ಕವಿತಾ:
ಬಾಂಯ್
ತ್ಯಾ ಆಟ್ರಾ ಮುಂಡಾಂಚ್ಯಾ
ಝರಿಚೆ ಬಾಂಯ್ಚೆರ್
ಸರ್‍ವಾಂಚೆ ದೊಳೆ
ಸಗ್ಳ್ಯಾ ಗಾಂವಾಚೆ
ಭಿಜ್ಲೆ ಗಳೆ
ಖೊಂಡ್‌ಲ್ಲೆಂ ತಾಂಣಿ ಗುಡ್ಯಾರ್
ಕೊಸ್ಳೊಂಕ್ ಸೊಡಿನಾಸ್ತಾಂ ಕಶ್ಟಾಂನಿ
ಬಾಬಾನ್ ಬಾರಾ ಮೂಂಡ್
ಪುತಾನ್ ಸ ಮೂಂಡ್
ಇಂಗ್ಲಿಶ್ ಮೀಡಿಯಮ್ ನಾತು ತೇಗ್
ಘಡ್ಯೆ ಘಡ್ಯೆ ತಿಳ್ತಾಲೆ
ಗುಂಡಾಯ್ ಮೆಜ್ತಾಲೆ
ಮಾತ್ಯೆಂತ್ ಖೆಳ್ತಾಲೆ
ಅಬೇಸ್ ಆರ್‍ಯಾಕ್ ಹಾಸ್ತಾಲೆ
ಖೊಂಡ್‌ಲ್ಲೆ ತೆ ಮ್ಹಾಲ್ಘಡೆ
ಘಾಮ್ ವ್ಹಾಳವ್ನ್
ಶೆತ್ ಪಿಕವ್ನ್
ಸರೊನ್ ಗೆಲೆ
ಝರಿಚೆ ವಾಂಟೆ ಕರಿನಾಸ್ತಾಂ
ವಾಂಟೆ ಕರ್‍ಚ್ಯಾಕ್ ಶೆತಾಚೆ ಆತಾಂ
ನಾತ್ವಾಂನಿ ತೆಗಾಂ
ಯಂತ್ರಾಂ ತಂತ್ರಾಂ ಶಿಂತ್ರ್ಯಾಂನಿ
ಖೊಂಡ್ಲಿಂ ತೀನ್ ಬೋರ್‌ವೆಲಾಂ
ಬಾಂಯ್ಚ್ಯೊ ಝರಿ ಶಿರೊ ಕಾತ್ರುನ್
ಸರ್‍ವಾಂನಿ ಸಾಂಡುನ್ ಘಾಲ್ಲಿ
ಸುಕೊನ್ ವೆಚಿ ಬಾಂಯ್
ಆತಾಂ ಕೊಣಾಕ್ ಜಾಯ್?
ಪುರ್‍ಚಿ ಕೊಣೆಂ?
ಉಬ್ಜಲೊ ನ್ಯಾಯ್
ಏಕ್‌ಚ್ ವಾಟ್ ಉರ್‍ಲಿ
ತೆಗಾಂ ನಾತ್ವಾಂನಿ
ಸಾಂಗಾತಾ ಮೆಳೊನ್ ಪುರ್‍ಲಿ
ಝರ್ ಪುರ್‍ತಿ ಜಿರ್‍ಲಿ
ಏಕ್ ನಾತು ಹಾಂವ್
ಆತಾಂ ಶೆರಾಂತ್ ರಾವೊನ್
ಮುನ್ಸಿಪಾಲಿಟಿಚೆಂ ಉದಕ್ ಪಿಯೆತಾಂ
ಆನಿ
ಆಬಾಚ್ಯಾ ಉಸ್ಕ್ಯಾರ್ ಬಸೊನ್ ಪಿಯೆಲ್ಲ್ಯಾ
ತ್ಯಾ ಸರ್‌ಲ್ಲೆ ಬಾಂಯ್ಚ್ಯಾ
ಆಪುಟ್ ರುಚಿಕ್ ಉದ್ಕಾಚೊ
ಏಕ್ ಉಡಾಸ್ ಕಾಡ್ನ್
ಕವಿತಾಚಿ ವಾತ್ ಜಳಯ್ತಾಂ
-ಆಂಡ್ರ್ಯೂ ಎಲ್. ಡಿ'ಕೂನ್ಹಾ, ಕಿನ್ನಿಕಂಬ್ಳ