ಸಂಪಾದಕೀಯ್:
ಮೊಗಾಕ್ ಪ್ರಾಯ್ ಮ್ಹಳ್ಳಿ ಆಸ್ತಾ ಕಾಂಯ್?
ಮೊಗಾಚಿ ಅಪ್ರತಿಮ್ ಕವಿತಾ ಹಾಂಗಾಸರ್ ಆಸಾ. ಹ್ಯಾ ಮೊಗಾಕ್ ಸಲ್ವಣಿ ನಾ. ಹ್ಯಾ ಮೊಗಾಕ್ ದೂಖ್ ಭೊಗನಾ. ಹ್ಯಾ ಮೊಗಾಚಿ ಆಶಾ ಥಾಂಬನಾ. ಹೊ ಮೋಗ್ ಕಿತ್ಲೋಯ್ ವೇಳ್, ಕಿತ್ಲೇಯ್ ಕಾಳ್, ಕಿತ್ಲೀಂಯ್ ಯುಗಾಂ ರಾಕೊನ್ ರಾವೊಂಕ್ ತಯಾರ್ ಆಸಾ. ಉತಳ್ ಮೋಗ್ ನ್ಹಯ್ ಹೊ. ಕಾಳ್ಜಾಚ್ಯಾ ಕಾಳ್ಜಾ ಭಿತರ್ ಹ್ಯಾ ಮೊಗಾನ್ ಪಾಳಾಂ ರೊಂಬಯ್ಲ್ಯಾಂತ್. ಅಸಲೆಂ ಏಕ್ ಚಿಂತಪ್ ಮೊಗಾಖಾತೀರ್ ರುಕಾರ್ ರೆಂವಡ್ ಘಾಲ್ತಲ್ಯಾಂ ಥಂಯ್ ಯೇನಾ. ಮೊಗಾಚೊ ಧ್ಯಾಸ್ ಕರ್‍ತಲ್ಯಾಂ ಥಂಯ್ ಮಾತ್ರ್ ಉಬ್ಜತಾ.
ಮೊಗಾಚಿ ಕವಿತಾ ಬರಂವ್ಕ್ ವಚೊನ್ ಸಮಾಜೆಂತ್ಲಿಂ ಜಾಯ್ತಿಂ ವೆಕ್ತಿತ್ವಾಂ ಹೆ ಕವಿತೆದ್ವಾರಿಂ ಭುಂಯ್ ಪಡ್ಲ್ಯಾಂತ್. ತೆ ಪುರಾಯ್ ಲಾಗ್ಶಿಲೆ ಮನೀಸ್‌ಚ್. ಗರ್ಜೆಚೆ ಮನಿಸ್‌ಚ್. ತರಿಪುಣ್ ತಾಂಚೆ ಮಧೆಂ ಆನಿ ಆಪ್ಣೆಂ ಮೋಗ್ ಕೆಲ್ಲೆ ಚಲಿಯೆ ಮಧೆಂ ರಾತ್ ದಿಸಾಚೊ ಫರಕ್. ತ್ಯಾ ದೆಕುನ್ ಸುಂಬ್ ಜಾಲ್ಲ್ಯಾ ಹಾಚೆರ್ ತಾಂಣಿ ಪಾಂಯ್ ತೆಂಕ್ತಾನಾ, ತಾಂಚೆ ಕಿಚಡ್ ಮಾತಿಯೆಚಿ ಘಾಣ್ ತಾಕಾ ಯೆತಾ. ಪುಣ್ ತಾಚೆ ಚಲಿಯೆನ್ ಗುಡ್ಡಾಯ್ಲ್ಯಾರ್ ತಾಂತ್ಲ್ಯಾನ್ ಮೊಗಾಚಿಂ ಮಹಿಮಾಂ ರುಜೊನ್ ಯೆಂವ್ಚಿಂ ಸಪ್ಣೆತಾ.
ಚಾ.ಫ್ರಾ. ದೆಕೊಸ್ತಾನ್ ಜಿವಿತಾಚ್ಯಾ ಅಸ್ತಮ್ತೆಚ್ಯಾ ಕಾಳಾರ್ ಲಿಖ್‌ಲ್ಲಿ ಕವಿತಾ ಹಿ. ಮಾಗೀರ್ ಮೊಗಾಕ್ ಪ್ರಾಯ್ ಮ್ಹಳ್ಳಿ ಆಸ್ತಾ ಕಾಂಯ್?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸುಂಬಾಚೆಂ ಆನಿ ಪಾಯ್
ಶೆವ್ಟಿಂ ಜಾಲೊಂ ಹಾಂವ್ ಸುಂಬಾಚೆಂ
ಹೆಂ ಕಾರ್ಬಾರ್ ಮ್ಹಜ್ಯಾ ಮೊಗಾಚೆಂ
ಮ್ಹಾಕಾ ದಾರಾರ್ ಉಬತ್ ಘಾಲಾಂ
ತಾಂಣಿ ಸಗ್ಳ್ಯಾಂನಿ ಪಾಯ್ ಪುಸ್ಲ್ಯಾತ್
ಕಿಚಡ್‌ಮಾತಿ ಗುಡ್ಡಾವ್ನ್ ಆಯ್ಲ್ಯಾತ್
ಮ್ಹಜೆರ್ ಯೇವ್ನ್ ಪಾಯ್ ಘಾಸ್ಲ್ಯಾತ್
ಕಾಂಯ್ ಗುರು ಕಾಂಯ್ ಶಿಸ್
ತಾಂಣೀಯ್ ಮ್ಹಜೆ ಚಾರೆ ತಾಸ್ಲ್ಯಾತ್
ಕಾಂಯ್ ಆಮಿಗ್, ಕಾಂಯ್ ದುಸ್ಮಾನ್
ಮ್ಹಜ್ಯೊ ಶಿರೇನ್ ಶಿರೊ ಲಾಸ್ಲ್ಯಾತ್
ಥೊಡೆ ಮ್ಹಾಕಾ ಸಾಂಬಾಳ್ಳಲೆ
ತಾಂಣೀಯ್ ಮ್ಹಜೆರ್ ಪಾಯ್ ಘಾಸ್ಲ್ಯಾತ್
ಥೊಡೆ ಮ್ಹಾಕಾ ಕಾಂಟಾಳ್ಳಲೆ
ತಾಂಣೀಯ್ ಮ್ಹಜ್ಯೊ ಕಾತಿ ಧೊಸ್ಲ್ಯಾತ್
ಕೊಣೇಂಯ್ ರಾಗಾನ್ ಕೊಣೇಂಯ್ ಮೊಗಾನ್
ಭರೊನ್ ಮ್ಹಜೆ ಕಾಂಟೆ ಪಿಸ್ಲ್ಯಾತ್
ಮ್ಹಜಿಂ ವ್ಹಡಾಂ, ಮ್ಹಜಿಂ ಭುರ್ಗಿಂ
ತಾಂಣೀಯ್ ಮ್ಹಜೆರ್ ಜಾಳ್ ಪೊಸ್ಲ್ಯಾತ್
ಶೆವ್ಟಿಂ ಜಾಲೊಂ ಹಾಂವ್ ಸುಂಬಾಚೆಂ
ಹೆಂ ಕಾರ್ಬಾರ್ ಮ್ಹಜ್ಯಾ ಮೊಗಾಚೆಂ
ಮೊಗಾ, ತುಜೊ ಮಸ್ತೊ ಪಾಂವೊ
ಮ್ಹಜ್ಯಾ ತೊಂಡಾರ್ ಘಾಸ್ಲೊಚ್ ನಾ
ಲಾಕ್‌ಲಾಕ್ ಪಾಂಯಾಂ ಮಧೆಂ
ತುಜೊ ಕೆದಿಂ ದಿಸ್ಲೊಚ್ ನಾ
ಪಾಂಯ್‌ಜಣಾಂಚೊ ಖಿಣ್ಕುಳೊ
ಕಾನಾಂಕ್ ಕೆದಿಂ ಭಾಸ್ಲೊಚ್ ನಾ
ಮೊಗಾ ರಾಗಾ ಭೇದ್‌ಭಾವ್
ಲಾಚಾರ್‌ಪಣಿಂ ಸೊಸ್ಲೊಚ್ ನಾ
ಶೆವ್ಟಿಂ ಜಾಲೊಂ ಹಾಂವ್ ಸುಂಬಾಚೆಂ
ಹೆಂ ಕಾರ್ಬಾರ್ ಮ್ಹಜ್ಯಾ ಮೊಗಾಚೆಂ
ಯೋ ಯೋ ಲೊಟುನ್ ಮೊಡುನ್
ತುಜೋಯ್ ಪಾಯ್ ಮ್ಹಜೆರ್ ನಾಚೊಂ
ಬಾಕಿ ರಾಗಾನ್ ಮಸ್ತಿತಾನಾ
ತುಜೆ ಉಡ್ಕೆಂತ್ ಮೋಗ್ ರುಜೊಂ
ಪಾಂಯ್‌ಜಣಾಂಚೆ ತಾಳ್ ಮೆಜ್ತಾಂ
ಪಡ್ಲ್ಯಾ ಪಡ್ಲ್ಯಾಕಡೆನ್ ಶಿಜೊಂ
ಹಾಂವ್ ಸುಂಬಾಚೆಂ: ತುಜೊ ಪಾಯ್
ಮೋಗ್ ಕರ್‍ತಾಂ ಸರ್ಗ್ ಲಜೊಂ
ಶೆವ್ಟಿಂ ಜಾಲೊಂ ಹಾಂವ್ ಸುಂಬಾಚೆಂ
ಹೆಂ ಕಾರ್ಬಾರ್ ಮ್ಹಜ್ಯಾ ಮೊಗಾಚೆಂ.
-ಚಾ.ಫ್ರಾ. ದೆಕೊಸ್ತಾ