ಕವಿತಾ:
ಮಧುರೆ ದೊಳೆ ತೆ ತುಜೆ
ತುಜ್ಯಾ ತ್ಯಾ ಪಾಚ್ವ್ಯಾ ತ್ಯಾ ದೊಳ್ಯಾಂಕ್ ರಚ್ತಾನಾ ಬಾಯೆ
ದೆವಾಕ್ ಖಂಯ್ಚ್ಯಾ ಆಂಜಾಚೊ ಉಡಾಸ್ ಆಯಿಲ್ಲೊ?
ಭುಮಿ ವೈಕುಂಟಾಚ್ಯಾ ಪಾಚ್ವ್ಯಾ ಚರೊವಾಚೆರ್
ಭೊಂವುನ್ ಆಸ್ತಾಂ ತಾಂಚಿ ಸೊಭಾಯ್ ತಾಣೆ ಮಾಖ್ಲಿ?
ಕಾಜುಲ್ಯಾ ದೊಳ್ಯಾಂಕ್ ಚಂದ್ರಾಚೊ ಉಜ್ವಾಡ್
ನಿತಳ್ ಆಸ್ಡ್ಯಾ ವೊಳಿಂನಿ ವಿಚಿತ್ರ್ ಘಡಾಪ್
ಪಾಚ್ವ್ಯಾಪಣಾಂತ್ ವಿಚಿತ್ರ್ ಮಾಧಕ್‍ಪಣ್ ಉದಂಡ್
ಎಕ್ಯೆ ದಿಷ್ಟಿಂತ್‍ಚ್ ರಾವುನ್ ವಚತ್ ಕಾಳ್ಜಾ ಉಡಪ್
ತುಜ್ಯಾ ದೊಳ್ಯಾಂಕ್ ಏಕ್ ಪಾವ್ಟಿಂ ಪಳಯ್ಲ್ಯಾರ್ ಪುರೊ
ಪಿಯೆಲ್ಲ್ಯಾಬರಿ ಜಾಯ್ತ್ ಬೊತ್ಲ್ ಕಾಜುಚೊ ಸೊರೊ
ತುಜ್ಯಾ ದೊಳ್ಯಾಂಚ್ಯಾ ಎಕಾಚ್ ಖತ್ಕತೆ ದಿಷ್ಟಿಂತ್
ವೊಡ್ತಾಂತ್ಲೆ ಹಜಾರ್ ಗುಲೊಬ್ ಲಜೆಂವ್ಕ್‍ಯ್ ಪುರೊ
ತುಜ್ಯಾ ದೊಳ್ಯಾಂಚಿ ಸುರುಪಾಯ್ ಪಿಂತ್ರಾಂವ್ಕ್ ಬಾಯೆ
ಖಂಯ್ಚ್ಯಾ ಕಲಾಕರಾಕ್ ಭಾಡ್ಯಾಕ್ ಹಾಡುಂ?
ತಾಂಚಿ ಸೊಭಾಯ್ ಖರಿಚ್ ವರ್ಣುಂಕ್ ಸದಾಂ
ಖಂಯ್ಚ್ಯಾ ಕವಿಕ್ ಪರಾತ್ತುನ್ ವಿಚಾರುಂ?
ಪುಜಾರಿ ಹೊ, ಕರ‍್ಚೊ ತುಜ್ಯೆ ಸೊಭಾಯೆಚೆಂ ಆರಾಧನ್
ಉಚಾರ‍್ನ್ ಸಾಂಗ್ತಾಂ ಉಗ್ತೆಂ ಕರುನ್ ಹೆಂ ಮನ್
ಆಶಾ ಹಿ ಸಭಾರ್ ದಿಸಾಂಚಿ ಖಾಲ್ತ್ಯಾ ಕಾಳ್ಜಾಚಿ
ಉಮಾಳ್ಯಾಂನಿ ಭರ‍್ಲಲಿ ಖರೆ ದಾಧೊಸ್ಕಾಯೆಚಿ
ಸೊಡ್ಚಿ ತರ್, ದೊಳ್ಯಾಂಚೊ ಏಕ್ ಪಾವ್ಟಿಮ್ ಉಮೊ ಘೆವ್ನ್
ಕಾಳ್ಜಾ ವೆಂಗೆಂತ್ ಮೊಗಾನ್ ಆರಾವ್ನ್ ಧರುನ್
ಖಂಯ್ಚ್ಯಾ ಕವಿನ್ ಬರೊಂವ್ಚ್ಯಾಕ್‌ಯ್ ಉಂಚ್ಲ್ಯೊ ಕವಿತಾ
ಗುಪಿತ್‌ಪಣಿ, ಹ್ಯಾ ಮನಾಂ ಪಾನಾಂನಿ ಬರೊವ್ನ್ ಕಾಡಿನ್
-ಕ್ಲೆರೆನ್ಸ್ ಕೈಕಂಬ