ಕವಿತಾ:
ಜೆಜು, ಜೆಜು ಮ್ಹಾಕಾ ತುಜೆರ್ ಶಿಣ್ ಆಸಾ
ಜೆಜು ಜೆಜು ತುಜೆರ್ ಮ್ಹಾಕಾ ಶಿಣ್ ಆಸಾ
ಲಟ್ಕೊ ಸುಂರ್ಗಾರ್ ಕೆಲ್ಲ್ಯಾಕ್ ತುಜ್ಯಾ ಜಲ್ಮಾ ದಿಸಾ
ಗೊವೆಣ್ ಉಬಾಳ್ ತುಜ್ಯಾ ಆಂಗಾರ್
ನಮಾನ್ ಆಜ್ಯಾಪ್ ಗೊರ್‍ವಾಂ ಶಿಂಗಾರ್
ಗೊವ್ಳೆ ಭೊಕ್ರೆ ಆಯ್ಲ್ಯಾತ್ ರಂಗಾರ್
ದುರ್ಬಳ್‌ಕಾಯ್ ಮ್ಹಣ್ತಾಯ್ ಕಸೊ ಹ್ಯಾಯಿ ವೆಸಾ?
ಜೆಜು, ಜೆಜು ತುಜೆರ್ ಮ್ಹಾಕಾ ಶಿಣ್ ಆಸಾ
ಆತಾಂಯ್ ಜಾತಾತ್ ಶೆಣಾಮೆಣಾಕ್
ಝೊಪ್ಡ್ಯಾಂತ್ ಖೊಮ್ಟಾಂತ್ ಕೊಣಾಕೊಣಾಕ್
ಕಾಂಪ್ಚಿಂ ಬಾಳಾಂ ಖಿಣಾಖಿಣಾಕ್
ಸರ್ ಆಸಾ ಸಾಂಗ್ ಹ್ಯಾಯಿ ಬಾಂದ್‌ಪಾಸಾ
ಜೆಜು, ಜೆಜು ತುಜೆರ್ ಮ್ಹಾಕಾ ಶಿಣ್ ಆಸಾ
ರಕ್ಷಣ್ ಆಸಾ, ಗೊರ್‍ವಾಂ ಗೊಟ್ಯಾಂತ್
ರಕ್ಷಣ್ ಕಸ್ಲೆಂ ಬಿಳಾಂತ್ ಮಾಟ್ಯಾಂತ್
ಆನಿ ಆಸ್ಪತ್ರೆಚ್ಯಾ ಖಾಟ್ಯಾಂತ್?
ಜಿವಾಂಕ್ ಕೊಣಯ್ ಮೊಲ್ ದಿತಾ ಎಕಾ ಕಾಸಾ?
ಜೆಜು ಜೆಜು ತುಜೆರ್ ಮ್ಹಾಕಾ ಶಿಣ್ ಆಸಾ
ಸುವಿಯೊ ತೊಪುನ್ ಬಾಳ್ಶಿಂ ಮರ್‍ತಾತ್
ರಗ್ತಾಂ ಚುಕೊನ್ ಬಾಳ್ಕಾಂ ಸರ್‍ತಾತ್
ಥೊಡ್ಯಾ ಭುರ್ಗ್ಯಾಂಕ್ ನರ್ಸಾಂ ಫಾರ್‍ತಾತ್
ಸರ್ ಆಸಾ ಸಾಂಗ್ ಅಸ್ಲ್ಯಾ ಪೊಟಾ ಲಾಸಾ?
ಜೆಜು, ಜೆಜು ತುಜೆರ್ ಮ್ಹಾಕಾ ಶಿಣ್ ಆಸಾ
ತುಜ್ಯಾ ಪಾಳ್ಣ್ಯಾಕ್ ರಾಯ್ ಮಾನ್ತಾತ್
ಮೀರ್ ಧುಂಪಾಂ ಸೊನೆಂ ವಿಣ್ತಾತ್
ಹಾಂಗಾ ಕಿತ್ಲಿಂ ಜೀವ್ ಸಾಂಡ್ತಾತ್
ದುಧಾವಿಣೆಂ ಮ್ಹಳ್ಳಿ ಖಬರ್ ತುಕಾ ಆಸಾ?
ಜೆಜು, ಜೆಜು ತುಜೆರ್ ಮ್ಹಾಕಾ ಶಿಣ್ ಆಸಾ
ತರೀ ತುಜಿಂ ಖಾಲ್ತೆಪಣಾಂ
ದುಬ್ಳಿಕಾಯೆ ತೆಲ್ತೆಪಣಾಂ
ಆಯ್ಲೊ ಗೆಲ್ಲೊ ಗಾಯ್ತಾ ಗಾಣಾಂ
ಜಿಂಜ್ವಾರ್ ಕರ್‍ತಾ ಬಸೊನ್ ರಾಶೀರ್ ರೊಸಾ ಮಾಸಾ
ಜೆಜು, ಜೆಜು ತುಜೆರ್ ಮ್ಹಾಕಾ ಶಿಣ್ ಆಸಾ
-ಚಾ.ಫ್ರಾ. ದೆಕೊಸ್ತಾ