ವರ್ಸಾಚೆಂ ಕಾಪಡ್

ಸಂಪಾದಕೀಯ್:

ನೆಣಾರ್‍ಯಾಂಕ್ ಶಿಕೊಂವ್ಚಿ, ಜಾಣಾರ್‍ಯಾಂಕ್ ಪೊಶೆಂವ್ಚಿ ಪಿಯುಸಾಚಿ ಕವಿತಾ

ಗಾಂವ್ಚೆಂ, ದುಬ್ಳೆಂ ಏಕ್ ಜಿವಿತ್ ಹಾಂಗಾಸರ್ ಕವಿನ್ ವೊಳ್ಳಾಂ. ಕಾಂಯ್ ಆತಾಂಚೆ ಪಿಳ್ಗೆಕ್ ತೆಂ ಕಿತ್ಲೆಂ ವೊಳ್ಕಿಚೆಂ ತೆಂ ಹಾಂವ್ ನೊಕೊ. ಕಳಿತ್ ನಾತ್‌ಲ್ಲ್ಯಾಂಕ್ ಕಳಿತ್ ಕರುನ್, ಕಳಿತ್ ಆಸ್‌ಲ್ಲ್ಯಾಂಕ್ ತ್ಯಾ ಎಕಾ ಆದ್ಲ್ಯಾ ಉಡಾಸಾಂತ್ ಪಾಟಿಂ ಪಾಸಾಯೊ ಮಾರುಂಕ್ ಆಪೊವ್ನ್ ವ್ಹರುನ್ ಮ್ಹಳ್ಳೆಬರಿ ಹಿ ಕವಿತಾ ಭುಂಯ್ ಪಡ್ಲ್ಯಾ. ಸಂಪಿ ದಿಸ್ತಾ ತರೀ ಎಕಾ ನಮುನ್ಯಾಚೆಂ ಜಿವಿತ್ ಸಗ್ಳೆಂ ವಾಚ್ಪ್ಯಾ ಮುಕಾರ್ ಹಾಡ್ಚ್ಯಾಂತ್ ಕವಿ ಯಶಸ್ವಿ ಜಾಲ್ಲೆಬರಿ ದಿಸ್ತಾ.

ಪಿಯುಸ್ ಜೇಮ್ಸ್ ಕರುಗಳ್ನಡೆ ಅಸಲ್ಯಾ ನಮುನ್ಯಾಚ್ಯೊ ಕವಿತಾ ಬರೊಂವ್ಚ್ಯಾಂತ್‌ಚ್ ಫಾಮಾದ್. ತಾಚ್ಯೊ `ನಿಮಾಣಿ ಸೈರಿಕ್', `ಆರ್ಸ್ಯಾಚೆಂ ಘರ್', `ಆಮಿ ತೆಗಿ ಭಯ್ಣಿ' - ಅಸಲ್ಯಾಚ್ ತಾಂತ್ರಿಕತೆನ್ ವಿಣ್ಲಲ್ಯೊ ಕವಿತಾ. ಆಸಲಿಚ್ ಏಕ್ ಶೈಲಿ ಪಿಯುಸಾನ್ ಬರಿಚ್ ಕರುನ್ ಆಪ್ಣಾಚಿ ಕರುನ್ ಘೆತ್ಲ್ಯಾ.

ಆಯ್ಲೆವಾರ್ ಕವಿತಾ ಪಬ್ಲಿಕೇಶನ್ಸಾನ್ ಪಿಯುಸಾಚೆಂ `ನಿಮಾಣಿ ಸೈರಿಕ್' ಕವಿತಾ ಪುಸ್ತಕ್ ಪರ್ಗಟ್ ಕೆಲಾಂ. ಗಾಂವಾನ್ ಬಾರ್ಕುರ್‍ಚೊ ಹೊ ಕವಿ, ಸದ್ದ್ಯಾ ದುಬಾಯ್ ಶೆರಾಂತ್ ವಾವುರ್‍ತಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ವರ್ಸಾಚೆಂ ಕಾಪಡ್

ದೀರೆ ಮ್ಹಾಕಾ ವರ್ಸಾಕ್
  ಏಕ್ ದಿಂವ್ಚೆಂ ಕಾಪಡ್
   ವರ್ಸಾಂ ಆದಿಂ ಹಾಡ್‌ಲ್ಲೆಂ
    ದರ್ಜಿ ಹಾತಾಂತ್ ವೊಳ್‌ಲ್ಲೆಂ
     ಆಂಗಾರ್ ಮ್ಹಜ್ಯಾ ವೊಡ್‌ಲ್ಲೆಂ
      ಆತಾಂ ಪಿಂಜುನ್ ತಿರ್ಕುಟ್ ಜಾಲಾಂ
       ಕುಡಿಕ್ ಮ್ಹಜೆ ಲಜೆಕ್ ಘಾಲಾಂ

ದೀರೆ ಮ್ಹಾಕಾ ವರ್ಸಾಕ್
  ಏಕ್ ದಿಂವ್ಚೆಂ ಕಾಪಡ್
   ಕುಶಿಚಿಂ ತಿಂ ಬಾಯ್ಲಾಂ
    ಕರ್‍ತಾತ್ ಮುರೆ ನವ್ಲಾಂ
     ನವೆಂಚ್ ಕಾಪಡ್ ಶಿಂವ್ಲಾಂ
      ಕುಡಿಕ್ ಮ್ಹಜೆ ತುಕುನ್
       ಬೋಟ್ ಮುರೆ ಜೊಕುನ್

ದೀರೆ ಮ್ಹಾಕಾ ವರ್ಸಾಕ್
  ಏಕ್ ದಿಂವ್ಚೆಂ ಕಾಪಡ್
   ಸಾಡ್ಯಾ ಕಾಪಡ್ ಮ್ಹಾಕಾ ನಾಕಾ
    ಮಾಯ್ಪಾಣೋಯ್ ತೊ ನಾಕಾ
     ಸಾಡ್ಯಾವಯ್ಲೆಂ ಪಯ್ಲೆಂಚ್ ನಾಕಾ
      ಶೆಜಾರ್‍ಚ್ಯಾ ಸರ್ವ್ ಬಾಯ್ಲಾಂ ಮಧೆಂ
       ಸದಾಂಕ್ ನ್ಹೆಸ್ಚೆಂ ಏಕ್ ಸಾದೆಂ

ದೀರೆ ಮ್ಹಾಕಾ ವರ್ಸಾಕ್
  ಏಕ್ ದಿಂವ್ಚೆಂ ಕಾಪಡ್
   ಪಾವ್ಸುಳ್ ಆಜ್ ಮಾತ್ಯಾರ್ ಆಯ್ಲೊ
    ಕಾಳ್ಜಾಂತ್ ಮ್ಹಜ್ಯಾ ಕುಲ್ಕುಲೊ ಚರ್‍ಲೊ
     ತಕ್ಲೆಕ್ ತಾಂಚೆ ಶೆಳಿನ್ ಧರ್‍ಲೊ
      ಭುರ್ಗ್ಯಾಂ ಮಾತ್ಯಾರ್ ಪಾಲಂವ್ ವೊಡುಂಕ್
       ವಾರ್‍ಯಾ ಪಾವ್ಸಾಕ್ ಆಡೊಸ್ ಕರುಂಕ್

ದೀರೆ ಮ್ಹಾಕಾ ವರ್ಸಾಕ್
  ಏಕ್ ದಿಂವ್ಚೆಂ ಕಾಪಡ್
   ಕಾಪಡ್ ಪಿಂಜುನ್ ಮಾಸ್ ಇರ್‍ಲಾಂ
    ಕುಡಿಚೆಂ ಹಾಡ್ ದಿಸೊಂಕ್ ಲಾಗ್ಲಾಂ
     ಅಶೆಂ ಕಿತ್ಯಾಕ್ ರಿತೆಂಚ್ ಸೊಡ್ಲಾಂ
      ಮಾನ್ ಮ್ಹಜೊ ರಾಕೊನ್ ವ್ಹರುಂಕ್
       ದುಕಾಂ ಗಳವ್ನ್ ಮಾಗ್ತಾಂ ತುಕಾ

ದೀರೆ ಮ್ಹಾಕಾ ವರ್ಸಾಕ್
  ಏಕ್ ದಿಂವ್ಚೆಂ ಕಾಪಡ್
   ವಾಸೊ ಬಾವ್ಡೊ ಮಾಡಾರ್ ಚಡ್ಲಾ
    ತಣಾ ಭೊರೊ ಯೆವುನ್ ಪಡ್ಲಾ
     ದರ್ಜಿ ಬಾವ್ಡೊ ಶಿಂವೊಂಕ್ ಲಾಗ್ಲಾ
      ನಾರ್ಲಾ ಮಾಡಾ ಮೊಡ್ಲಾಂ ವೊಳ್ಳ್ಯಾಂತ್
       ಎಕೇಕ್ ಕರುನ್ ಆಂಗಾರ್ ವೊಡ್ಲ್ಯಾಂತ್

 ದೀರೆ ಮ್ಹಾಕಾ ವರ್ಸಾಕ್
  ಏಕ್ ದಿಂವ್ಚೆಂ ಕಾಪಡ್
   ಮೊಡ್ಲಾಂ ಘಾಗ್ರೊ ಪೆಂಕ್ಟಾರ್ ವೊಡ್ಲಾ
    ಸುಂಬಾ ದೊರ್‍ಯೆ ನಾಡೊ ಬಾಂದ್ಲಾ
     ತಾಚೆ ವಯ್ಲ್ಯಾನ್ ತಣ್ ಶಿಂವ್ಲಾಂ
      ಹಾಂವ್‌ರೆ ತುಜೆಂ ಕೊಲ್ವಾ ಪಾಕೆಂ
       ನವೆಂ ಕಾಪಡ್ ಆಂಗಾರ್ ಸೊಭ್ಲಾಂ..

- ಪಿ. ಜೆ. ಕರುಗಳ್ನಡೆ, ಬಾರ್ಕುರ್