ಆಕ್ರೋಶ್

ಸಂಪಾದಕೀಯ್:

ನೇಪಾಲ್ಚ್ಯಾ ಆವ್ರಾಕ್ ಹುಸ್ಕೆಲ್ಲೆಂ ಕಾಳೀಜ್

ಆಗೋಸ್ತ್ 26, 2026 ದಿಸಾ ನೇಪಾಲಾಂತ್ ಅಚಾನಕ್ ಆಯಿಲ್ಲೆಂ ಆವ್ರ್ ಮನ್ಶಾಕುಳಾಚ್ಯಾ ಇತಿಹಾಸಾಂತ್ ವಿಶೇಸ್ ವಿಜ್ಮಿತ್ಕಾಯೆನ್ ಭರಲ್ಲೆಂ, ಮ್ಹಾಸಂಕಷ್ಟಾಂಚೊ ಶಿಖರ್ ಮ್ಹಣ್ಯೆತ್ ಜಾಲ್ಲೆಂ ದುರ್ದೈವಾಚೆಂ ಘಡಿತ್. ಲ್ಯಾಂಗ್‍ಟಾಂಗ್ ಲಿರುಂಗ್ ಪರ್ವತಾಚ್ಯೆ 5150 ಮೀಟರ್ ಉಂಚಾಯೆಥಾವ್ನ್ ಫಾತರ್ ಆನಿ ಬರ್ಫಾಖಡೆ ಕೊಸ್ಳುನ್ ಪಡುನ್, ವೊರಾಕ್ ಚಡುಣೆಂ 190 ಕಿ.ಮೀ. ಸರಾಯೆನ್ ಫಾತರ್, ಬರಫ್ ಆನಿ ಮಾತಿ - ವಾಟೆರ್ ಮೆಳಲ್ಲೆಂ ಸಗ್ಳೆಂ ಆರಾವ್ನ್ ಘೆವ್ನ್ ಶೆಂಭರ್ ಕಿಲೋಮೀಟರ್ ಪರ‍್ಯಾಂತ್ ವ್ಹಾಳೊನ್ ಗೆಲಿ.

ಲಾಗಿಂ ಲಾಗಿಂ 1400 ಲೋಕ್ ಮೆಲೊ. ನೇಪಾಲ್ ತಶೆಂ ಟಿಬೆಟಾಂತ್ 6000 ಲೊಕಾಂಚೊ ಹಿಸೊಬ್ ಮೆಳುಂಕ್ ನಾ. ಕಾಂಯ್ ಥೊಡೆ ಸಮುದಾಯ್‍ಚ್ ಮಾತ್ಯೆಂತ್ ಪುರೊನ್ ಗೆಲೆ.

ಸಹಜ್ ಜಾವ್ನ್ ಧರ್ತೆರ್ ಜೀವ್ ಆಸಲ್ಲ್ಯಾ ದರೆಕಾ ಮನ್ಶಾಚೆಂ ಕಾಳೀಜ್ ಕಡ್ತಾ. 'ಅಶೆಂ ಜಾಂವ್ಕ್ ನಜೊ ಆಸಲ್ಲೆಂ’ ಮ್ಹಣುನ್ ಉದ್ಗಾರ‍್ತಾ. ತಸಲೋಚ್ ಉದ್ಗಾರ್ ಫೆಲ್ಸಿ ಲೋಬೊಚೊ ಆಸಾ. ಏಕ್ ಘಡಿತ್ ಆಪ್ಲೆ ಕವಿತೆಂತ್ ತಿಣೆಂ ಬಾಂದುನ್ ದವರ‍್ಲಾಂ. ತಶೆಂ ಕರ‍್ತಾನಾ ಮನ್ಶಾಕುಳಾಚೆರ್ ಆಪ್ಲೊ ಹುಸ್ಕೊ ತಿಚೊ ಉಟೊನ್ ದಿಸ್ತಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಆಕ್ರೋಶ್

ತುಜ್ಯಾ ಶಾಂತ್ ಅಂತಸ್ಕರ್ನಾಕ್
ತೊಪ್ಲಿ ಕೊಣೆ ಭಾಲಿ?
ಖಿಣಾನ್ ಕ್ರೋಧಿತ್ ಜಾಲಿಯ್..!
ಪಾಚ್ವ್ಯಾ ವೊರ್ಲಾಂತ್ ಗಾಂಟ್ ಬಾಂಧುನ್ ದವರ‍್ಲಲೆಂ
ಹರ್ ಉಸ್ಪುನ್ ಸೊಡ್ಲೆಂಯ್..!

ಮನ್ಶಾ ಸಪ್ಣಾಂನಿ ಉಬಿಂ ಜಾಲ್ಲಿಂ ಬಿಡಾರಾಂ
ಬಾಳ್ಪಣಾರ್ ಖೆಳ್ಳೆಲೆ ಕಾಗ್ದಾ ದೊಣ್ಯೆಪರಿಂ
ಧಲೊನ್ ಧಲೊನ್ ನಿಸ್ರಲಿಂ
ಸಗ್ಳೆಂ ಆರಾವ್ನ್...

ಕುಸ್ಕೊನ್ ಮಾಲ್ವಲ್ಲ್ಯಾ ಕುಂದ್ಯಾ ಖಾಂಬ್ಯಾ ವೊಣ್ತಿ ಖಾಂಚಿಂನಿ,
ಕಾಂಯ್ ರಡ್ಣೆಂ, ಕಿಂಕ್ರಾಟಿ, ಆಕ್ಲಾಸಾ ಆವಾಜ್
ತಾಂಡುನ್‌ಚ್ ವೆಲೊಯ್
ವೊಂಟ್ಯೆಂತ್...
ಮನಿಸ್ ಉಪ್ಯೆಲೊ ಕೊಯ್ರಾಂತ್, ಉದಾರೊ...

ಗರ್ಭಾ ಪೊತಿ ಫುಟವ್ನ್
ವೊಂಕ್ಲೊಯ್ ಕ್ರೋಧ್, ಶೆರಾಂ, ಭಾಟಾಂ, ಬೆಟಾಂ ಭೆತುನ್..
ದೊಂಗರ್, ಶಿಳಾ, ರಸ್ತೆ ಪಾಂಪಾಳ್ಯಾಂಕ್‌ಯ್
ವೊಳಾವ್ನ್ ದೊಡ್ಲೆಂಯ್ ಬಳಾನ್...

ಆಬ್ಲೆಶಿ ಮನ್ಶಾಕ್ ಕುಸ್ಕುಟಾಚೆಂ ಸೊಡ್ಲೆಂನಾ ತುಜ್ಯಾ ಕ್ರೋಧಾನ್,
ಆವಯ್‌ಗೆ ಶಾಂತ್ ಜಾ...
ಪಿಂಪ್ರ್ಯಾಂಕ್ ಕಷ್ಟಾಂತ್ ಘಾಲುನಾಕಾ...
ಆಂಗಾರ್‌ಗೆ ತುಜ್ಯಾ ಖೆಳೊಂಕ್ ತಾಂಕ್ ದಿವುನ್ ಮಾಯೆ
ದುದಾನ್ ವಾಗಯ್ ಆಮ್ಕಾಂ.....

-ಫೆಲ್ಸಿ ಲೋಬೊ, ದೆರೆಬಯ್ಲ್.

संपादकीय:

नेपाळच्या हुंवाराक हुस्केल्लें काळीज

आगोस्त 26, 2026 दिसा नेपालांत अचानक आयल्लो हुंवार मनशाकुळाच्या इतीहासांत विशेस विज्मित्कायेन भरल्लें, म्हासंकष्टांचें शिखर म्हण्येत जाल्लें दुर्दैवाचें घडीत. लॅंगटांग लिरुंग पर्वताच्ये 5150 मीटर उंचायेथावन फातर आनी बर्फाखडे कोसळून पडून, वराक चडुणें 190 की.मी. सरायेन फातर, बरफ आनी माती - वाटेर मेळल्लें सगळें आरावन घेवन शेंभर किलोमीटर परयांत व्हाळोन गेली.

लागीं लागीं 1400 लोक मेलो. नेपाल तशें टिबेटांत 6000 लोकांचो हिसोब मेळुंक ना. कांय थोडे समुदाय‍च मातयेंत पुरोन गेले.

सहज जावन धर्तेर जीव आसल्ल्या दरेका मनशाचें काळीज कडता. 'अशें जावंक नजो आसल्लें’ म्हणून उदगारता. तसलोच उदगार फेल्सी लोबोचो आसा. एक घडीत आपले कवितेंत तिणें बांदून दवरलां. तशें करताना मनशाकुळाचेर आपलो हुस्को तिचो उटोन दिसता.

-मेल्विन रोड्रीगस

कविता:

आक्रोश

तुज्या शांत अंतस्कर्नाक
तोपली कोणे भाली?
खिणान क्रोधीत जालीय..!
पाचव्या वोरलांत गांट बांधून दवर‍ललें
हर उस्पून सोडलेंय..!

मनशा सपणांनी उबीं जाल्लीं बिडारां
बाळपणार खेळ्ळेले कागदा दोण्येपरीं
धलोन धलोन निस्रलीं
सगळें आरावन...

कुस्कोन मालवल्ल्या कुंद्या खांब्या वणती खांचिनीं,
कांय रडणें, किंक्राटी, आकलासा आवाज
तांडून‌च वेलोय
वोंट्येंत...
मनीस उप्येलो कोयरांत, उदारो...

गर्भा पोती फुटवन
वोंकलोय क्रोध, शेरां, भाटां, बेटां भेतून..
दोंगर, शिळा, रस्ते, पांपाळ्यांक‌य
वोळावन दोडलेंय बळान...

आबलेशी मनशाक कुस्कुटाचें सोडलेंना तुज्या क्रोधान,
आवय‌गे शांत जा...
पिंपऱ्यांक कष्टांत घालुनाका...
आंगार‌-गे तुज्या खेळोंक तांक दिवून माये
दुदान वागय आमकां.....

-फेल्सी लोबो, देरेबैल.