ಸಂಪಾದಕೀಯ್:
ಸವಾಲಾಂನಿ ಗುಟ್ಲಲ್ಲಿ ಸೊಭಾಯ್ ಕವಿತೆಂತ್ ದೆಂವಯಿಲ್ಲಿ ಕವಯಿತ್ರಿ
ಪ್ರಕೃತೆಕ್ ಪಿಸೊ ಜಾಯ್ನಾತ್‌ಲ್ಲೊ ಕೊಣ್ ನಾ? ಕವಿ ಮನೋಹರ್ ಸರ್ದೇಸಾಯಿ ಪ್ರಕೃತೆವಿಶಿಂ ಬರಯ್ತಾನಾ ಅಶೆಂ ಸಾಂಗ್ತಾ: ಸಾನ್ ವೆಂಗೆಂತ್ ಆವ್ಳುಂ ಕಶಿ ಸಂಸಾರಾಚಿ ಆಪುರ್ಬಾಯ್, ದರ್ಯಾಯೆದೆ ಹಾತ್ ಜಾಯ್. ತಸಲಿ ಏಕ್ ಸೊಭಾಯ್ ಪೊಟ್ಲುನ್ ಧರುಂಕ್ ದರ್ಯಾಯೆದೆ ಹಾತ್‌ಯ್ ಪಾಂವ್ಚೆಂನಾಂತ್ ಆನಿ ಸುರ್ಯಾತೆದೆ ದೊಳೇಯ್ ಪಾಂವ್ಚೆನಾಂತ್. ತಸಲಿ ಪ್ರಕೃತಿ ಆಮ್ಚಿ. ತಸಲೆ ಪ್ರಕೃತೆಚ್ಯೊ ಕುಸ್ಕುಟ್ ಕಾಂಯ್ ಗಜಾಲಿ ಸಂಧ್ಯಾ ಬಾಯ್ ಆಮ್ಚೆ ಮುಕಾರ್ ಹಾಂಗಾಸರ್ ದವರ್‍ತಾ.
ಸಂಧ್ಯಾ ಶೇವಗೂರ್ ಪಯ್ಲೆಚ್ ಪಾವ್ಟಿಂ ಕವಿತಾ ಕುಳಾರಾಕ್ ಆಯ್ಲ್ಯಾ. ತಿಚೆಂ ಮನ್ ಆನಿ ಕಾಳೀಜ್ ಸೊಭಿತ್. ಸೊಭಾಯ್ ಆಶೆತಾ. ತಶೆಂ ಆಶೆಲ್ಲ್ಯಾಂಕ್ ಮಾತ್ರ್ ಅಶೆಂ ಕವಿತಾ ಬರೊಂವ್ಕ್ ಜಾತಾ.
ತಿ ಫಕತ್ ಸವಾಲಾಂ ವಿಚಾರ್‍ತಾ. ಅಸಲ್ಯಾ ಎಕೆ ಸೊಭಾಯೆ ಪಾಟ್ಲೆಂ ಗಿನ್ಯಾನ್ ತಿಚ್ಯಾನ್ ಜೊಡುಂಕ್ ಜಾಯ್ನಾತ್‌ಲ್ಲ್ಯಾನ್ ಅಸಲಿಂ ಸವಾಲಾಂ. ಪುಣ್ ತಶೆಂ ಸವಾಲಾಂ ಕರುಂಕ್ ವಚೊನ್, ಜಾಪ್ ತಿಣೆಂಚ್ ಸೊಧುನ್ ಕಾಡ್‌ಲ್ಲ್ಯಾಬರಿ ಆಮ್ಕಾಂ ಭೊಗ್ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಹೊ ವೈಭವ್
ತ್ಯಾ ಮೊರಾಲೆ ನಾಂಚಾಂತ್
ತಿರ್‌ತಿರ್ ಪಾವ್ಲಾಂತ್
ತ್ಯೊ ಮೊಡ್ಯೊ ಭರಲ್ಯಾ ಕಿತ್ಯಾಕ್?
ತ್ಯಾ ಫುಲ್ಲಾ ಕಳ್ಯಾಂತ್
ತ್ಯಾ ಫುಲ್ಲೇಲೆ ಪಾಕ್‌ಳ್ಯಾಂತ್
ಪೊರಂಬೊಳು ನಿಪ್ಲಾ ಕಿತ್ಯಾಕ್?
ತ್ಯಾ ಕೋಯ್ಲಿಲೆ ಗಾಯನಾಕ್
ತ್ಯಾ ಝಿಂಗುರ್ ವಾಜಪಾಕ್
ಹೃದಯ ಭೊರ್‍ನು ಯೆತ್ತಾ ಕಿತ್ಯಾಕ್?
ತ್ಯಾ ಪಾಚ್ವೆ ವರ್‍ಲಾಂತ್
ಭೂದೇವಿಲೆ ಮ್ಹಾರಾಂತ್
ಹ್ಯಾ ರಂಗ್‌ರಂಗ್ ರಂಗ್‌ಲ್ಯಾ ಕಿತ್ಯಾಕ್?
ಹ್ಯಾ ಸಾಯಿ ಸಾಯಿ ವಾರ್‍ಯಾಂತ್
ತ್ಯಾ ಶೀತಲ್ ಸ್ಪರ್ಶಾಂತ್
ಗುಪೀತ ಪ್ರಾಣ್ ಕಿತ್ಯಾಕ್?
ತ್ಯಾ ನಿತ್ತಳ ಗಂಗೇಂತ್
ತ್ಯಾ ಘನ ಘರ್ಜನೇಂತ್
ಶಾಂತಿ ನಿಪ್ಲ್ಯಾ ಕಿತ್ಯಾಕ್?
ಹೊ ವೈಭವ, ಹೀ ವ್ಹಡವೀಕ
ಹೀ ಸೊಭಾಯಿ ತೀ ಮೋಹಕ
ಮನ ಚೊರ್‍ತಾ, ಲುಟ್ತಾ ಕಿತ್ಯಾಕ್?
-ಸಂಧ್ಯಾ ಶೇವಗೂರ್