ಕವಿತಾ:
ತಳ್ಯಾಂತ್ಲಿ ಉಡಿ
ತಳ್ಯಾಂತು ಉಡಿ ಮಾರ್‍ಲಿ ದೊಗಾಂನಿ
ಚೊಯ್ಲಾಂ ಸಾರ್‍ಯಾ ಜಗಾನ್
ಹಾಂವ್ ಸಾಂಗನಾ, ತುಮಿ ಸಾಂಗಾ ನ್ಹಯ್
ರಾಗಾನ್ ಕಿ ವಾ ಮೊಗಾನ್?
ತಳ್ಯಾಚ್ಯಾ ತೊಂಡಾರ್ ಸಾಳ್ಕಾಬಾಯೆನ್
ಆಗ್ಟೆಂ ಕಿತ್ಯಾಕ್ ಜಳಯ್ಲಾಂ?
ಪಾಕ್ಳೆರ್ ಬಸೊನ್, ಭಂವ್ರ್ಯಾ ಬಾಬಾನ್
ಉಜ್ಯಾರ್ ತೇಲ್ ಮೆಳಯ್ಲಾಂ
ತಳ್ಯಾಚ್ಯಾ ತೊಂಡಾರ್ ಫುಟ್ಲೆಂ ಘಾಮಾಳೆಂ
ಭಗ್‍ಭಗ್ಚ್ಯಾ ತ್ಯಾ ಧಗಾನ್
ಹಾಂವ್ ಸಾಂಗನಾ, ತುಮಿ ಸಾಂಗಾ ನ್ಹಯ್
ರಾಗಾನ್ ಕಿ ವಾ ಮೊಗಾನ್?
ತಳ್ಯಾಚ್ಯಾ ಪೊಟಾಂತ್ ಮಸ್ತಿ ಮಾಸೊಳಿ
ಎಕಾಮೆಕಾಕು ಭೊಕಾಯ್ತಾ
ಎಕ್ಲ್ಯಾಚ್ಯಾ ಪೊಲ್ಯಾರ್ ದುಸ್ರಿ ಸೊಂಡಾನ್
ಹುನೊನಿ ಉಮೆ ರಕಯ್ತಾ
ಎಕ್ಲ್ಯಾಚ್ಯಾ ನಾಕಾರ್ ಉದೆತಾ ರಗತ್
ಕಶೆಂ ಮ್ಹಣೊನ್ ಹಾಂವ್ ಸಾಂಗನ್?
ಹಾಂವ್ ಸಾಂಗನಾ, ತುಮಿ ಸಾಂಗಾ ನ್ಹಯ್
ರಾಗಾನ್ ಕಿ ವಾ ಮೊಗಾನ್?
ತಳ್ಯಾಂತ್ ಉಡ್ಲಲಿಂ ಪಾವ್ಲಿಂ ಥಳಾಕ್
ಉಬ್ರಾಂತ್ ಲೊಳೊನ್ ಉಬೆಲಿಂ
ಮಾರ್‍ಲಿಗಾ ಮಿಟಿ ಎಕಾಮೆಕಾಕ್
ಉಮಾಳ್ಯಾಂನಿ ತಿಂ ಗಾಬೆಲಿಂ
ಮಾರ್‍ಲಲಿ ಮಿಟಿ ಲಜೆಕ್ ಲಾಯ್ತಾ
ಚಿತ್ಳಾಕ್ ಜಯ್ಶೆಂ ವಾಗಾನ್
ಹಾಂವ್ ಸಾಂಗನಾ, ತುಮಿ ಸಾಂಗಾ ನ್ಹಯ್
ರಾಗಾನ್ ಕಿ ವಾ ಮೊಗಾನ್?
-ಚಾ.ಫ್ರಾ. ದೆಕೊಸ್ತಾ