ಸಂಪಾದಕೀಯ್:
ಮುರ್ಗಟೊನ್ ವೆಚ್ಯಾ ಎಕಾ ರಾಷ್ಟ್ರಾಚೆ ಸಂಕೇತ್
ಆಮೇರಿಕಾಕ್ ವೆಚಿಂ ಸಪ್ಣಾಂ ವ್ಹಾವಯಿಲ್ಲೊ ಮನೀಸ್ ಕಸೊ ಅಕಾಂತ್‍ವಾದಾ ವರ್ವಿಂ ಥರ್ಥರೊನ್ ಗೆಲ್ಲ್ಯಾ ವೆವೆಗ್ಳೆ ಸಂಗ್ತಿಂಚ್ಯೊ ಕುರ್‍ವೊ ಪಾರ್ಕಿತಾ ಪಳೆಯಾ! ಎಂಪಾಯರ್ ಸ್ಟೇಟ್ ಬಾಂದಪ್, ಪಾಕಿಸ್ತಾನಿ, ಸ್ವತಂತ್ರ್ ಸಾಯ್ಬಿಣ್, ಮಿಲಿಟ್ರಿ ವಿಮಾನ್ ಆನಿ ತಿತ್ಲೆಂ ಮಾತ್ರ್ ನ್ಹಯ್, ದಶೆಂಬ್ರಾಚ್ಯಾ ಹಿಂವಾಳ್ಯಾಕ್ ಭಿಯೆವ್ನ್ ಸಪ್ತೆಂಬ್ರಾಂತಚ್ ಪ್ರಾಣ್ ಸೊಡ್ಚಿಂ ಪಾಚ್ವಿಂ ಪಾನಾಂ. ಹ್ಯೊ ಸರ್ವಯ್ ಸಂಗ್ತಿ ಮುರ್ಗಟೊನ್ ವೆಚ್ಯಾ ಆಮೇರಿಕಾಚೆ ಸಂಕೇತ್ ಕಶೆ ಹಾಂಗಾಸರ್ ವ್ಯಕ್ತ್ ಜಾಲ್ಯಾತ್. ಮಾಗೀರ್ ಕವಿ ಆಮೇರಿಕಾಂತ್ ಆಸಾ ಜಾಲ್ಲ್ಯಾನ್, ಅಸಲಿ ಏಕ್ ಗಜಾಲ್ ತಾಕಾ ಬರೀ ಕಳಿತ್ ಆಸಾ ಮ್ಹಣೊನ್ ಜಾಲೆಂ.
ಎಂಟನಿ ಬಾರ್ಕೂರ್ ಆಪ್ಲ್ಯಾ ಹರ್‍ಯೆಕೆ ಕವಿತೆ ಮಾರಿಫಾತ್ ಪ್ರಬುದ್ಧತೆಚಿಂ ಪಾವ್ಲಾಂ ಕಾಡುನ್ ಆಸಾಂ. ಫುಡಾರಾಂತ್ ಯೇಂವ್ಕ್ ಆಸ್ಚ್ಯಾ ಕೊಂಕಣಿ ಕವಿತೆಂಚ್ಯಾ ಬರ್‍ಯಾ ದಿಸಾಂಚೆ ಗೂಣ್ ತಾಚ್ಯಾ ಕವಿತೆಂನಿ ಝಳ್ಕತಾತ್.
ಆಯ್ಲೆವಾರ್ ತಾಚೊ ‘ಕಾಟ್ ತುಟ್ಚೊ ವೇಳ್’ ಕವಿತಾ ಪುಸ್ತಕ್ ಪರ್ಗಟ್ ಜಾಲಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಏರ್‌ಪೋರ್ಟಾಂತ್... ಅಶೆಂ ಏಕ್ ಅಮೆರಿಕನ್ ಡ್ರೀಮ್...!
ಹಡ್ಸನ್ ನಂಯ್ಚೆ ಪಲ್ತಡಿ...
ಬಾರೀಕ್-ಶಿ ಏಕ್ ಧುಂವ್ರಾ ದೊರಿ,
ಧರ್ಣಿ ಥಾವುನ್ ವಯ್ರ್ ಉಡ್ತಾ -
ಎಂಪಾಯರ್ ಸ್ಟೇಟ್ ಬಾಂಧ್ಪಾ ಮುಕಾರ್,
ಪಡ್‌ಲ್ಲೊ ಭರ್ವಸೊ ಬಾಂಧ್‌ಚೆ ಆಶೆನ್;
ವಿಮಾನಾರ್ ಭೆಟ್‌ಲ್ಲೊ ಪಯ್ಣಾ-ಮಿತ್ರ್,
ಮುಹಮ್ಮದ್ ಅಕ್ಬರ್,
ಇಮ್ಮಿಗ್ರೇಶನಾ ಥಾವುನ್ ಭಾಯ್ರ್ ಸರುಂಕ್
ಧಡ್ಬಡ್ತಾ..!
ಕರಾಚಿಚೊ ಕರಾಳ್ ಉಗ್ಡಾಸ್ ವಿಸರ್‍ಚೆ ದಿಶೆನ್,
ಉದ್ಕಾ ಮಧೆಂ ಉಬೆ
ಸ್ವತಂತ್ರ್ ಸಾಯ್ಬಿಣಿಚೊ ಭಿಂವ್ಕುರೊ ಚಾರೊ
ಕಿತೆಂ ಕೆಲ್ಯಾರೀ ಮಾಜ್ವನಾ ...
ಆಪ್ಣಾಕ್‌ಯ್ ಆಪ್ಟಾತ್‌ಗೀ ಮ್ಹಣ್
ಭೊಂವಾಡೊ ಮಾರ್ಚೆಂ ಮಿಲಿಟ್ರಿ ವಿಮಾನ್;
ಹಾಂವ್ ಏರ್ ಪೊರ್‍ಟಾಚೆ ಆರ್ಸ್ಯಾ ವೊಣ್ತಿ ಥಾವುನ್
ಭಾಯ್ರ್ ಚೊಯ್ತಾಂ.
ಹ್ಯಾಲೊವಿನಾಚೆ ಭೂತ್,
ವರ್ಸಾಭರ್ ಗಾಂವಾರ್ ಭೊಂವ್ಚೆ ದಿಸ್ತಾತ್;
ಸರ್ವಾಂಕ್ ತಾಂಚೆಂ ಗುಮಾನ್.
ದಸೆಂಬ್ರಾಚ್ಯಾ ಹಿಂವಾಳ್ಯಾಂಕ್ ಭಿಯೆವ್ನ್ ಪಾನಾಂ
ಸಪ್ತೆಂಬರಾಂತ್‌ಚ್ ರುಕಾಂಚೆ ಹಾತ್ ಸೊಡುನ್ ಪೊಳ್ಚಿಂ
ದಿಸ್ತಾತ್;
ನ್ಯೂಯಾರ್ಕ್ ಸಗ್ಳೊ ಸುಕ್ಯಾ ಪಾನಾಂಚಿ ಸಾಂತ್ -
ಹಳ್ದುವಿಂ, ತಾಂಬ್ಡಿಂ ಆನಿಂ ಥೊಡಿಂ ಕಾಳಿಂ.
ಧರ್ಣಿರ್ ಪಡ್‌ಲ್ಲ್ಯಾ ಪಾನಾಂಕ್ ಪಳೆವ್ನ್
ಹಳ್ತ್ ಕಾಂಪ್, ಲೊಕಾ ಪೊಟಾಂತ್;
ಭರ್ವಸ್ಯಾ ಕಿರ್‍ಣಾಂ ಥಂಯ್ ನಾಂತ್;
ಪಾಚ್ವಿಂ ಪಾನಾಂ ಫಕತ್
ಆತಾಂ ಇಂಡಿಯಾ ಆನಿ ಚೈನಾಂತ್.
- ಎಂಟನಿ ಬಾರ್ಕೂರ್