ಸಂಪಾದಕೀಯ್:
ಘಾಂಟಿಂಚ್ಯಾ ಖೆಳಾಂತ್ ಲೇಕ್ ಚುಕನಾ ಸಾಂಗೊಂಕ್ ಜಾಯ್ನಾ
ಘಾಂಟಿಂಚ್ಯಾ ಆವಾಜಾಂಚೆರ್ ಹೊಂದೊನ್ ಏಕ್ ಆಮ್ಕಿ ಗಜಾಲ್ ವೊಳ್ಕೊಂಕ್ ಜಾತಾ ಮ್ಹಣೊನ್ ಕಿತ್ಲ್ಯಾ ಕಿರಿಸ್ತಾಂವಾಂಕ್ ಕಳಿತ್ ಆಸಾ? ಕಳಿತ್ ನಾತ್‌ಲ್ಲ್ಯಾಂನಿ ಹಿ ಕವಿತಾ ವಾಚಿಜಾಯಿಚ್. ವಾಚ್ತಾನಾ ಕುಡಿರ್ ಸಗ್ಳ್ಯಾ ಖಂಯ್ ಥಾವ್ನ್ ಕೊಣ್ಣಾ ಹುರ್ನಾಂ ಚರೊಂಕ್ ಲಾಗೊನ್, ಕುತ್ತ್ ಕರುನ್ ಹಾಸೊ ಆಯ್ಲ್ಯಾರ್ ನವಲ್ ನಾ. ಏಕ್ ಸೀರಿಯಸ್ ಗಜಾಲ್ ಹಾಂಗಾ ವರ್ಣಿಲ್ಯಾ, ತರೀ ಹಾಸೊಂಕ್ ಯೆತಾ. ಕವಿ ಚಾಫ್ರಾಚಿ ತಾಕತ್‌ಚ್ ಹಿ.
ನಿಮಾಣ್ಯಾ ಕಡ್ವ್ಯಾಕ್ ಪಾವ್ತಾನಾ ಹ್ಯಾ ಘಾಂಟಿಂಕ್ ಲಾಗೊನ್ ಜಾವ್ಯೆತ್ ಜಾಲ್ಲ್ಯಾ ಅನಾಉತಾಂಚೆಂ ಮೊಳಾಬ್ ಉಗ್ತೆಂ ಜಾತಾ. ಗುಸ್ಪಡಾಯೆಚ್ಯಾ ಖಂದ್ಕಾಂತ್ ತುಂ ಸಾಂಪಡ್ತಾಯ್. ಇತ್ಲೆಂ ಮಾತ್ರ್ ನ್ಹಯ್ ಸಗ್ಳೆ ಕವಿತೆಂತ್ ಮಿರೊಣಿಚ್ಯಾ ಎಕಾ ವೆಕ್ತಿತ್ವಾಚಿ ಝಳಕ್ ಕವಿನ್ ಭೋವ್ ಆಪುರ್ಬಾಯೆನ್ ದಿಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಘಾಂಟಿ ಕಿತ್ಯಾಕ್ ವ್ಹಾಜ್ತಾತ್?
ಮಿರ್ನ್ಯಾಮಾ ಮಿರ್ನ್ಯಾಮಾ
ಯೇಕ್ ಉಪ್ಕಾರ್ ಕರ್‍ಶಿ?
ಘಾಂಟಿ ಕಿತ್ಯಾಕ್ ವೊಡ್ತಾಯ್
ಮ್ಹಾಕಾ ಮಾತ್ಶೆಂ ಸಾಂಗ್ಶಿ?
ಪಾಟಾಪಾಟ್ ವೊಡ್ತಾಸ್ತಾನಾ
ಡಾಂವ್ ಡಾಂವ್ ಡಾಂವ್
ಖಂಯ್ಚೆ ತರಿ ಸಾಯ್ಬಿಣ್ ಸಾಂತಾ
ಫೆಸ್ತ್ ಕರಿ ಗಾಂವ್.
ಯೇಕ್ ಸೊಡುನ್ ದೋನ್ ಮಾರ್‍ಲ್ಯಾರ್
ಕೊಣ್ ತರಿ ಮೆಲಾ
ಗಾಂವಾರ್ ಬಾವ್ಡೊ ಕಿರಿಸ್ತಾಂವ್
ಆಮ್ಕಾಂ ಸೊಡುನ್ ಗೆಲಾ.
ಯೇಕ್ ಸೊಡುನ್ ತೀನ್ ಮಾರ್‍ತಾಯ್
ದುಕಾ ಉಮಾಳ್ ಭರ್‍ಲಾ
ಇಗರ್ಜಿಚೊ ಪಾದ್ರ್ ವಿಗಾರ್
ಆಮ್ಕಾಂ ಆನಿ ಸರ್‍ಲಾ.
ಯೇಕ್ ಸೊಡುನ್ ಚಾರ್ ಮಾರ್‍ಶಿ
ದುಕಾನ್ ವೆಡೊ ಘಾಲಾ
ದಿಯೆಸೆಜಿ ಬಿಸ್ಪ್ ಸಾಯ್ಬ್
ದೆವಾ ಅಧೀನ್ ಜಾಲಾ.
ಯೆಕಾ ನಂತರ್ ಪಾಂಚ್ ಮಾರ್‍ಲ್ಯಾರ್
ಸಂಸಾರ್ ವಿರಾರ್ ಜಾಲಾ
ರೊಮಾಂತುಲೊ ಪಾಪಾ ಬೋವ್‌ಶಾ
ಸರ್ಗಾ ರಾಜಾಕ್ ಗೆಲಾ.
ಮಿರ್ನ್ಯಾಮಾ, ಮಿರ್ನ್ಯಾಮಾ
ಚಡ್ತಿಕ್ ಮಾರಿನಾಕಾ
ತಾಚೆ ಪರಸ್ ವ್ಹರ್ತೊ ನಾತ್ಲ್ಯಾನ್
ಚಿಂತುಂಕ್ ಕರಿನಾಕಾ.
ಯೇಕ್ ಸೊಡುನ್ ಸ ಮಾರ್‍ಲ್ಯಾರ್
ಲೋಕ್ ಕಿತೇಂಯ್ ಚಿಂತಿತ್
ತುವೆಂ ಆಮಾಲ್ ಘೆತ್ಲಾಂಯ್, ನಾತ್ಲ್ಯಾರ್
ದೇವ್‌ಚ್ ಮೆಲೊ ಮ್ಹಣ್ತಿತ್.
-ಚಾ.ಫ್ರಾ. ದೆಕೊಸ್ತಾ