ಕವಿತಾ:
ಧಾ ಆಂಕ್ವಾರಿ
ಘರಾಕ್ ಮ್ಹಜ್ಯಾ ಪಂಚ್ವೀಸ್ ಕುಡಾಂ
ಧನ್ ದಳ್ಬಾರಾನ್ ಭರ್‍ಲಾಂ
ಸಾಂಗಾತ್ ಕರುಂಕ್ ನಾಂತ್‍ಚ್ ಬೊಡಾಂ
ಆಜೂನ್ ಆಂಕ್ವಾರ್ ಉರ್‍ಲಾಂ
ಏಕ್ ದೀಸ್ ಆಯ್ಲ್ಯಾತ್ ಘರಾ ದಾರಾ
ದಿವೆ ಘೆವುನ್ ಹಾತಾರ್
ಮದ್ಯಾನೆಚ್ಯಾ ಮದ್ಲ್ಯಾ ವೊರಾ
ತೆಲಾಂ ವ್ಹಾವವ್ನ್ ಮಾತ್ಯಾರ್
ದೊಡಿಂ ಹಜಾರ್ ವರ್ಸಾಂ ಗೆಲ್ಯಾಂತ್
ಜೆಜು ಸರ್ಗಾರ್ ಪಾವೊನ್
ತುಮ್ಚಿ ಕಶಿಂ ತಕ್ಲಿಂ ಮೆಲ್ಯಾಂತ್
ದಿವೆ ಹಾಡ್ಲ್ಯಾತ್ ವ್ಹಾವವ್ನ್
ಕುಶಿಕ್ ಮಾರಾ ತುಮ್ಚೊ ದಿವೊ
ತೆಲಾಂ ಧರ್ಣಿರ್ ಶಿಂಪಾ
ಉಜ್ವಾಡ್ ಮೆಳೊಂಕ್ ಜಿವೊ ಜಿವೊ
ವಿಜೆ ಬುತಾಂವ್ ದಾಂಬಾ
ಸೊಧುನ್ ಆಯ್ಲ್ಯಾತ್ ತುಮಿ ನೊವ್ರ್ಯಾಕ್
ಮ್ಹಾಕಾ ಸಾಂಗೊನ್ ದಿಶಾತ್?
ಧಾಯಿ ಫುಲಾಂ ಎಕಾ ನೊವ್ರ್ಯಾಕ್
ಕಶಿಂ ಲಾಗಿಂ ಘೆಶಾತ್?
ಆಶಾ ಸೊಡಾ ನೊವ್ರ್ಯಾಂಕ್ ಧರ್‍ಚಿ
ಘರಾಂತ್ ಕೊವೆಂತ್ ಘಡಾ
ಸರ್ಗಾ ರಾಜಾ ವಾಟೊ ಧರ್‍ಚಿ
ಏಕಚ್ ಆಶಾ ಸೊಡಾ
ಹೇಯ್ ಆಶೆಂತ್ ದಿಶಾ ದಿಸೊಂ
ಘರಾಂತ್ ಉಜ್ವಾಡ್ ಭರಾ
ನೊವ್ರೊ ತುಮ್ಚೊ ಜೆಜುಚ್ ಆಸೊಂ
ಮ್ಹಾಕಾ ಚಾಪ್ಲೇಯ್ನ್ ಕರಾ
-ಚಾ.ಫ್ರಾ. ದೆಕೊಸ್ತಾ