ಸಂಪಾದಕೀಯ್:
ಆಮಿ ಹುಮೆದಿಚೊ ಪಾವ್ಸ್ ವೊತ್ತಾನಾ, ತುಮಿ ಕವಿತೆಚೊ ತೆರೊ ಕಿರ್‍ಲಯಾ
ತೆರ್‍ಯಾ ಪಾನಾಚೆ ಗೂಣ್ ಸಾಂಗೊಂಕ್ ವಚೊನ್, ತಾಂಚೆ ಪಯ್ಕಿ ಎಕಾ ಗುಣಾಕ್ ಬಾಯ್ಲಾಂಚ್ಯಾ ಗುಣಾಂಕ್ ಸರಿ ಕರ್‍ಚೆಂ ಕಾಮ್ ಬೋವ್ ಸೊಂಪ್ಯಾನ್, ಸಮ್ಜೊಂಚೆಪರಿಂ, ಬಳ್ವಂತ್ ರಿತಿನ್ ಕವಿ ಹಾಂಗಾಸರ್ ಕರ್‍ತಾ. ಕಸಲೆಂ ಏಕ್ ಜವ್ಳೆಂ ರೂಪ್ (ಮೆಟಾಫರ್) ಕವಿನ್ ಹಾಂಗಾಸರ್ ವಾಪರ್‍ಲಾಂ ಪಳೆಯಾ. ಮಾಗೀರ್ ಹೆ ಕವಿತೆಂತ್ ತೊ ತೆರ್‍ಯಾ ಪಾನಾಲಾಗಿಂ ಸಂವಾದ್ ಚಲಯ್ತಾ ಆನಿ ಬಿಲ್ಕುಲ್ ಬಾಯ್ಲೆಚೆರ್ ಬೋಟ್ ಜೊಕಿನಾ ಆನಿ ಶಾಬೀತ್ ಥಾರ್‍ತಾ.
ನವ್ಯಾನ್ ಕವಿತಾ ಬರಯ್ತಲ್ಯಾಂನಿ ಹೆ ಕವಿತೆಚೆ ಗೂಣ್ ಆನಿ ಹೆ ಕವಿತೆನ್ ಸಾಂಗ್‌ಲ್ಲೆ ಗೂಣ್ ಮತಿಂತ್ ಧರ್‍ಲ್ಯಾರ್ ಜಾಲೆಂ.
ಆನಿ ಆತಾಂ ಪಾವ್ಸಾಂತ್ ಸಗ್ಳ್ಯಾನ್‌ಯ್ ತೆರೊಚ್ ತೆರೊ. ತುಮ್ಚೆ ಮತಿಂತ್‌ಯ್ ತ್ಯಾಚ್ ಮಾಪಾನ್ ಕವಿತೆಚೊ ತೆರೊ ಕಿರ್‍ಲೊಂ ಮ್ಹಣೊನ್ ಆಮ್ಚಿ ಆಶಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತೆರೊ
ತೆರ್‍ಯಾ ಪಾನಾ ತೆರ್‍ಯಾ ಪಾನಾ
ತುಜಿ ಪಿಡಾ ಕಸಲಿ ಕಳನಾ
ಕಾಂಪ್ ಕುಲ್ಕುಲೊ
ತುಜ್ಯಾ ಆಂಗಾರ್ ಆಸಾ
ಕಾಂಯ್ ತುಕಾ ಹಿಂವ್ ಸೊಸನಾ?
ತೆರ್‍ಯಾ ಪಾನಾ ತೆರ್‍ಯಾ ಪಾನಾ
ತುಂ ಲೆಂವ್ತಾಯ್ ಕಿತೆಂ ಕಳನಾ
ಪಾವ್ಸಾ ಥೆಂಬೊ
ತುಜ್ಯಾ ವೊಂಟಾರ್ ಆಸಾ
ಕಾಂಯ್ ತುಜಿ ತಾನ್ ಮರನಾ?
ತೆರ್‍ಯಾ ಪಾನಾ ತೆರ್‍ಯಾ ಪಾನಾ
ತುಜೆರ್ ಉದಕ್ ಜಿರ್‍ನಾ ಕಿತ್ಯಾ ಕಳನಾ
ತುಜೊಚ್ ಗೂಣ್
ಹ್ಯಾ ಬಾಯ್ಲಾಂಕ್ ಆಸಾ
ತಾಂಚ್ಯಾಯ್ ಜಿಬೆರ್ ಉತರ್ ಉರನಾ.
-ಮಾವ್ರಿಸ್ ಡೆಸಾ