ಸಂಪಾದಕೀಯ್:
ಶೆಣ್ ಝಾಡ್ಚೆಂಚ್ ಫೆಸ್ತ್ ಮ್ಹಣೊನ್ ಮಝಾ ಮಾರ್‍ಚೆ ಮೂಸ್
ಹೊ ಮನೀಸ್, ತಾಣೆಂ ಮಾಂಡುನ್ ಹಾಡ್ಚ್ಯಾ ಫೆಸ್ತಾಂತ್ ಸಯ್ರೆ ದಾಧೋಶಿ ನಾಚ್ತಲೆ ಆನಿ ಖುಶ್ ಪಾವ್ತಲೆ ಮ್ಹಣೊನ್ ಆಶೆವ್ನ್ ಆಸ್‌ಲ್ಲೊ. ಪುಣ್ ತಾಣೆಂ ಆಶೆಲ್ಲೆಂ ಘಡ್ಲೆಂನಾ. ವಾಗಾಂಚೊ ವೇಸ್ ನಾಚೊನ್ ಗೆಲೊ ಶಿವಾಯ್, ಸಯ್ರೆ ಆಯ್ಲೆನಾಂತ್. ತಯಾರಾಯೆಂತ್ ತಾಚೊ ರಗ್ತಾ ಥೆಂಬೊ ಸಯ್ತಿ ಜಡೊನ್ ಗೆಲೊ. ಪುಣ್ ಕೊಣಾಕ್ ಪರ್‍ವಾ ತಾಚಿ ಜಾಲಿನಾ. ತಿತ್ಲೆಂಚ್ ನ್ಹಯ್, ವಿಶೇಸ್ ಕಿತೆಂಗಿ ಮ್ಹಳ್ಯಾರ್ ಹೆ ತಯಾರಾಯೆಂತ್ ಬುಡ್‌ಲ್ಲ್ಯಾ ತಾಕಾ ಫೆಸ್ತಾಚ್ಯಾ ನಿಬಾನ್ ಹಿತ್ಲಾಂತ್ಲೆಂ ಶೆಣ್ ಪಿಜ್ಝಾ ಮ್ಹಣೊನ್ ಘಾಸ್ ಮಾರ್‍ಚೆ ಮೂಸ್‌ಯ್ ಸಾಂಪ್ಡತಾತ್. ಮಾಗೀರ್ ಥೊಡೆ ರೆಡೆ ಆನಿ ಗಾಯ್ರಾಂಯ್ ತಾಕಾ ದಿಸ್ತಾತ್.
ಸಗ್ಳಿ ಕವಿತಾ ತೀನ್ ಸಂಗ್ತಿ ಹಾಂಗಾಸರ್ ಉಗ್ತಿ ಕರ್‍ತಾ. ಪಯ್ಲ್ಯಾನ್ ಫೆಸ್ತ್, ದುಸ್ರ್ಯಾನ್ ಯೇನಾತ್‌ಲ್ಲೆ ಸಯ್ರೆ ಆನಿ ತಿಸ್ರ್ಯಾನ್ ಫೆಸ್ತಾಚೊ ಅರ್ಥ್ ಸಮ್ಜನಾಸ್ತಾಂ ಮಝಾ ಮಾರ್‍ಚೆ ಮೂಸ್, ಗಾಯ್ರಾಂ ಆನಿ ರೆಡೆ. ಏಕ್ ಅಮೂರ್‍ತ್ ಕವಿತಾ ಹಿ. ಫೆಸ್ತಾಕ್, ಸಯ್ರ್ಯಾಂಕ್ ಆನಿ ಮುಸಾಂಕ್ ನವಿಂ ನಾಂವಾಂ ದಿತಾನಾ, ಹೆ ಕವಿತೆಚಿ ಮಝಾ ವೆಗ್ಳಿಚ್ ಜಾಂವ್ಕ್ ಪುರೊ.
ಮಾಗೀರ್ ಸಮ್ಜತೆಲ್ಯಾಂಕ್ ದೋನ್ ವೊಳಿಂ ಮಧ್ಲೆ ಅರ್ಥ್ ಸಮ್ಜೊಂಕ್ ವೇಳ್ ಲಾಗ್ಚೊನಾ. ವಿಲ್ಸನ್ ಕಟೀಲಾನ್ ಆನ್ಯೇಕ್ ವ್ಹರ್ತಿ ಕವಿತಾ ಆಮ್ಕಾಂ ದಿಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಶೆಣ್ ಝಾಡ್ಚೆಂ ಕಾರ್ಯೆಂ
ಆಮ್ಗೆಲ್ಯಾ ಘರಾಂತ್ ಫೆಸ್ತ್ ಪೊರ್‍ವಾಂ
ದೆಕುನ್ ಆಜ್
ಆಂಗ್ಣಾಕ್
ಶೆಣ್ ಝಾಡ್ಚೆಂ ಕಾರ್ಯೆಂ
ಶೆಣಾಕ್ ಕಾಂಯ್ ಬೊರ್ಗೊಳ್
ಆಮ್ಚೆ ಹಳ್ಳೆಂತ್?
ದರ್ಕಸಾಂತ್ ಪಾಂಯ್ ಘಾಲ್ಯಾರ್...
ಹಜಾರ್ ತಣಾ ತಕ್ಲೆಂಕ್
ಏಕ್ ಶೆಣಾ ಮುಂಡಾಸ್
ಶೆತ್ ಭರ್ ಮುಂಡಾಸಾಂಚಿ ರಾಸ್
ಸುಕ್‌ಲ್ಲ್ಯಾ ಶೆಣ್ಕುಟಾಕ್‌ಯೀ
ಪಿಜ್ಝಾ ಮ್ಹಣೊನ್ ಘಾಸ್
ಥೊಡೆ ತೋಂಡ್‌ಚ್ ಪುರ್‍ತಾತ್
ರೂಚ್ ಹೊಗ್ಡಾಯಿಲ್ಲೆ ಮೂಸ್
ಆಹಾ! ಶೆಣ್‌ಚ್ ಮಾಸ್
ಘಾಣ್‌ಚ್ ಸ್ವಾಸ್
ವಿಂಚುಂಕ್ ಗೆಲ್ಯಾರ್...
ತಾಂತ್ಲೆ ಥೊಡೆ ಜಬ್ಬೊರ್ ರೆಡೆ
ಹಾತ್ ಘಾಲ್ತಾಂ ಹಾಂಡ್ತಾತ್
ಥೊಡಿಂ ಗಾಯ್ರಾಂ ಮಯ್ಪಾಶಿ
ಭಾಟಿಯೆಕ್‌ಚ್ ಘಾಲ್ತಾತ್
ದೊರೆ ಉಡೊಂಕ್ ತಾಂಕ್ಚೆ
ಪಯ್ಸ್ ರಾವೊನ್ ಖೆಂಡ್ತಾತ್
ಪೆಂಕ್ಡಾಂತ್ ಬಳ್ ನಾತ್ಲೆ
ಧರ್ಣಿಕ್ ಖೊಟ್ ಮಾರ್‍ತಾತ್.
ಭಾಟಿ ಭರ್‍ತಚ್ ಪಾಟಿಂ ಪರ್ತೊನ್
ಕಶ್ಟಾಂನಿ ಶೆಣ್ ಝಾಡ್ಲೆಂ
ಝಾಡ್ತಾಂ ಝಾಡ್ತಾಂ ಈರ್ ತೊಪುನ್
ಥೆಂಬೊ ರಗತ್ ಜಡ್ಲೆಂ
ಪೂಣ್...
ಆಂಗ್ಣಾಂತ್ ಮ್ಹಜ್ಯಾ ನಾಚೊನ್ ಗೆಲೊ
ವಾಗಾಚೊ ಗಾ ವೇಸ್
ಬೊಲ್ಚೆಲ್ಲೆ ಸಯ್ರೆ ಆಯ್ಲೆಚ್ ನಾಂತ್
ಉರ್‍ಲೊ ಫಕತ್ ವಾಸ್.
- ವಿಲ್ಸನ್ ಕಟೀಲ್