ಶೆಣಿಲ್ಲ್ಯೊ ಯಾದಿ

ಸಂಪಾದಕೀಯ್:

ಭುರ್ಗ್ಯಾಚೆ ಕಳ್ವಳೆ ಪಳೆತಾನಾ ಮನಾಂತ್ ಭಿರಾಂತ್ ಉಟ್ತಾ

ಕವಿತಾ ಟ್ರಸ್ಟಾನ್ ಮಾಂಡುನ್ ಹಾಡಲ್ಲ್ಯಾ ಅಖಿಲ್ ಭಾರತ್ ಭುರ್ಗ್ಯಾಂಚ್ಯಾ ಕವಿತಾ ಸ್ಪರ್ಧ್ಯಾಂತ್ ಪಯ್ಲೆಂ ಇನಾಮ್ ಜೊಡ್ಲಲಿ ಕವಿತಾ ಹಾಂಗಾಸರ್ ದಿಲ್ಯಾ. ಮನ್ಶಾನ್ ಉದರ್ಗತಿಚ್ಯಾ ನಾಂವಾರ್ ಮನ್ಶಾಪಣ್ ಕಶೆಂ ಸಾಂಡ್ಲಾಂ ಮ್ಹಳ್ಳೆವಿಶಿಂ ಏಕ್ ಭುರ್ಗೆಂ ಕಶೆಂ ಚಿಂತುಂಕ್ ಸಕ್ತಾ ಮ್ಹಳ್ಳ್ಯಾಚಿ ಗೊವಾಯ್ ಹೆ ಕವಿತೆಂತ್ ಆಸಾ.  ಹಾಂಗಾಸರ್ ಕಳ್ವಳೆ ಆಸಾತ್; ಖಂತ್ ಆಸಾ; ಬೆಜಾರಾಯ್, ದೂಖ್ ಆಸಾ.

ಪ್ರಜ್ಞಾ ಅವಧೂತ್ ಕಾಮತ್ ಗೊಂಯ್ಚ್ಯಾ ಫೊಂಡಾಂತ್ಲ್ಯಾ ದಾದಾ ವೈದ್ಯ ಹೈಸ್ಕೂಲಾಂತ್ ಧಾವೆ ಕ್ಲಾಶಿಂತ್ ಶಿಕ್ತಾ.  ಕವಿತಾ ಫೆಸ್ತಾ ಸಂದರ್ಭಿಂ ಇನಾಮ್ ಘೆಂವ್ಕ್ ತೆಂ ಸ್ವತಾ ಆಯಿಲ್ಲೆಂ. ತಾಚ್ಯಾ ಮುಖಮಳಾ ವಯ್ಲ್ಯಾ ಪರ್ಜಳಾನ್ ಗಮ್ತಲೆಂಕಿ, ಪ್ರಜ್ಞಾಕ್ ಕವಿತಾ ವಾಟೆರ್ ಚಮ್ಕೊನ್ ವೆಚಿ ಪ್ರಜ್ಞಾ ಬರಿಚ್ ಆಸಾ. ತಾಕಾ ಬರೊಚ್ ಫುಡಾರ್ ಆಸಾ.

ಕವಿತಾ ಟ್ರಸ್ಟ್ ಪ್ರಜ್ಞಾಕ್ ಬರೊ ಫುಡಾರ್ ಆಶೆತಾ

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಶೆಣಿಲ್ಲ್ಯೊ ಯಾದಿ

ಘರಾಚೆಂ ‘ಫ್ಲೆಟ್’ ಜಾಲೆಂ
ಗಾವಾಚೆಂ ಶೆರ್ ಜಾಲೆಂ
ಕಮಿ ಜಾಲೆಂ ಮನ್ಶಾಂ ಮಧ್ಲೆಂ ಆಪ್ಲೆಪಣ್
ಬದ್ಲಾ ಕಣ್ಕಣಿ ಖೂಬ್‍ಶೆಂ ಕಿತೆಂ ಶೆಣ್ಲೆಂ!

ಬಿಯಾಂಚೆ ಭಟೆ, ಆಜ್ಜೆಚಿ ಮಾಂಡಿ
ಕುರ್ಕುಟಾಂತ್ಲೆ ಗಡ್ಡೆ
ಆನಿ ಆಜೋಬಾಲಿ ಕಾಣಿ
ಸಾರಯಲ್ಲೆಂ ಆಂಗಣ್ ಗೆಲೆಂ
ಜಾಣ್ಟೆಪಣ್ ‘ವೃದ್ಧಾಶ್ರಮಾನ್’ ಸಡ್ಲೆಂ
ಬದ್ಲಾ ಕಣ್ಕಣಿ ಖೂಬ್‍ಶೆಂ ಕಿತೆಂ ಶೆಣ್ಲೆಂ!

ಧಾಲಾಂಚೊ ಮಾಂಡ್, ಚವ್ತೆಚಿ ಫುಗ್ಡಿ
ಚಾರಾಂ, ಚುನ್ನಾಂ
ಆನಿ ಭಿಂಡಾಂಚಿ ಕಡಿ
ಪಾಶ್ಚಾತ್ಯ್ ನೃತ್ಯ್ ಆಯ್ಲೆಂ
ಉದರ್ಗತಿ ನಾಂವಾರ್ ರಾನ್ ಕಾಪ್ಲೆಂ
ಬದ್ಲಾ ಕಣ್ಕಣಿ ಖೂಬ್‍ಶೆಂ ಕಿತೆಂ ಶೆಣ್ಲೆಂ!

-ಪ್ರಜ್ಞಾ ಅ. ಕಾಮತ್