ಸಂಪಾದಕೀಯ್:
ಆಪುಣ್ ಶಿರ‍್ಕಲ್ಲೆ ಸಲ್ವಣೆಚ್ಯೆ ಶಿಂಕ್ಳೆಂತ್ ಆನ್ಯೆಕ್ಲೊ ಶಿರ‍್ಕತಾನಾ
ಕಾಳ್ಜಾಂ ಚಿರ‍್ಚಿ ಕಲಾ ಬರಿಚ್ ಶಿಕ್‌ಲ್ಲೆ ಚಲಿಯೆವಿಶಿಂ ಹಿ ಕವಿತಾ ಉಲಯ್ತಾ. ಆಪುಣ್ ಸಲ್ವಲ್ಲಿ ಬೆಜಾರಾಯ್ ಹಾಂಗಾಸರ್ ನಾಯಕಾಕ್ ಆಸಾ ತರೀ, ಹ್ಯೆ ಎಕ್ಯೆ ಸಲ್ವಣೆಚೆ ಶಿಂಕ್ಳೆಂತ್ ಆನ್ಯೇಕ್ ವ್ಯಕ್ತಿ ಶಿರ‍್ಕತಾನಾ ತಾಚಿ ಬೆಜಾರಾಯ್ ಮಾತ್ಶಿ ಪಯ್ಸ್ ಸರ‍್ತಾ ಮ್ಹಳ್ಳೆಬರಿ ಭೊಗ್ತಾ. ಹ್ಯೆ ಕವಿತೆಂತ್ ಜಿವಿತಾಂತ್ ಘಡ್ಯೆತ್ ಜಾಲ್ಲ್ಯಾ ಘಡಿತಾಚೊ ಏಕ್ ತುಕ್ಡೊ ಆಸಾ ಸೊಡ್ಲ್ಯಾರ್ ಕಾಳ್ಜಾಂ ಪೊಟ್ಲುನ್ ಧರ‍್ಚ್ಯಾ ಉತ್ರಾಂಚೊ ಚಮತ್ಕಾರ್ ಜಾಂವ್, ಅಲಂಕಾರಾಚೊ ಜಾದು ಜಾಂವ್ ನಾ.
ಕ್ಲೆರೆನ್ಸ್ ಕೈಕಂಬ ಆಪ್ಲ್ಯಾ ಮಟ್ವ್ಯಾ ಕಾಣಿಯಾಂ ಖಾತೀರ್ ಭಾರಿಚ್ ಫಾಮಾದ್. ತರೀ ಅಪ್ರೂಪ್ ಕವಿತಾ ಶೆತಾಂತ್ ನಾಗ್ರಾಂವ್ಚೆಂ ಬರೆಂ ಮನ್ ತಾಚೆಂ.
ಹಾಂವ್ ತರೀ ತಾಚೆಥಾವ್ನ್ ಹ್ಯೆ ಕವಿತೆಚ್ಯಾಕೀ ಬಳಾಧಿಕ್ ಕವಿತಾ ಆಶೆತಾಂ. ತಾಚಿ ತಾಕತ್ ತಿತ್ಲಿ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ದೀಷ್ಟ್
ತುಜ್ಯೆ ದಿಶ್ಟಿಂತ್ಲೊ
ಉಜೊಗೋ ಚೆಡ್ವಾ
ಸಾಣೆಕ್ ಧರಲ್ಲೆ
ಕಾತ್ರಿ ಧಾರಿಕ್
ಉಟ್‌ಲ್ಲ್ಯಾ ಕಿಟಾಳಾಂ
ಭಾಶೆನ್
ಹ್ಯಾ ಕಾಳ್ಜಾಕ್
ಧೊಮ್ಸುನ್
ವಿಭಾಡ್ತಾನಾ
ಹಾಂವ್ ತುಜೆರ್ ಸಲ್ವಲೊಂ
ಮ್ಹಣ್ ಚಿಂತುಂಕ್ ಲಾಗ್ಲೊಂ....
ಜೀವನ್ ಹೆಂ
ತುಜೆ ಸಂಗಿಂ
ನಂದನ್ ಜಾತಲೆಂ
ಮ್ಹಣ್ ಚಿಂತ್ತಾನಾ
ತುಂ ಮಾತ್ರ್
ಮ್ಹಜ್ಯೆ ವಯ್ಲಿ ದೀಶ್ಟ್
ಕಾಡುನ್
ಆನಿ ಎಕ್ಲ್ಯಾಕ್
ತುಜ್ಯೆ ದಿಷ್ಟಿ ಉಜ್ಯಾನ್
ಹುಲ್ಪಾಂವ್ಕ್ ಭಾಯ್ರ್ ಸರ್‌ಲ್ಲೆಂಯ್.
-ಕ್ಲೆರೆನ್ಸ್ ಕೈಕಂಬ