ಸಂಪಾದಕೀಯ್:
ಮಲೆಕೊಡಿಚೆಂ ಮಾತೆಂ ಕೊಂಕಣಿ ಕವಿಂಚ್ಯಾ ಕಾವ್ಯಾಳ್ ಉತ್ರಾಂನಿ ಸಜ್ಲಾಂ
ಮಲೆಕೊಡಿ, ಮಂಗ್ಳುರಾ ಭಾಯ್ರ್ ಬಂಟ್ವೊಳ್ ಆಲ್ಲಿಪಾದೆ ಲಾಗ್ಸಾರ್ ಏಕ್ ಶಾಂತ್ ದೊಂಗ್ರಾ ಸುವಾತ್, ಜಂಯ್ ಕವಿತಾ ಟ್ರಸ್ಟಾನ್ 2008 ಫೆಬ್ರೆರ್ ಮ್ಹಯ್ನ್ಯಾಂತ್ ಕವಿಗೋಷ್ಟಿ ಮಾಂಡುನ್ ಹಾಡ್‌ಲ್ಲಿ. ಬಂಧ್ ದಾರಾಂ ಭಿತರ್, ಸಾಲಾಂನಿ ಕವಿಗೋಷ್ಟಿ ಮಾಂಡುನ್ ಹಾಡ್ಚ್ಯಾಕ್‌ಯ್ ಉಗ್ತ್ಯಾ ಸುವಾತೆಂನಿ, ರುಕಾ ಮುಳಾಂನಿ, ನಂಯ್ಚೆ ತಡಿರ್, ದೊಂಗ್ರಾ ಮಾತ್ಯಾರ್, ಚಾರಿತ್ರಿಕ್ ಜಾಗ್ಯಾಂನಿ ಕವಿಗೋಷ್ಟಿ ಮಾಂಡುನ್ ಹಾಡ್‌ಲ್ಲ್ಯಾಂತ್ ಚಡಿತ್ ಅರ್ಥ್ ಆಸಾ, ಉಪ್ಕಾರ್‌ಯ್ ಆಸಾ ಮ್ಹಣ್ ಹಾಂವ್ ಆನಿ ಮ್ಹಜೆ ಕವಿತಾ ಟ್ರಸ್ಟಾಚೆ ವಾಂಗ್ಡಿ ಮಾನ್ತಾತ್.
ಮಲೆಕೊಡಿ ಉಪ್ರಾಂತ್ ದುಬಾಯ್ ಸಫಾ ಪಾರ್ಕಾಂತ್, ಉಪ್ರಾಂತ್ ಬೋವ್‌ಶ್ಯಾ ತಾಕೊಡೆ ದೊಂಗ್ರಾರ್, ಬಾರ್ಕೂರ್ ಕೊಟ್ಯಾಂತ್ - ಅಶೆಂ ಹ್ಯಾ ವರ್ಸಾ ಕಾಂಯ್ ಧಾ ಜಾಗ್ಯಾಂನಿ ತರೀ ಆಮ್ಕಾಂ ಕವಿಂಕ್ ಸಾಂಗಾತಾ ಮೆಳೊಂಕ್ ಆಸಾ. ಅಸಲೆ ಮುಲಾಕತೆಂಕ್ ಆನಿ ಕಸಲೆ ಬರೆ ಜಾಗೆ ಮೆಳ್ತಿತ್?
ಮಲೆಕೊಡಿಚ್ಯಾ ದೊಂಗ್ರಾರ್ ಜಾಲ್ಲೆ ಕವಿಗೋಷ್ಟಿ ಉಪ್ರಾಂತ್ ಲಿಖ್‌ಲ್ಲಿ ಕವಿತಾ ಹಿ. ಮಲೆಕೊಡಿಚಿ ತಾಂಕ್ ಹಿ. ಕವಿಂಚಿಂ ಕಾಳ್ಜಾಂ ಪೊಕೊರ್‍ಚಿ ಕಲಾ ಮಲೆಕೊಡಿ ಥಂಯ್ ಆಸ್‌ಲ್ಲಿ ತೆಂ ಹಾಂವೆಂ ಪಾರ್ಕಿಲ್ಯಾ. ಥಂಯ್ಸರ್ ಆಮಿ ದಾಧೊಸ್ ಜಾಲ್ಯಾಂವ್ ಖರೆಂ, ಸಾಂಗಾತಾ ಮಲೆಕೊಡಿ ಕಿತ್ಲೆಂ ಧನ್ಯ್ ಜಾಲೆಂ ಕೊಣ್ಣಾ! ಮಲೆಕೊಡಿ ತಸಲೆ ಕಿತ್ಲೆ ಜಾಗೆ ಆಮ್ಚ್ಯಾ ಭೊಂವಾರಾಂತ್ ಆಸಾತ್ ಜಾಂವ್ಕ್ ಪುರೊ, ಸಾಂಗೊನ್ ಧಾಡಾ ಆಮಿ ಯೆತಾಂವ್ ಆನಿ ತುಮ್ಚ್ಯಾ ಭೊಂವಾರಾಚ್ಯಾ ವಾರ್‍ಯಾಂತ್ ಕೊಂಕಣಿ ಕಾವ್ಯಾಳ್ ಉತ್ರಾಂಕ್ ಉಪ್ಯೆಂವ್ಕ್ ಸೊಡ್ತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮಲೆಕೊಡಿ
ಕಾಲ್‌ಚ್ ಲಗಿನ್ ಜಾಲ್ಲ್ಯಾ
ಕಾಜಾರಿ ಜೊಡ್ಯಾಚ್ಯಾ ಕುಡಾಂತ್
ಖಬ್ರೆವಿಣೆಂ, ಕಳಯ್ನಾಸ್ತಾಂ ಘುಸ್‌ಲ್ಲ್ಯಾಬರಿ -
ಮಲೆಕೊಡಿಚ್ಯಾ ಮಾತ್ಯಾಕ್ ಪಾವ್ಲಾಂ
ದೊಂಗ್ರಾಚ್ಯಾ ಶಾಂತ್‌ಪಣಾಂತ್-
ಬುಡ್ಚ್ಯಾ ಸುರ್ಯಾಚಿಂ ಕಿರ್ಣಾಂ
ಚಾಂದಡ್ಯಾಚ್ಯಾ ಖೊಲ್ಯಾಂ ಲಾಗಿಂ ಮಿರಯ್ತಾನಾ
ಪಯ್ಶಿಲ್ಯಾ ನೇತ್ರಾವತಿಂತ್‌ಯ್
ಮೊಸ್ರಾಚಿ ಭರ್‍ತಿ ಯೆತಾ
ರಾಂದ್ಣಿಚ್ಯಾ ಉಜ್ಯಾರ್
ಕೊಣಾಚ್ಯಾ ತೊಂದ್ರಾಂತ್
ಪಣ್ಸಾಚ್ಯಾ ಪಾತೊಳ್ಯಾಂಕ್ ಪರ್ಮಳ್
ದೀಂವ್ಕ್ ಸಕ್ಚೆ ಖೊಲೆ
ರುಕಾರ್ ಆಸೊನ್‌ಚ್, ಕಿರ್ಣಾಂಚೆ ಉಬೆಕ್
ಥಕ್‌ಲ್ಲ್ಯಾ ಕಾಳ್ಜಾಂನಿ
ಪರ್ಮಳ್ ಫುಂಕ್ಚೆಂ ತ್ರಾಣ್ ಜೊಡ್ತಾತ್
ಸಾಂಜೆ ಮಾರುತಾಚೆ ಮೊವ್ಸಾಣೆಂತ್
ಚಾಂದಡ್ಯಾಚ್ಯಾ
ಝಡೊಂಕ್ ರಾವ್‌ಲ್ಲ್ಯಾ -
ಸೊವ್ಲ್ಯಾಂನಿ ಸಯ್ತ್
ಸೊಳಾಂಚೆ ಚಲಿಯೆಚೊ ಉದ್ರೇಕ್!
ಮೊಳ್ಬಾಚ್ಯಾ ಮಸ್ತಕಾಚೆರ್ ಪುನವ್ ಫುಟ್ತಾನಾ
ದಣ್ಸಲ್ಲ್ಯಾ ಮುರ್‍ಯಾಂಚೆರ್ ಪಾಂಯ್ಜಣಾಂಚಿಂ ಝಣ್‌ಝಣಾಂ..
ತಣಾಚ್ಯಾ ಮುಳ್ಕಾಟಾಂಚೊ ಲೆಗುನ್
ಉರ್ಬೆಚೊ ನಾಚ್
ಯೇ ಮ್ಹಜ್ಯಾ ಮಲೆಕೊಡಿ
ತಾಂಡುಂ ಕಶ್ಯೊ ಮ್ಹಜ್ಯೊ ಕಾಳ್ಜಾ ಉಡಿ!
ಯೇ ಮ್ಹಜ್ಯಾ ಮಲೆಕೊಡಿ
ಹಾಂಗಾಚ್ ರಾವ್ಯಾಂ ಜಾತಾ ಘಡ್ಯೆನ್ ಘಡಿ
ಯೇ ಮ್ಹಜ್ಯಾ ಮಲೆಕೊಡಿ
ಖಿಣಾಕ್ ಮ್ಹಾಕಾ ವೆಂಗೊನ್ ಧರ್
ಯೇ ಮ್ಹಜ್ಯಾ ಮಲೆಕೊಡಿ
ವ್ಯಾಧಿ ಮ್ಹಜ್ಯೊ ಶಮನ್ ಕರ್!
-ಮೆಲ್ವಿನ್ ರೊಡ್ರಿಗಸ್
कविता:
मलेकोडी
कालच लगीन जाल्ल्या
काजारी जोड्याच्या कुडांत
खबरेविणें, कळयनासतां घुसल्ल्याबरी -
मलेकोडीच्या मात्याक पावलां
दोंग्राच्या शांतपणांत-
बुडच्या सुर्याचीं किरणां
चांदड्याच्या खोल्यां लागीं मिरयताना
पयशिल्या नेत्रावतिंतय
मोस्राची भरती येता
रांदणीच्या उज्यार
कोणाच्या तोंद्रांत
पणसाच्या पातोळ्यांक पर्मळ
दीवंक सकचे खोले
रुकार आसोनच, किरणांचे उबेक
थकल्ल्या काळजांनी
पर्मळ फुंकचें त्राण जोडतात
सांजे मारुताचे मोवसाणेंत
चांदड्याच्या
झडोंक रावल्ल्या -
सोवल्यांनी सयत
सोळांचे चलयेचो उद्रेक!
मोळबाच्या मस्तकाचेर पुनव फुटताना
दणसल्ल्या मुर्यांचेर पांयजणांचीं झणझणां..
तणाच्या मुळकाटांचो लेगून
उरबेचो नाच
ये म्हज्या मलेकोडी
तांडूं कश्यो म्हज्यो काळजा उडी!
ये म्हज्या मलेकोडी
हांगाच राव्यां जाता घड्येन घडी
ये म्हज्या मलेकोडी
खिणाक म्हाका वेंगोन धर
ये म्हज्या मलेकोडी
व्याधी म्हज्यो शमन कर!
-मेल्विन रोड्रीगस