ಸಂಪಾದಕೀಯ್:
ಉಬೊಂಕ್, ಉರ್ಬೆಚೆ ಉಬಾಳ್ ಪಾಕಟೆ ಮೆಳ್ತಾನಾ!
ಹೊ ಅತ್ಮೊ ನಾತ್‌ಲ್ಲೊ ಜೀವ್ ಪಯ್ಸಾ ಪಯ್ಸ್ ಧಾಂವೊನ್ ಆಸಾ, ಅತ್ಮ್ಯಾಕ್ ಸೊಧುನ್. ಸರ್ವಾಂಚ್ಯಾ ಜಿವಿತಾಂತ್ ಅಸಲೊ ಕಾಂಯ್ ಕಾಳ್ ಯೆತಾ ಕೊಣ್ಣಾ! ಜಾಂವ್ಕ್ ಪುರೊ, ತವಳ್ ಪಯ್ಸಾ ಪಯ್ಸ್ ಧಾಂವ್ಚಿ ಆಶಾ ಯೆತಾ, ಸುಖಾಚ್ಯೊ ಶಿರೊ ಚಿರ್ಮುಟಾಯ್ಜಾಯ್ ಪಡ್ತಾತ್, ಸಪ್ಣಾಂ ಖೊಳಾಕ್ ಘಾಲಿಜಾಯ್ ಪಡ್ತಾತ್! ಸ್ವತಂತ್ರ್ ಜಾಯ್ಜಾಯ್ ತರ್ ಅಶೆಂ ಕರಿಜಾಯಿಚ್ ಪಡ್ತಾ.
ಜಿವಿತಾಂತ್ಲ್ಯಾ ಖಂಯ್ಚ್ಯಾಕಿ ಪಾಂವ್ಡ್ಯಾಚೆರ್ ಲಾಗ್‌ಲ್ಲ್ಯಾ ಗಿರಾಣಾಥಾವ್ನ್ ಸುಟೊನ್, ಪಾಕಟೆ ಖೊವವ್ನ್ ಉಬ್ಚೆಂ ಉರ್ಬೆಚೆಂ ಉಬಾಳ್ ಪ್ರೇತನ್ ಹಾಂಗಾಸರ್ ಝಳ್ಕತಾ. ಗಡಿ ನಾತ್‌ಲ್ಲ್ಯಾ ಹ್ಯಾ ಸಂಸ್ರಾಂತ್ ಜಿಯೆಂವ್ಕ್ ಕೊಣೇಂಯ್ ವೋಂಯ್ ಘಾಲ್ಚೆಬರಿ ನಾ ಮ್ಹಳ್ಳೆಂ ಸತ್ ಹಿ ಕವಿತಾ ಜಬರ್‌ದಸ್ತೆನ್ ದಾಕಯ್ತಾ.
ಆಸ್ಮಾನ್ ನಿಜಾಯ್ಕಿ ಜಿಯೆಂವ್ಚಿ ಆಶಾ ಹೆ ಕವಿತೆಂತ್ ಫುಲಯ್ಲ್ಯಾ. ತಾಚೆಥಾವ್ನ್ ಕವಿತೆಚಿಂ ಫುಲಾಂಯ್ ಫುಡಾರಾಂತ್‌ಯ್ ಹೆಚ್‌ಪರಿಂ ಫುಲೊಂದಿತ್ ಮ್ಹಳ್ಳಿ ಆಮ್ಚಿ ಆಶಾ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಧಾಂವ್ಣಿ
ಅಂತ್ಯ್ ನಾತ್‌ಲ್ಲ್ಯಾ ಸಂಸ್ರಾಥಾವ್ನ್
ಪಯ್ಸಾ ಪಯ್ಸ್ ಧಾಂವೊನ್ ಆಸಾಂ
ಪಾಟಿಂ ಘುಂವೊನ್ ಪಳಯ್ನಾಸ್ತಾಂ
ಮತಿಂ ಕಿತೇಂಯ್ ಆಟಯ್ನಾಸ್ತಾಂ
ಫಾಲ್ಯಾಂ ಕಿತೆಂ ಮ್ಹಣ್ ಕರ್ಗನಾಸ್ತಾಂ
ಮ್ಹಾಕಾಚ್ ಹಾಂವೆಂ ಸೊದ್ಚೆ ದಿಶೆನ್
ಪಯ್ಸಾ ಪಯ್ಸ್ ಧಾಂವೊನ್ ಆಸಾಂ.
ಸುಖಾಚಿ ಶಿರ್ ಚಿರ್ಮುಟಾವ್ನ್
ತೀಕ್ಷ್ಣ್ ತಿರಾನ್ ಕಾಳೀಜ್ ಕೊಚಾವ್ನ್
ಕಾಲ್ಚಿಂ ಸಪ್ಣಾಂ ಖೊಳಾಕ್ ಘಾಲ್ನ್
ಪರತ್ ಅತ್ಮ್ಯಾಕ್ ವೆಂಗ್ಚೆ ಆಶೆನ್
ಪಯ್ಸಾ ಪಯ್ಸ್ ಧಾಂವೊನ್ ಆಸಾಂ.
ದುಭಾವಿ ಕುಡಿಕ್ ಆದೇವ್ಸ್ ಮಾಗೊನ್
ನಿಷ್ಟುರ್ ಮೊಗಾಚೊ ಉಪ್ಕಾರ್ ಭಾವುಡ್ನ್
ಸುಖ್ ಭೊಗ್ಲಲ್ಯಾಂಕ್ ಸುಖ್‌ಚ್ ಮಾಗೊನ್
ಸ್ವತಂತ್ರ್ ಜಾಂವ್ಚ್ಯಾಕ್ ಆಂವ್ಡೆವ್ನ್
ಪಯ್ಸಾ ಪಯ್ಸ್ ಧಾಂವೊನ್ ಆಸಾಂ,
ಆತಾಂ ಮ್ಹಜೆಲಾಗಿಂ ಸಂತೊಸ್ ಆಸಾ.
-ಆಸ್ಮಾ ಮೂಡಬಿದ್ರಿ