ಕವಿತಾ:
ಹಿರಣ್ಯಗರ್ಭ್ ಪುಸ್ತಕಾಂತ್ಲಿ ಕವಿತಾ
ಮ್ಹಜೆ ಕುಡಿಭಾಯ್ರ್ ಕಾಡೂನ್
ಆತಾಂ ಮ್ಹಾಕಾ ತಿ ಮ್ಹಜಿ
ಪಾರ್ಥಿ ಕೂಡ್ ಮಾತ್ಶಿ ದಾಖಯ್
ಕುಡಿಂತ್ಲ್ಯಾನ್ ಭಾಯ್ರ್ ಸರ‍್ಲ್ಯಾ ಉಪ್ರಾಂತ್
ಹಾಂವ್ ಮ್ಹಣೂನ್ ಕಾಂಯ್ ಉರನಾ
ಆನಿ ಮ್ಹಜೆಂ ಮ್ಹಣೂಯ್ ಕಾಂಯಚ್ ಉರನಾ
ಮಾತ್ಯೆನ್, ವಾರ‍್ಯಾನ್, ಮಳ್ಬಾನ್
ಉದ್ಕಾನ್ ತಶೆಂಚ್ ತೇಜಾನ್
ಘೆತ್ಲಲ್ಯಾ ಹ್ಯಾ ಸುಂದರ್ ರುಪಾಚೆಂ
ಅಪ್ರೂಪ್ ದಿಸ್ತಾ
ಸೈಮಾಚೆಂ ಅಜಾಪಾಚೆಂ ರೂಪ್
ಕೆದೊ ವ್ಹಡ್ಲೊ ಜಾದೂ
ಖರೆಂಚ್ ಕಾಂಯಚ್ ನಾಸ್ತಾ ಹ್ಯಾ ಜಾದೂಂತ್
ಸಗ್ಳೊ ಖೆಳ್
ವೇಳ್ ಕಾಡ್ಪಾಕ್
ನಾ ಜಾಲ್ಯಾರ್ ಕಾಳಾಚೊ
ಮಾತ್ಸೊ ವಿಸರ್ ಜಾಂವ್ಚೊ ಮ್ಹಣ್
ಕೆಲ್ಲೊ ಹೊ ಖೆಳ್
ಆತಾಂ ಹೊ ಜಾದೂಯ್ ಉರನಾ
ಉರ‍್ತಾ ಫಕತ್ ಮಾತಿ
ಉರ‍್ತಾ ಫಕತ್ ಉದಕ್
ಉರ‍್ತಾ ಫಕತ್ ವಾರೊ
ಉರ‍್ತಾ ಫಕತ್ ಮಳಬ್
ಉರ‍್ತಾ ಫಕತ್ ತೇಜ್
ಆನಿ ಜೈತ್ ಜಾತಾ
ಉರ್ಜೆಚೆಂ
ಆದಿಪ್ರಾಣಾಚೆಂ
ಆದಿಖಿಣ್‍ಕೆಣಾಂಚೆಂ
ಜಾಕಾ ಅಂತೂಯ್ ನಾ
ಆನಿ ಅನಂತೂಯ್ ನಾ
ಜಾಚಿ ಮಹಾಪ್ರಾಣಾಂಕ್ ಲೆಗೀತ್
ನಾತ್ ನಾಸ್ತಾ
ಖೂಬ್ ಭೊಂವ್ಡಿ ಜಾಲಿ
ಹೆ ಸೂರ್ಯ್‍ಸರ‍್ವೆಶ್ವರಾ
ಪರತ್ ಹೊ ಪ್ರವಾಸ್
ಸುರು ಕರ‍್ಚೆ ಖಾತೀರ್
ಸ್ವಾಸ್ ಉಸ್ವಾಸಾಂಚೆ
ಉಮರ್ಯಾದ್ ಮದ್ಲೆ ಸುಟೆಂತ್
ಮಾತ್ಸೊ ಥಿರಾಯ್
ನಾ ಜಾಲ್ಯಾರ್ ಶಿಂವ್ರಾಯ್
-
ರಮೇಶ್ ಭಗವಂತ್ ವೆಳುಸ್ಕಾರ್