ ದುಸ್ರ್ಯಾ ಎಕಾ ಪಾಂವ್ಡ್ಯಾಕ್ ಪ್ರವೇಶ್ ಜಾಲ್ಯಾ ಮ್ಹಣೊನ್. ಹ್ಯಾ ಪಾಂವ್ಡ್ಯಾಚೆ ಹೆಣೆಂ ತೆಣೆಂ ವಿಮರ್ಶೆ ಚಲತ್ ಆಸ್ತಾನಾ ದಿನೇಶ್ ಕೊರೆಯಾ ಮಾತ್ರ್ ಹೊ ಪಾಂವ್ಡೊ ಉತ್ರೊನ್‌ಯ್ ಮುಕಾರ್ ಪಾವ್‌ಲ್ಲೊ ದಿಸ್ತಾ.
ಹಾಂಗಾಸರ್ ಪೇಶ್ ಜಾಲ್ಲಿ ಕವಿತಾ ಠರಾವಣೆಕ್ ಲಾಗೊನ್, ತಿ ಠರಾವಣ್ ಸಾದರ್ ಕೆಲ್ಲೆ ರಿತಿಕ್ ಲಾಗೊನ್ ಆನಿ ರುಪಾಕ್ ಲಾಗೊನ್ ಸಗ್ಳಿ ವೆಗ್ಳಿ. ಕೊಂಕಣಿಂತ್ ಹೊ ಪಾಂವ್ಡೊ ಆನಿಕ್‌ಯ್ ಬಾಳ್‌ಪಣಾರ್ ಆಸಾ. ಚಾ.ಫ್ರಾ.ಚ್ಯಾ `ಕಲ್ವಂತಾಚ್ಯಾ ಕಮ್ರಾವೆರಿ' ನಿಮಾಣೆಂ, ಏಕ್ ಸಂದೇಶ್ ದಿಂವ್ಚೆ ಖಾತೀರ್ ಹರ್‍ಯೆಕಾ ಕಡ್ವ್ಯಾಂತ್ ವೆವೆಗ್ಳ್ಯೊ ಪ್ರತಿಮಾ ಪಾತ್ರ್‌ಧಾರಿ ಜಾವ್ನ್ ಖೆಳೊಂಕ್ ಯೆತಾತ್. ಹಾಂಗಾಸರ್ ಏಕ್‌ಚ್ ಇಮಾಜ್ ವೆವೆಗ್ಳಿಂ ವಸ್ತುರಾಂ ಶಿರ್ಕಾವ್ನ್ ಖೆಳೊಂಕ್ ಯೆಂವ್ಚೆಂ ದಿಸ್ತಾ.
ದಿನೇಶ್ ಕೊರೆಯಾ ಹ್ಯಾ ನವ್ಯಾ ಪ್ರೇತನಾಂಕ್ ಲಾಗೊನ್ ಚ್ಯಾರ್ ಜಣಾಂಚೆ ಮೆಚ್ವಣೆಕ್ ಪಾತ್ರ್ ಜಾಯ್ನಾ ಜಾಂವ್ಕ್ ಪುರೊ. ಪುಣ್ ತಾಚಿ ತಾಂಕ್ ವ್ಹರ್‍ತಿ. ತಾಚೆಂ ಚಿಂತಪ್ ವ್ಹರ್‍ತೆಂ. ಕವಿತೆಚೊ ಆಖ್ಖೊ ಏಕ್ ನವೊ ಪಾಂವ್ಡೊ ನಿರ್ಮಾಣ್ ಕರುಂಕ್ ಭಾಯ್ರ್ ಸರ್‌ಲ್ಲ್ಯಾ ತಾಚೆ ತಾಂಕಿಕ್ ಆತಾಂ ನ್ಹಯ್ ತರೀ ಫುಡಾರಾಂತ್ ಸರ್‍ವಯ್ ಮಾನುನ್ ಘೆತಲೆ. ತಾಣೆ ಹೊ ಪಾಂವ್ಡೊ ಬಳ್ವಂತ್ ಕರಿಜಾಯ್, ಆನಿ ಸದಾಂಚ್ ಬರವ್ನ್ ರಾವಜಾಯ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಫಾಂತ್ಯಾರ್
ಫಾಂತ್ಯಾರ್ ಸಪಣ್ ಪಡ್‌ಲ್ಲೆಂ:
ಹಾಸ್ಕುರ್‍ಯಾ ನಿಳ್ಶಾ ಮಳ್ಬಾರ್
ಧವ್ಯಾ ಮೊಡಾಂಚೆಂ ವೋರ್ಲ್ ವೋಡ್ನ್
ವ್ಹಾಳ್ಚ್ಯಾ ವಾರ್‍ಯಾರ್ ಕೇಸ್ ಸೊಡ್ನ್
ವೋಂಟ್ ರುಂದಾವ್ನ್ ಹಾಸ್ತಾಲೆಂ
ತೆದ್ನಾಂ,
ಚಂದ್ರೆಮ್ ಲಜ್ತಾಲೊ!
ಧೊವಾ ಥೆಂಬ್ಯಾಂಚೆ ಥಂಡ್ ಉಮೆ
ತುಜ್ಯಾ ಪೊಲ್ಯಾಂಕ್ ತಾಂಬ್ಡೆ ಕರ್ತಾತ್
ಕೊಣೆ ಕೆಲ್ಯಾತ್ ಗಾಲ್ ತಾಚೆ
ಗುಲೊಬಾ,
ತುಜ್ಯಾ ಪಾಕ್ಳ್ಯಾಂ ಪ್ರಾಸ್ ನಾಜೂಕ್?
ದರ್ಯಾಚಿಂ ಲ್ಹಾರಾಂ
ಇತ್ಲ್ಯಾ ಶಾಂತೆನ್ ಆಯ್ಕತಾತ್
ಕೊಗ್ಳೆಚೊ ಆವಾಜ್...
ಆನಿ -
ತಾಚೊ ಉಸ್ವಾಸ್!
ಯೆಂವ್ಚ್ಯಾ ವರ್ಸಾಚ್ಯಾ
ಭಾಗಿ ದಿಸಾ
ತಾಚೊ ವೇಯ್ಲ್ ಸಜೊಂವ್ಕ್
ಯೆತೆಲ್ಯಾಂವ್ ಮ್ಹಣ್
ಕಾಜುಲ್ಯಾಂನಿ ಭಾಸ್ ದಿಲ್ಯಾ!
- ದಿನೇಶ್ ಕೊರೆಯಾ, ಪೆರ್ನಾಲ್
संपादकीय:
कोंकणी कविता तिसऱ्या एका पांवड्या तेवशीं?
एक तेंप आसल्लो. सांपऱदायिक शैलेर - प्रासांनींच कोंकणींत कविता निर्माण जाताली. कांय ठरावणेंचेर होंदोन कवितेंत बदलावण जाली जाल्यारय रुपांत ही बदलावण दिसोन आयलीच ना. मागीर कांय पांच वर्सां आदीं कवितेच्या रुपांत तशें विषयांनी एकानेक बदलावण दिसोन येताना, सरवांक भोगलेंकी कोंकणी कविता दुसऱ्या एका पांवड्याक प्रवेश जाल्या म्हणोन. ह्या पांवड्याचे हेणें तेणें विमर्शे चलत आसताना दिनेश कोरेया मात्र हो पांवडो उत्रोनय मुकार पावल्लो दिस्ता.
हांगासर पेश जाल्ली कविता ठरावणेक लागोन, ती ठरावण सादर केल्ले रितीक लागोन आनी रुपाक लागोन सगळी वेगळी. कोंकणींत हो पांवडो आनिकय बाळपणार आसा. चा.फ्रा.च्या 'कलवंताच्या कमरावेरी' निमाणें, एक संदेश दिंवचे खातीर हरयेका कडव्यांत वेवेगळ्यो प्रतिमा पात्रधारी जावन खेळोंक येतात. हांगासर एकच इमाज वेवेगळीं वस्तुरां शिरकावन खेळोंक येंवचें दिस्ता.
दिनेश कोरेया ह्या नव्या प्रेतनांक लागोन च्यार जणांचे मेचवणेक पात्र जायना जावंक पुरो. ಪುಣ್ ताची तांक व्हर्ती. ताचें चिंतप व्हरतें. कवितेचो आख्खो एक नवो पांवडो निर्माण करूंक भायर सरल्ल्या ताचे तांकीक आतां न्हय तरी फुडारांत सर्वय मानून घेतले. ताणे हो पांवडो बळवंत करिजाय, आनी सदांच बरवन रावजाय!
-मेल्विन रोड्रीगस
कविता:
फांत्यार
फांतयार सपण पडल्लें:
हासकुऱ्या निळशा मळबार
धव्या मोडांचें वोरल वोडन
व्हाळच्या वाऱ्यार केस सोडन
वोंट रुंदावन हास्तालें
तेदनां,
चंद्रेम लजतालो!
धोवा थेंब्यांचे थंड उमे
तुज्या पोल्यांक तांबडे करतात
कोणे केल्यात गाल ताचे
गुलोबा,
तुज्या पाकळ्यां प्रास नाजूक?
दऱ्याचीं ल्हारां
इतल्या शांतेन आयकतात
कोगळेचो आवाज...
आनी -
ताचो उस्वास!
येंवच्या वर्साच्या
भागी दिसा
ताचो वेयल सजोवंक
येतेल्यांव म्हण
काजुल्यांनी भास दिल्या!
- दिनेश कोरेया, पेरनाल