ಕವಿತಾ:
ಮೊಗಾಳ್ ಮ್ಹಜೆಂ ಜಿತಾ
ಸಕಾಳಿಂಚ್ಯಾ ಧೊವಾ, ಭಿಜಯ್ ಮ್ಹಜಿಂ ಫುಲಾಂ
ವೊಡ್ತ್ ಮ್ಹಜೆಂ ರಾತಿಂ ಚಂದ್ರಿಮಾನ್ ಧುಲಾಂ
ಕಾಲ್ಚಿಂ ಫುಲಾಂ ಬಾವಯ್, ಬೊಂಗೆ ಸೊಡಯ್ ಆತಾಂ
ಭಂಗ್ ಮ್ಹಜೊ ಜಾತಾ ತಡವ್ ಜಾತಾಂ ಜಾತಾಂ
ಆತಾಂ ವೊಡ್ತಾಂತ್ ಯೆತಾ ಮೊಗಾಳ್ ಮ್ಹಜೆಂ ಜಿತಾ
ಗುಲಾಬ್ ಮ್ಹಜೊ ಕಾಡುನ್ ಹಾಸೊ ಮಾತ್ ದಿತಾ
ದೊನ್ಪಾರಾಂಚ್ಯಾ ವೊತಾ ಪಾಶಾರ್ ಜಾತಾತ್ ಖಿಣಾಂ
ಕೊಣ್ ತೆಂ ಜಿತಾ, ಹಾಂವ್ ಕಾಂಯ್ ನೆಣಾಂ
ವಡಾಸಾವ್ಳೆಕ್ ಬಸ್ತಾಂ ಲಾಗಿಂ ನಾಂತ್ ಜಣಾಂ
ಹೊ ಖಿಣ್ಕುಳ್ಯಾಂಚೊ ನಾದ್ ಖಂಯ್ಚೊ ಕೊಣ್ ಜಾಣಾ?
ತೆನ್ನಾಂ ಮತೀಂತ್ ಯೆತಾ ಮೊಗಾಳ್ ಮ್ಹಜೆಂ ಜಿತಾ
ಚಿಂತ್ನಾಂ ಮ್ಹಜಿಂ ಚೊರುನ್, ಹಾಸೊ ಮಾತ್ ದಿತಾ
ರಾತಿಂ ವ್ಹಾಳ್ಚ್ಯಾ ವಾರ್‍ಯಾ, ಖಂಯ್ ತುಜ್ಯೊ ಫೆರ್‍ಯಾ?
ಯೋ ಮ್ಹಜ್ಯಾ ಘರಾ, ಮತ್ ನಾ ಥಾರ್‍ಯಾ
ನಿದೊನ್ ಹಾಂವ್ ಆಸ್ತಾಂ,ಲಾಗಿಂ ನಾಂತ್ ಜಣಾಂ
ಹೊ ಖಿಣ್ ಖಿಣ್ಕುಳ್ಯಾಂಚೊ ನಾದ್ ಖಂಯ್ಚೊ ಕೊಣ್ ಜಾಣಾಂ?
ಖಟ್ಲ್ಯಾಲಾಗಿಂ ಯೆತಾ, ಮೊಗಾಳ್ ಮ್ಹಜೆಂ ಜಿತಾ
ನೀದ್ ಮ್ಹಜಿ ನಾಗವ್ನ್, ಹಾಸೊ ಮಾತ್ ದಿತಾ
-ಚಾ.ಫ್ರಾ. ದೆಕೊಸ್ತಾ