ಸಂಪಾದಕೀಯ್:
ಎಕೆಕ್ಲ್ಯಾಚ್ಯೊ ಎಕೇಕ್ ವೊಳಿ
ಹ್ಯೊ ಮರ್‍ಣಾಂತ್ ಸಂಪನಾತ್‌ಲ್ಲ್ಯೊ ವೊಳಿ. ಜಿವಿತಾಂತ್ಲ್ಯಾ ಮಿಸಾಂವಾನ್ ರುತಾ ಕೆಲ್ಲ್ಯೊ ವೊಳಿ ಜಿವಿತ್ ಸಂಪ್ಲ್ಯಾರಿ ಜಿಯೆಲ್ಲೆ ಜಿಣ್ಯೆಚಿ ಗೊವಾಯ್ ಜಾವ್ನ್ ಶಾಸ್ವಿತ್ ಉರ್‍ಚೆ ತಸಲ್ಯೊ. ಕೊಣಾಚೆ ವೊಳಿಂನಿ ಫುಲಾಂ ಫುಲ್ತಿತ್ ಆನಿ ಕೊಣಾಚೆ ವೊಳಿಂನಿ ಘಾಣೆರೆಂ. ಪುಣ್ ಕಿತೆಂ ನಾ ಕಿತೆಂ ಆಸ್ತಲೆಂಚ್.
ಹೆ ಕವಿತೆಂತ್ಲೊ ವೆಕ್ತಿ, ಜಾಂವ್ಕ್ ಪುರೊ ಸ್ವತಾ ಕವಿ - ಅಸಲೆ ವೊಳಿಂಚೊ ಉಡಾಸ್ ಕಾಡ್ತಾ ಆನಿ ಏಕ್ ಸೊಭಿತ್ ಕವಿತಾ ಲಿಖುನ್ ಹೆಂ ಋಣ್ ಫಾರಿಕ್ ಕರ್‍ಚೆಂ ಪ್ರೇತನ್ ಕರ್‍ತಾ. ಬಾಪಾಯ್ಚೆ ವೊಳಿಂನಿ ಫುಲಾಂ ಫುಲ್ತಾಲಿಂ ತರ್ ಹಾಚೆ ವೊಳಿಂನಿ ಕವಿತಾ!
ಕವಿ ಆಂಡ್ರು ಸಮಕಾಲೀನ್ ಕೊಂಕಣಿ ಕವಿಂ ಪಯ್ಕಿ ಉಂಚ್ಲೆ ಪಂಗ್ತಿರ್ ಆಸ್ಚೊ ಕವಿ. ಸಭಾರ್ ತೆಂಪಾಥಾವ್ನ್ ಭುಂಯ್ ಪಡ್ತಾ ಪಡ್ತಾ ಮ್ಹಣೊನ್ ಪಾಟಿಂ ಉರ್‌ಲ್ಲೆಂ ತಾಚೆಂ ಫುಡ್ಲದ್ ಕವಿತಾಪುಸ್ತಕ್ 'ವ್ಹಳೂ ವ್ಹಳೂ ವ್ಹಾಳ್ ವೊಳ್ಯಾ' ಹ್ಯಾಚ್ ಮ್ಹಯ್ನ್ಯಾಚ್ಯಾ ನಿಮಾಣ್ಯಾ ಹಫ್ತ್ಯಾಂತ್ ಪರ್‍ಗಟ್ ಜಾಂವ್ಚ್ಯಾರ್ ಆಸಾ. 'ದಾಯ್ಜಿ ದುಬಾಯ್' ಎಕ್ತಾರಾಚೊ ಸಂಪಾದಕ್ ತೊ. ಮಾಯ್‌ಭಾಸ್ ಅಂತರ್‌ಜಾಳಿಚೆರ್ 'ಕವಿತಾ ವ್ಹಾಳೊ' ಅಂಕಣ್ ತೊ ಚಲಯ್ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ವೊಳಿ
ಪಣ್ಗಿಲ್ ಪಡ್‌ಲ್ಲೆ ಕುಮೆರಿಂತ್
ಆಜೂನ್‌ಯ್ ದಿಸ್ತಾತ್ ಉಬ್ಯೊ
ಬಾಬಾನ್ ಸಾಂಟಾಳಿನಾಸ್ತಾನಾ
ಬಾಕಿ ಉರ್‌ಲ್ಲ್ಯೊ
ತ್ಯೊ ವೊಳಿ
ಪಯ್ಸ್ ಸಿಮಿಸ್ತ್ರಿಂತ್
ಕುಂಬು ಖುರ್‍ಸಾಕ್ ಲಕವ್ನ್
ಲಿಪ್‌ಲ್ಲ್ಯಾ ದುಬ್ಳ್ಯಾ ಫೊಂಡಾರ್
ತ್ಯಾ ಸುಕೆ ಮಾತ್ಯೆರ್
ವಾತಿ ಜಳನಾಸ್ತಾಂ
ವರ್‍ಸಾಂ ಸಂಪ್ಲಿಂ ತರೀ
ಹ್ಯೊ ವೊಳಿ ದಿಸ್ತಾತ್ ಜಿವ್ಯೊ
ತಣಾನ್ ನೆಟವ್ನ್
ಫುಲಾಂನಿ ಸುಂರ್‍ಗಾರಾಯಿಲ್ಲ್ಯಾ
ನವ್ಯಾ ಜಿವ್ಯಾ
ಫೊಂಡಾಭಾಶೆನ್
ಬಾಬಾನ್ ವರ್‍ಸಾಂನಿ ವರ್‍ಸಾಂ
ದೆಂವಯಿಲ್ಲ್ಯಾ ಘಾಮಾಕ್
ಜಿರಯಿಲ್ಲ್ಯಾ ಇಟಾಕ್
ಸಾಕ್ಸ್ ಜಾವ್ನ್
"ಫುಲಾಂ ಹಾತಾಂನಿ ಮಾತಿ ಆಪಡ್ನಾಯೆ
ಖೊರೊಜ್ ಜಾಯ್ತ್...ಬರಂವ್ಕ್ ಜಾಂವ್ಚೆಂ ನಾ"
ಲಾಗಿಂ ಗೊಬ್ರಾ ಕೊಡ್ಕ್ಯಾ ಹುಂಬ್ರಾರ್ ಬಸವ್ನ್
ಮಾತ್ಯಾ ವಯ್ಲ್ಯಾನ್ ಬೊಯಿಂಗ್ ಉಬ್ತಾನಾ
ಮಾತ್ಯೆ ಹಾತಾಂನಿ ಮೊಳ್ಬಾಕ್ ಉಕಲ್ನ್
"ತುವೆಂಯ್ ಉಬಜಾಯ್ ಪುತಾ"
ಉತ್ರಾಂ ಜಿವಿಂ ಜಿವಿಂ
ಕಾಳ್ಜಾಕ್ ಫಾಪ್ಸಿತಾತ್
ಬರಂವ್ಕ್ ಶಿಕೊನ್ ಉಬ್ಚ್ಯಾದಿಂ ಹಾಂವ್
ಥಕ್‌ಲ್ಲೊ ಅತ್ಮೊ ಉಬೊನ್ ಗೆಲೊ
ಸರ್‍ಗಾ ವಿಶೆವಾಕ್
ಬೆಳೆಂ ಪಿಕವ್ನ್
ತುಪೆಂ ಬಾಂದುನ್
ವರ್‍ಸಾನ್ ವರ್‍ಸ್ ಉಬೊನ್ ಯೆತಾಂ
ಸುಕ್ಯಾ ಫೊಂಡಾ ಬದ್ಲಾಕ್
ಜಿವೆ ವೊಳಿಂಕ್ ದೆಖ್ತಾಂ
ಮುಳಾಕ್ ಘಾಲ್ನ್, ವೊಳಿ ಬಾಂದ್ತಾನಾ
ಖೊರೆಂ ಪಿಕ್ಕಾಸ್ ಉಬಾರ್‍ತಾನಾ
ನಿತ್ರಾಣಿ ಜಿವಾಚಿ ತಿ
ಖರಸ್ ಉಸ್ವಾಸ್...ಪಿಂರ್ಗೊಣಿ
ವೊಳಿಂಚ್ಯಾ ಭಿತರ್ ಭಿತರ್ ಆಯ್ಕತಾಂ...
ಋಣ್ ಫಾರಿಕ್ ಕರುಂ ತರೀ ಕಶೆಂ?
ಹಾಂವ್‌ಯ್ ಬಾಂದ್ತಾಂ ವೊಳಿ
ಲಿಕ್ಣೆನ್ ಉಸ್ತಿತಾಂ
ಬಾಬಾಚ್ಯಾ ವೊಳಿಂಚಿ
ತಿ ಸೊಭಾಯ್, ತೊ ಈಟ್
ಕವಿತಾ ವೊಳಿಂನಿ ವ್ಹಾಳಂವ್ಕ್
ಖರೆಂಚ್ ಖರ್‍ಶೆತಾಂ
- ಆಂಡ್ರು ಡಿ'ಕುನ್ಹಾ