ಕವಿತಾ:
ಆಬೊಲ್ಯಾಚೊ ರಂಗ್
ಆಬೊಲ್ಯಾ, ತುಜೊ ರಂಗ್ ಉಜೊ
ರಾಂದ್ಣಿರ್ ತುಜ್ಯಾ ಕಿತೆಂ ಶಿಜೊಗೊ?
ಮಾಣ್ಕುಲ್ಯಾ ಮುಖಾರ್ ಪಾಕ್ಳಿ ಪಿಟಾಚಿ
ಸಾಣ್ಶಿಲೆ ಸಾಂದಿಂತ್ ದುಬ್ಳ್ಯಾ ದೆಂಟಾಚಿ
ಮೊವಾಳಾಯೆಂತ್ ಕಸೊ ಉಜೊ ರುಜೊಗೊ
ಆಬೊಲ್ಯಾ, ತುಜೊ ರಂಗ್ ಉಜೊ
ಎಕ್ಸುರ್‍ಪಣಾರಿ ಆಲ್ಬೊ ಶೃಂಗಾರ್
ಆಂಕ್ವಾರ್ಪಣಾಚಿ ಸಾಯ್ ಆಂಗಾರ್
ರಾಶಿಚ್ಯಾ ಉಜ್ಯಾಂತ್ ದೇವ್ ಪುಜೊಗೋ
ಆಬೊಲ್ಯಾ, ತುಜೊ ರಂಗ್ ಉಜೊ
ಮ್ಹಜ್ಯಾಯ್ ಭಿತರ್ ಜಳ್ಟಾ ಸೊರ್ಮುಣಾಂ
ಭಾಯ್ಲ್ಯಾನ್ ಕುಲ್ಕುಲೊ ಕಸೊ ಕಾಂಯ್ ನೆಣಾಂ
ಆಂಗ್‌ಪಾಂಗ್ ಮಾತ್ ಘಾಮಾನ್ ಭಿಜೊಗೊ
ಆಬೊಲ್ಯಾ, ತುಜೊ ರಂಗ್ ಉಜೊ
ಭಿತರ್‍ಲೊ ಉಜೊ ವೊಂಕುಂಕ್ ನರ್ಗತಾಂ
ನಕ್ಲಿ ಹಾಶಾಂನಿ ಲಿಪಂವ್ಕ್ ಕರ್ಗತಾಂ
ಮ್ಹಜ್ಯಾಚ್ ಮಡ್ಯಾರ್ ಮ್ಹಜೋಚ್ ಭಜೊಗೋ
ಆಬೊಲ್ಯಾ, ತುಜೊ ರಂಗ್ ಉಜೊ
ಮ್ಹಜ್ಯಾಯ್ ಮುಕಾರ್ ಉಜೊ ಪಿಕಯ್
ಭಿತರ್‍ಲೆಂ ಸೊರ್ಮುಣ್ ಭಾಯ್ಲ್ಯಾನ್ ಫಾಂಕಯ್
ಮೋಗ್ ಘಡೊಂ ಅಸೊ ತುಜೊ ಮ್ಹಜೊಗೋ
ಆಬೊಲ್ಯಾ ತುಜೊ ರಂಗ್ ಉಜೊ
ರಾಂದ್ಣಿರ್ ತುಜ್ಯಾ ಕಿತೆಂ ಶಿಜೊಗೋ?
-ಚಾ.ಫ್ರಾ. ದೆಕೊಸ್ತಾ