ಸಂಪಾದಕೀಯ್:
ರಸ್ತ್ಯಾಂ ಪಾಟ್ಲೆಂ ರಾಜಕೀಯ್ ದಾಕಂವ್ಚೊ ಆರ್ಸೊ
ಗಾಂವಾಂತ್ ಆತಾಂ ಶಿರಾಂಧಾರಿಂಚೊ ಪಾವ್ಸ್ ಪಡೊನ್ ಆಸಾ. ಹ್ಯಾ ಕಾಳಾಂತ್ ಆಮ್ಚ್ಯಾ ರಸ್ತ್ಯಾಂಚಿ ಜಾಂವ್ಚಿ ದುರ್ದಶಾ ಆಮಿ ಪಳೆಲ್ಯಾ. ಹ್ಯಾ ರಸ್ತ್ಯಾಂ ಪಾಟ್ಲೆಂ ರಾಜಕೀಯ್ ಆಮಿ ಬರೆಂ ಜಾಣಾಂವ್. ಹೆಂ ಸಗ್ಳೆಂ ಥೊಡ್ಯಾಚ್ ಉತ್ರಾಂನಿ, ಭೋವ್‌ಚ್ ಆಪುರ್ಬಾಯೆನ್ ಕವಿ ಆನ್ಸಿ ಪಾಲಡ್ಕಾನ್ ಹಾಂಗಾಸರ್ ಹೆ ಕವಿತೆದ್ವಾರಿಂ ಪಿಂತ್ರಾಯ್ಲಾಂ. ಎಕಾ ಸಂಪ್ಯಾ ವಿಷಯಾ ಪಾಟ್ಲ್ಯಾನ್, ಕವಿಚೆಂ ರಚನಾತ್ಮಕ್ ಮನ್ ಕಶೆಂ ಕಾಮ್ ಕರ್‍ತಾ ಮ್ಹಳ್ಳೆಂ ಪಳೆಜಾಯ್ ತರ್ ಹಿ ಕವಿತಾ ವಾಚಿಜಾಯಿಚ್. ನವ್ಯಾನ್ ಕವಿತಾ ಬರಯ್ತಲ್ಯಾಂಕ್ ಹಿ ಕವಿತಾ ಏಕ್ ಮಾರ್ಗದರ್ಶಿ ಕಶಿ ವರ್‍ತವ್ತಾ.
ಆನ್ಸಿ ಪಾಲಡ್ಕಾ ಕೊಂಕಣಿ ಕವಿತೆಚ್ಯಾ ಮಳಾರ್ ಆಪ್ಣಾಚೆಂಚ್ ನಾಂವ್ ಕೆಲ್ಲೊ ಮನೀಸ್. ಭುರ್ಗ್ಯಾಂಚ್ಯೊ ಕವಿತಾ ಬರಂವ್ಚ್ಯಾಂತ್ ಉಕಲ್ಲಲೊ ಹಾತ್. ತ್ಯಾ ಎಕಾ ಶೆತಾಂತ್ ತಾಣೆಂ ವಿಶೇಸ್ ಜಾಣ್ವಿಕಾಯ್ ಆಪ್ಣಾಯ್ಲ್ಯಾ. ತಾಚ್ಯಾ ಕವಿತಾಂಚೊ ಸುವಾಧ್ ಹ್ಯಾ ಫುಡೇಂಯ್ ಆಮ್ಕಾಂ ತೊ ದಿತಲೊ ಮ್ಹಳ್ಳೊ ಭರ್‍ವಸೊ ಆಮ್ಚೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಮ್ಚೊ ಮಾರೊಗ್
ಮಾರೊಗ್ ಮ್ಹಳ್ಯಾರ್ ಆಮ್ಚೊ ಮಾರೊಗ್
ಆಮ್ಚ್ಯಾ ಗಾಂವ್ಚೊ ಮಾರೊಗ್
ಆಮ್ಚ್ಯಾ ಮಾರ್ಗಾ ಪೊಂತಾನ್ ಪೊಂತಾ
ಪೊಂಡ್ಕುಳ್ಯಾಂನಿ ಬಿಡಾರ್ ಕೆಲಾಂ
ಕೊಣೆ ಪುನೆವಂತಾನ್ ತಾಂತುಂ
ಪೊಡ್ಕೊಳಾಚೆಂ ಆಡಾರ್ ಪುರ್‍ಲಾಂ
ಪೊಡ್ಕೊಳಾಚ್ಯಾ ಫುಲಾ ಸ್ವಾದಾಕ್
ಝರಿ ಉದ್ಕಾನ್ ಜಿವಿತ್ ದೆಖ್ಲಾಂ
ಯೆ ಸಾಯ್ಬಾ ವೆಗ್ಗಿಂ ಯೆ
ಆಮ್ಚೊ ಮಾರೊಗ್ ಪಳೆಂವ್ಕ್ ಯೆ
ಮಾರೊಗ್ ಮ್ಹಳ್ಯಾರ್ ಆಮ್ಚೊ ಮಾರೊಗ್
ಆಮ್ಚ್ಯಾ ಗಾಂವ್ಚೊ ಮಾರೊಗ್
ಪ್ರಕ್ರತೆಚಿ ಸೊಭಾಯ್ ದೆಖ್ಚ್ಯಾಕ್
ಗಾಂವಾನ್ ಗಾಂವ್ ಭೊಂವನಾಕಾ
ಥರಾವಳ್ ಅನ್ಭೋಗ್ ಚಾಕ್ಚ್ಯಾಕ್
ಮಾರ್ಗಾರ್ ಆಮ್ಚ್ಯಾ ಆಯ್ಲ್ಯಾರ್ ಪಾವ್ತಾ
ಚಲಿಯೆ ಗಾಲಾ ನಾಜೂಕ್ ದೊಳೆ
ಆಮ್ಚ್ಯಾ ಮಾರ್ಗಾರ್ ಮೆಜೂನ್ ಪಳೆ
ದರ್ಯಾ ಲ್ಹಾರಾ ಪಾಳ್ಣ್ಯಾರ್ ಧಲ್ಚೆಂ
ಅಪ್ರೂಪ್ ಭಾಗ್ ಹೆಂ ಫುಂಕ್ಯಾಕ್ ಮೆಳ್ಚೆಂ
ಯೆ ಸಾಯ್ಬಾ ವೆಗ್ಗಿಂ ಯೆ
ಆಮ್ಚ್ಯಾ ಮಾರ್ಗಾರ್ ಧಲೊಂಕ್ ಯೆ
ಮಾರೊಗ್ ಮ್ಹಳ್ಯಾರ್ ಆಮ್ಚೊ ಮಾರೊಗ್
ಆಮ್ಚ್ಯಾ ಗಾಂವ್ಚೊ ಮಾರೊಗ್
ಕುಟ್ಟಿ ದೊಣ್ಣೆ ಖೆಳ್ಚ್ಯಾ ಬಾಳಾಕ್
ಧರ್‍ತಿ ಖೊಂಡುಂಕ್ ಕೊಯ್ತಿ ನಾಕಾ
ಕೊಸುನ್ ಜಾಲ್ಯಾ ಉಪ್ರಾಂತ್ ಬೊಲ್ಲಾಕ್
ತಳ್ಯಾಕ್ ವರ್‍ಚಿ ಖಂತ್‌ಯೀ ನಾಕಾ
ಮೋತಿಕ್ ಉದ್ಕಾ ಬೊಶಿ ನಾಕಾ
ದಾಸಿಕ್ ತಾಳ್ಣ್ಯಾ ಮಾಂಡೊ ನಾಕಾ
ಸಕಾಳಿಚ್ಯಾ ಅಪೂರ್ವ ಗರ್ಜೆಕ್
ಚೆಂಬು ವೊಣಾಕ್ ನಾಕಾಚ್ ನಾಕಾ
ಯೆ ಸಾಯ್ಬಾ ವೆಗ್ಗಿಂ ಯೆ
ಆಮ್ಚ್ಯಾ ಮಾರ್ಗಾರ್ ಖೆಳೊಂಕ್ ಯೆ
ಮಾರೊಗ್ ಮ್ಹಳ್ಯಾರ್ ಆಮ್ಚೊ ಮಾರೊಗ್
ಆಮ್ಚ್ಯಾ ಗಾಂವ್ಚೊ ಮಾರೊಗ್
ಆಮ್ಚೆ ಮಾರೊಗ್ ಆಸ್ಲೆ ಕಶೆ
ಚಲಿಯೆ ಘಾಗ್ರ್ಯಾ ಇಸ್ತ್ರೆ ಜಶೆ
ಇಸ್ತ್ರೆಚಿ ತ್ಯಾ ಜಾಲಿ ಮಸ್ತಿ
ಘಡಿತ್ ಸಾಯ್ಬಾ ಘಡ್ಲೆಂ ಅಶೆಂ
ಆದ್ಲ್ಯಾ ವರ್‍ಸಾ ಆಮ್ಚ್ಯಾ ಗಾಂವಾಕ್
ಮಂತ್ರಿ ಸಾಯ್ಬಾ ಯೆಣೆಂ ಜಾಲೆಂ
ಮಾತ್ಯೆ ಮಾರ್ಗಾರ್ ಪಯ್ಣ್ ಕೆಲ್ಯಾರ್
ಪುಡ್ವೆಂ ಮ್ಹೆಳ್ಚೆಂ ಭ್ಯೆಂ ದಿಸ್ಲೆಂ
ರಾತ್ ಫಾಲೆಂ ಜಾಂವ್ಚ್ಯಾ ಫುಡೆಂ
ಮಾರ್ಗಾರ್ ಜಯ್ತ್ ಯಂತ್ರ್ ಘುಸ್ಲೆಂ
ಮಾಸುಮ್ ಮಾರ್ಗಾಕ್ ನಿಶ್ಟುರಾಯೆನ್
ಮಾರುನ್ ಬಡವ್ನ್ ಡಾಮಾರ್ ಪುಸ್ಲೆಂ
ಮಂತ್ರಿ ಸಾಯ್ಬಾ ರಾಯಾಳ್ ಯೆಣ್ಯಾನ್
ಪಾವ್ಸಾ ರಾಣ್ಯೆಕ್ ಸ್ಪೂರ್‍ತಿ ಆಯ್ಲಿ
ತಿಚಿ ಸರ್‍ತಿ ಕಾಳಿಜ್ ಮುಡ್ಡಿತ್
ಪೊಂಡ್ಕುಲ್ಯಾಂಚೆಂ ಜಿಣ್ಯೆ ಘಡಿತ್
ಯೇ ಸಾಯ್ಬಾ ವೆಗ್ಗಿಂ ಯೆ
ಆಮ್ಚ್ಯಾ ಗಾಂವಾಕ್ ಧಾಂವೊನ್ ಯೆ
ಆಮ್ಚ್ಯಾ ಗಾಂವ್ಚ್ಯಾ ಪೊಂಡ್ಕುಲಾಂತ್
ಏಕ್ ರಾತ್ ರಾವೊಂಕ್ ಯೆ.
-ಆನ್ಸಿ ಪಾಲಡ್ಕಾ