ಸಂಪಾದಕೀಯ್:
ದೋನ್ ದೊಳೆ ನ್ಹಯ್, ದೊನ್ಶೀಂಯ್ ಪಾವನಾಂತ್
ಹಿ ಮೊಗಾಚಿ ಕವಿತಾ ಮ್ಹಣೊಂ? ಮೊಗಾಚೆ ಮಸ್ತೆಚಿ ಕವಿತಾ ಸಾಂಗೊಂ? ದೆಕ್ಚೆಂ ಜಾಲ್ಯಾರ್ ಹ್ಯಾ ಸಂಸಾರಾನ್ ಆಪ್ಲ್ಯಾ ಪಾಲ್ವಾಭಿತರ್ ದಿಪ್ಕಾಯಿಲ್ಲ್ಯೊ ಸೊಭಾಯೊ ಇತ್ಲ್ಯೊ ಆಸಾತ್, ತ್ಯೊ ಪಳೆಂವ್ಕ್ ದೋನ್ ದೊಳೆ ನ್ಹಯ್, ಎಕ್ಲ್ಯಾಕ್ ದೊನ್ಶಿಂ ಆಸ್ಲ್ಯಾರ್‌ಯ್ ಪಾಂವ್ಚೆನಾಂತ್. ಪುಣ್ ಪಳಯಿಲ್ಲಿಚ್ ಸೊಭಾಯ್ ಘಡ್ಯೆ ಘಡ್ಯೆ ಚಾಕ್ಚಿ ಕೊಣಾಕ್ ತಾಳ್ಣಿ ಯೆತಾ, ತವಳ್ ತೆಂ ಪಿಶೆಪಣ್ ವ್ಹರ್ತವ್ತಾ. ಕೊಣ್ ತಾಕಾ ಸವಯ್ ಮ್ಹಣ್ ವೊಲಾಯ್ತ್. ಕೊಣ್ ಸವಯೆಚೆಂ ಪಾತಕ್ ಮ್ಹಣತ್!
ಚಾ.ಫ್ರಾ. ದೆಕೊಸ್ತಾನ್ ಆಪ್ಲ್ಯಾ ಮರ್ಣಾ ಕಾಳಾಚ್ಯಾ ಥೊಡ್ಯಾ ತೆಂಪಾ ಆದಿಂ ಬರಯಿಲ್ಲ್ಯಾ ಕವಿತಾಂ ಪಯ್ಕಿ ಹಿ ಏಕ್. ವಾಚ್ತಾನಾ ಕವಿಚೆಂ ಕಾಳೀಜ್ ಕಿತ್ಲೆಂ ತರ್ನೆಂ ತೆಂ ಸುಸ್ತತಾ. ವಾಚುನ್ ವಾಚುನ್ ಮುಕಾರ್ ವೆತಾನಾ, ಹೆ ಕವಿತೆಚಿ ಸೊಭಾಯ್ ತುಕಾ ಇತ್ಲಿ ರುಚ್ತಾ, ಪರ್‍ತ್ಯಾನ್ ಪರ್‍ತ್ಯಾನ್ ಹಿ ಕವಿತಾ ವಾಚ್ಯಾಂ ಮ್ಹಳ್ಳೆಂ ಸವಯೆಚೆಂ ಪಾತಕ್ ತುಕಾಯ್ ಲಾಗ್ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸವಯೆಚೆಂ ಪಾತಕ್
ದೆಕ್ಲ್ಯೊ ದಿಷ್ಟಿ ಧಾಂವ್ತಾಂ ಧಾಂವ್ತಾಂ
ಏಕ್‌ಚ್‌ಕಡೆ ರಾವನಾ
ಲುಕು ಲುಕು ಪಳೆಂವ್ಕ್ ಮ್ಹಾಕಾ
ದೋನ್ ದೊಳೆ ಪಾವನಾ
ಆಂಬ್ಯಾ ಘೊಸಾಕ್ ಕೊಗ್ಳಿ ಲಗ್ನಾಂ
ಪಾಚ್ವ್ಯಾ ಫಾಂತ್ಯಾರ್ ಘಡ್ಟಾನಾ
ಕಿರಾ ಜೊಡೆಂ ಕರ್ಮಲಾಂಕ್
ಮೊಗಾ ಉಮೆ ಜೊಡ್ಟಾನಾ
ದೆಕ್ಚಿ ತಾನ್ ಲೊಳ್ಟಾ ಗಳ್ಯಾಂ
ಕಾಳ್ಜಾ ಭಿತರ್ ನಿಂವನಾ
ಲುಕು ಲುಕು ಪಳೆಂವ್ಕ್ ಮ್ಹಾಕಾ
ದೋನ್ ದೊಳೆ ಪಾವನಾ.
ತುಜ್ಯಾ ಕೆಸಾಂ ಪಾಂತಿಯೆ ಪೊಂತಾ
ಹರ್ಧ್ಯಾ ದೊಂಗ್ರಾರ್ ಉಡ್ಟಾನಾ
ತೆಣೆ ಹೆಣೆ ಹೆಣೆ ತೆಣೆ
ಉಡೊನ್ ಸುಟೊನ್ ಮೊಡ್ಟಾನಾ
ಭಂವ್ರೊ ಕಸೊ ಪಾಕ್ಳೆರ್ ಬಸೊನ್
ಲೆಂವ್ತಾ ಶಿವಾಯ್ ಚಿಂವನಾ
ಲುಕು ಲುಕು ಪಳೆಂವ್ಕ್ ಮ್ಹಾಕಾ
ದೋನ್ ದೊಳೆ ಪಾವನಾ.
ಮ್ಹಾಕಾ ಸವಯ್ ತುಕಾಯ್ ಸವಯ್
ಮ್ಹಜೆಬರಿಚ್ ಮ್ಹಣ್ಟಾಯ್
ದೋನ್‌ಚ್ ಪಾನೆ ಆಸಾತ್ ಮ್ಹಾಕಾ
ಪಾವ್ನಾ ಮ್ಹಣೊನ್ ಗಾಯ್ತಾಯ್
ದೊಳೆ ಪಳೆಂವ್ಕ್ ಪಾನೆ ಕಿತ್ಯಾಕ್
ತುಕಾ ಭುರ್ಗೆಂ ಬಾಳ್ ನಾ
ಲುಕು ಲುಕು ಪಳೆಂವ್ಕ್ ಮ್ಹಾಕಾ
ದೋನ್ ದೊಳೆ ಪಾವನಾ.
-ಚಾ.ಫ್ರಾ. ದೆಕೊಸ್ತಾ