ಕವಿತಾ:
ಹಾಂವಯ್ ವೇಸ್ ಘಾಲ್ತಾಂ
ಗಾಂವ್ ಸಗ್ಳೆ ಭೊಂವ್ತಾತ್ ಪಳೆ
ಮಾರ್ನೆಮಿಚೆ ವ್ಹಡ್ಲೆ ವಾಗ್
ಆಮ್ಗೆರ್ ಕಿತ್ಯಾಕ್ ಎಕ್ಲೆಯಿ ಯೇನಾಂತ್
ಅಮ್ಮಾ ಮ್ಹಾಕಾ ವೆಗಿಂ ಸಾಂಗ್
ಬುಡ್ಕುಲ್ಯಾಂತ್ ಪಾವ್ ತಾಂದುಳ್ ನಾ
ಮೊಡ್ಕೆಂತ್ ಶಿಜ್ಚಿ ಪೇಜ್‌ಯಿ ನಾ
ಆಮ್ಗೆರ್ ಕಿತ್ಯಾಕ್ ವಾಗ್ ಯೆತಾ
ಸೆಜಾರಾ ನಾಚ್ಚೆಂ ಪಳೆ ಪುತಾ
ಪಂಡಿತ್ ಎಕ್ಲ್ಯಾನ್ ಪಾಳ್ ಹಾಡ್ಲಾಂ
ಪಿಡಾ ಸಗ್ಳಿ ಧಾಂವ್ಡಾಯ್ತಾ ಮ್ಹಳಾಂ
ಅಪ್ಪಾವಿಶಿಂ ತಾಕಾ ಸಾಂಗ್ಯಾಂ
ಸೊರೊ ಪಿಯೆನಾಶೆಂ ಕರುಂಕ್ ಮಾಗ್ಯಾಂ
ಪಾಳಾಂ ಕಿತ್ಲಿಂ ಝರವ್ನ್ ದಿಲ್ಯಾರ್‌ಯಿ
ಸೊರ್‍ಯಾ ಪಿಡಾ ರಾವಾನಾ ಪುತಾ
ಅಪ್ಪ ತುಜೊ ಪಿಯೆತಾ ಮ್ಹಣೊನ್
ಕೊಣಾಯ್‌ಲಾಗಿಂ ಸಾಂಗುನಾಕಾ
ಕಿಣ್ಕುಳೆ ಹಾಲವ್ನ್ ನಾರದ ಯೆತಾ
ಪದಾಂನಿ ಹಾಸಯ್ತಾ ಜಕ್ಕಮಾದಿನ
ತಾಂಕಾಂ ಹೆವ್ಶಿನ್ ಆಪಂವ್ಗೀ ಅಮ್ಮಾ
ಆಮ್ಗೆರ್ ಗಾಂವ್ದಿತ್ ತಾಂಚಿಂ ಗಾಣಾಂ
ಕಿಣ್ಕುಳ್ಯಾಂಚೊ ನಾದ್ ಆಯ್ಕೊನ್
ಪೊಟಾ ಭುಕ್ ಕಶಿ ಥಾಂಬಾತ್
ಧನ್ಯಾಲಾಗಿಂ ಪತ್ತಾವ್ನ್ ದಿಂವ್ಚ್ಯಾ
ನಾರದಾಚೆ ರಗ್ಳೆಚ್ ನಾಕಾತ್
ಧನಿಯಾ ಘರಾ ರಾಮ ಆಯ್ಲಾ
ಧನಿಯಾ ಧುವೆಕ್ ಬೆಸಾಂವ್ ದಿಲಾಂ
ಈಶ್ವರ್ ದೇವ್‌ಯಿ ಪ್ರಸನ್ನ್ ಜಾಲಾ
ವಜ್ರಾಂ ವೈಭವ್ ಮೆಳ್ತಾ ಮ್ಹಳಾಂ
ಕೊಡ್ಕ್ಯಾಕ್ ಆಮ್ಚ್ಯಾ ರಾಮ ಯೇನಾ
ದೆಡ್ಕಿ ನಾತ್ಲ್ಯಾರ್ ಭೀಮಾಯಿ ಯೇನಾ
ವಜ್ರಾಂ ವೈಭವ್ ಆಮ್ಕಾಂ ನಾಕಾ
ತುಂಚ್ ಪುತಾ ವಜ್ರ್ ಮ್ಹಾಕಾ
ತನಿಯ ಕೊರಗ ಕಾಳೆಂ ಸಾರವ್ನ್
ಧನಿಯ ಘರಾ ಪಿರ್ಲುಕ್ ಫುಂಕ್ತಾ
ಸೆರ್‌ಭರ್ ತಾಂದ್ಳಾನ್ ಖಂಡಿ ಭರ್ತಾ
ತನಿಯ ಮಾಮಾಚೆಂ ತೋಂಡ್ ಫುಲ್ತಾ
ಜ್ಯೋರ್ ಭುಕ್ ಲಾಗ್ತಾ ಅಮ್ಮಾ
ಹಾಂವ್‌ಯಿ ವೇಸ್ ಘಾಲ್ತಾಂ ಅಮ್ಮಾ
ಧನಿಯ ಘರಾ ನಾಚೊನ್ ಯೆತಾಂ
ಪೊತೆಂಭರ್ ತಾಂದುಳ್ ಹಾಡ್ತಾಂ
-ಆಂಡ್ರ್ಯೂ ಎಲ್ ಡಿಕುನ್ಹಾ