ಕವಿತಾ:
ಭಟಾಚಿ ಪಾವ್ಲಿ
ಭಿಕೆ ಖಾತೀರ್ ಭಟಾನ್
ಜೊಡ್ಲೆ ಹಾತ್ ಕಿ ಮಾರ್‍ಲಿ ದಾವ್ಲಿ
ದಿಲೆ ದಿಂವ್ಚ್ಯಾನ್ ನೆಟಾನ್
ಪಂಚ್ವೀಸ್ ಪಯ್ಶಾಂ ಧವಿ ಪಾವ್ಲಿ
ಹಾತ್‌ಸೊ ಚುಕೊನ್ ಪಾನಾರ್
ಉಶ್ಟ್ಯಾ ವೊರ್‍ನಾಂತ್ ಪಡ್ಲಿ ಪಾವ್ಲಿ
ಯೆತಚ್ ಭಟಾಭಾನಾರ್
ಗೊರ್‍ಶಿ ತಾಚಿ ಸೊಂಡಿ ಬಾವ್ಲಿ
ಕಾಡ್ಟೊ ಮ್ಹಳ್ಯಾರ್ ಹಾತಾನ್
ಭಷ್ಟಿ ಉಷ್ಟೆಂ ಹಾತಾಕ್ ಲಾಗ್ತಾ
ಧುಂವ್ಯೆತ್ ಗಾಯೆ ಮುತಾನ್
ತರ್ ಭ್ಯೆಂ ವಿಂಗಡ್ ಮತಿಂತ್ ರಿಗ್ತಾ
ಮಾಗಿರ್ ಮ್ಹಣ್ಟಿತ್ ದೆಖ್ಚೆ
ಭಟ್‌ಸೊ ಅಸೊ ಕಿತ್ಯಾಕ್ ವಾಗ್ತಾ?
ಲಜೆ ಮಾನಾವಿಣೆಂ
ಉಷ್ಟ್ಯಾ ವೊರ್‍ನಾಂತ್ ಪಾವ್ಲಿ ಪಾಗ್ತಾ
ಖೊಲೊ ಕವ್ಳೂನ್ ತಾಣೆ
ಧುಂವ್ಚ್ಯಾಕ್ ಮಾಡಾ ಮುಳಾಕ್ ವೆಲೆಂ
ಉದ್ಕಾಕ್ ಘುಂವ್ತಾಂ ತೆಣೆ
ಸುಣ್ಯಾನ್ ಪಾನಾವಯ್ಲೆಂ ಖೆಲೆಂ
ಸುಣ್ಯಾ ಮ್ಹಜ್ಯಾ, ರಾಯಾ
ವೊರ್‍ನ್ ಪುರ್‍ಯಾನ್ ಪುರೆಂ ಭೊಕಾಯ್
ಕರ್‌ರೆ ಮ್ಹಜೆರ್ ದಯಾ
ಪಾವ್ಲಿ ಮ್ಹಜಿ ಖಾಯ್ನಾಕಾಯ್
ವೊರ್‍ನಾ ಸಮೇತ್ ಸುಣ್ಯಾನ್
ಪಾವ್ಲಿ ಘೆತ್ಲಿ ಆಪ್ಲ್ಯಾ ಪೊಟಾಕ್
ಪಾನ್ ತೆಂ ಖಾಲಿ ಖಿಣಾನ್
ಆಘಾತ್ ಜಾಲೊ ಆಮ್ಚ್ಯಾ ಭಟಾಕ್
ಆತಾಂ ಆಶೆನ್ ಭೊಂವ್ತಾ
ಸುಣ್ಯಾ ಪಾಟ್ಲ್ಯಾನ್ ರಾತಿ ದಿಸಾ
ಕೆನ್ನಾಂಯ್ ಪಾವ್ಲಿ ಗಳತ್
ಮ್ಹಳ್ಳಿ ತಾಕಾ ಜಬ್ಬೊರ್ ಆಶಾ
ಹ್ಯಾಯಿ, ಸುಣ್ಯಾಕ್, ದೆವಾ
ಖರಾಯ್ ಜಾಲ್ಯಾ ದೆಕುನ್ ಆತಾಂ
ವೆಗಿಂ ಭಾಯ್ರಿ ದೀಗಾ
ಪಾಂಚ್ ಪಯ್ಶೆ ತುಕಾ ದಿತಾಂ
-ಚಾ. ಫ್ರಾ. ದೆಕೊಸ್ತಾ