ಸಂಪಾದಕೀಯ್:
ಪಾಳ್ಣ್ಯಾಂತ್ಲ್ಯಾ ಬಾಳಾಕ್ ನಿದಾಂವ್ಕ್ ಕವಿತಾ ಖಂಡಿತ್ ಜಾಯ್
ಕವಿತಾ ಮ್ಹಳ್ಯಾರ್ ಅಶಿಚ್ ಆಸಾಜಾಯ್ ಮ್ಹಣ್ಚೆ ದೀಸ್ ಗೆಲೆ. ಕವಿತಾ ಏಕ್ ಅನ್ಭೋಗಾಚೊ ತುಕ್ಡೊ ಜಾಲ್ಯಾರ್ ಜಾಲೆಂ ಮ್ಹಣ್ಚೆ ದೀಸ್ ಆಯ್ಚೆ. ಹ್ಯಾ ತುಕ್ಡ್ಯಾಂನಿ ಸಯ್ತ್ ಕಾಳ್ಜಾಂ ಫುಲೊಂವ್ಚಿ ತಾಕತ್ ಆಸ್ತಾ, ಜಶೆಂ ಹಾಂಗಾಸರ್ ದಿನೇಶ್ ಕೊರೆಯಾಚೆ ಕವಿತೆಂತ್ ಆಸ್‌ಲ್ಲ್ಯಾಬರಿ. ಕವಿ ಕಿತೆಂ ಸಾಂಗೊಂಕ್ ಆಶೆತಾ ತೆಂ ಸಮ್ಜೊಂ ಯಾ ನಾ ಸಮ್ಜೊಂ, ತಾಣೆಂ ಸಾಂಗ್‌ಲ್ಲಿ ರೀತ್ ಆಮ್ಕಾಂ ದಾಧೊಸ್ಕಾಯೆಚ್ಯಾ ಪಾವ್ಸಾನ್ ನ್ಹಾಣಯ್ಲ್ಯಾರ್ ತಿತ್ಲೆಂಚ್ ಪಾವನಾ?
ದಿನೇಶಾಕ್ ಪಾಟ್ಲ್ಯಾ ಆಟ್ ವರ್ಸಾಂ ಥಾವ್ನ್ ತರೀ ಹಾಂವ್ ಜಾಣಾಂ. ತಾಚಿ ಪ್ರತಿಭಾ ಶೆಂಭರಾಂತ್ ಏಕ್ ವಾಂಟೊ ಸಯ್ತ್ ಜಾಣಾಂ ಜಾಂವ್ಚೆಂ ಭಾಗ್ ಆಮ್ಕಾಂ ಲಾಭೊಂಕ್ ನಾ. ತಿತ್ಲೆ ದುರ್ದೈವಿ ಆಮಿ ಮ್ಹಣೊಂ! ಹಾಕಾ ದಿನೇಶಾಚಿ ಆಳ್ಸಾಯ್ ಕಾರಣ್ ಮ್ಹಣೊಂ? ನಾ, ವೈಯುಕ್ತಿಕ್ ಕಾರಣಾಂ ಜಾಯ್ತಿಂ ಆಸ್ತಿತ್. ತಿಂ ಸಗ್ಳಿಂ ಕಾರಣಾಂ ಭಾಯ್ರ್ ದವರ್ನ್, ಆಯ್ಲೆವಾರ್ ಕವಿನ್ ಬಾಪಯ್ ಜಾಲ್ಲೆಂ ಘಡಿತ್ ಮತಿಂತ್ ಖಂಚಯ್ಲ್ಯಾರ್ ಹಿ ಕವಿತಾ ರಂಗಾಳ್ ದಿಸೊಂಕ್ ಲಾಗೊಂಕ್ ಪುರೊ.
ದಿನೇಶಾನ್ ಹ್ಯಾ ಫುಡೆಂ ಸರಾಗ್ ಹಾಂಗಾಸರ್ ಯೇಜಾಯ್. ತಾಚೆ ಥಂಯ್ ಕೊಂಕಣಿ ಕಾವ್ಯ ಶೆತಾಕ್ ಮೊತಿಯಾಂನಿ ನೆಟೊಂವ್ಚಿ ಸಕತ್ ಆಸಾ ತೆಂ ಆಮಿ ಜಾಣಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಯ್ಚಿ ಕವಿತಾ
ಮೊಗಾ,
ಹ್ಯಾ ಸೊಭಿತ್ ಜಾಂಬ್ಳಿ ಕುತಾಂವಾರ್,
ಮಾತ್ಯಾರ್ ಮಾಳ್ಳಲ್ಯಾ ರಸ್ಮಿ ಉರ್ಮಾಲಾರ್
ಕಸೊಂ ಸೊಭ್ತಾಂ ಹಾಂವ್?
ಆದ್ಲ್ಯಾ ಆಗೊಸ್ತಾಂತ್ ಮಾಂಡ್‌ಲ್ಲಿ ಮಾತಿ
ಧವ್ಯಾಚ್ ಕುಡ್ಕ್ಯಾನ್ ಪುಸುನ್ ಕಾಡ್ನ್
ಜನೆಲಾಂ ಆಮ್ಚಿಂ `ಚಕಾಚಕ್' ಸಾಫ್ ಕೆಲ್ಯಾಂತ್
ತರ್
ಆತಾಂ ಆಸೊರ್‌ಚ್ ಆಸೊರ್;
ದೊಳ್ಯಾಂತ್ ಉರ್‌ಲ್ಲೊ ಏಕ್ ಶೆಣೊ ಸಯ್ತ್ ಸುಕ್ಲಾ -
ಆನಿ ಆಬ್ಳೆ
ಫಕತ್ ಫೆಸ್ತಾಂಚ್ ಫೆಸ್ತಾಂ
ಶಿಂತಿದ್ ನಾಸ್ತಾಂ!
ಸಾಂಗ್ ಮೊಗಾ...
ಇತ್ಲ್ಯಾ ರೂಂದ್ ಹಾಸ್ಯಾಂನಿ
ಸೊಭಿತ್ ದಿಸ್ತಾಂ-ಮೂ ಹಾಂವ್?
ಜಾಣಾಂಯ್?
ಆಯ್ಲೆವಾರ್‌ಚ್ ಆಮ್ಚ್ಯಾ ವೊಡ್ತಾಂತ್
ಮ್ಹೊಂವಾ-ಮುಸಾಂನಿ ಫೊಳಿ ಬಾಂಧುಂಕ್ ಧರ್ಲ್ಯಾ!
ಉಬ್ಚಿ ಆಶಾ ಉಬ್ಜತಚ್
ಹ್ಯಾ ಗಿಮಾಂತ್ ಸುಖಾಳ್ ಧಗ್ -
ಮ್ಹಳ್ಯಾರ್ ಆಜ್-ಫಾಲ್ಯಾಂಚ್ ಪಾವ್ಸಾಚಿ ನಿಶಾನಿ ಕಶಿ
ಮತಿ-ಮೊಳ್ಬಾರ್ ದಿಸ್ತಾ...
ಕಾಳಿಜ್‌ಭರ್ ಕಾಂತಾರಾಂ
ಗಿತಾರಾಂ!
ಉತ್ರಾಂ ಉತ್ರಾಂ-ಕಾವ್ಯಾಂಚ್ ಕಾವ್ಯಾಂ!
ಯೇ ಮೊಗಾ,
ಮಧುರ್ ಏಕ್ ಗೀತ್ ಗಾವ್ಯಾಂ!
-ದಿನೇಶ್ ಕೊರೆಯಾ