ಕವಿತಾ / कविता:
ಎಂಜೋಯ್ ದ ರೇನ್
ತ್ಯಾ ದಿಸಾ
ಶ್ರಾವಣಾಂತ್ಲೊ ವೊತ್-ಪಾವ್ಸಾಚೊ
ಖೆಳ್ ಪಳಯ್ತ್
ಹಾಂವ್ ಗ್ಯಾಲರಿಂತ್ ಬಶಿಲ್ಲೊಂ
ಜಿ. ಎ. ಕುಲಕರ್ಣಿಚ್ಯೊ ಕಥಾ ವಾಚೀತ್
... ಇತ್ಲ್ಯಾಂತ್
ಬಾಯ್ಲ್ ಘೆವ್ನ್ ಆಯ್ಲಿ
ಹುನ್ಹುನೀತ್ ಚ್ಯಾ ಆನಿ ಗರಮ್ ಗರಮ್ ಭಜಿಂ
... ಹಾತಾಂತ್ಲ್ಯಾ ಜಿ. ಎ. ಕುಲಕರ್ಣಿಕ್
ಕುಶೀನ್ ಉಡಯ್ತ್ ಮ್ಹಣ್ಪಾಕ್ ಲಾಗ್ಲಿ
‘ಲೆಟ್ ಅಜ್ ಎಂಜೋಯ್ ದ ರೇನ್’
.. ಮಾಗೀರ್ ಆಮಿ ಚಿಪ್ಪ್ ಭಿಜ್ಲಿಂ
ಯಾದಿಂಚ್ಯಾ ಪಾವ್ಸಾಂತ್
ಗ್ಯಾಲರಿ ಸಕಯ್ಲ್ಯಾನ್ ಉಲೆ ಆಯ್ಲೆ
"ಡೆಡೀ.. ಮಮ್ಮೀ.."
ವೆಲ್ಯಾನ್ ಪಳಯ್ ಜಾಲ್ಯಾರ್
ಆಮ್ಚೆಂ ಬಾಯ್, ಸತ್ರಿ ಪರ್ತಿ ಧರುನ್
.. ಪಾವ್ಸ್ ಪುಂಜಾಯ್ತಾಲೆಂ ಬಿಂಧಾಸ್ತ್!
ಹಾಂವೆಂ ಧೆಂಗ್ಸೊ ಘಾಲೀತ್ ಮ್ಹಳೆಂ,
"ಆಗೊ, ಥಂಡಿ ಜಾತಲಿ, ಸಡ್ಸಡೀತ್ ವಯ್ರ್ ಯೋ"
.. ಮ್ಹಜಿಂ ಉತ್ರಾಂ ಕಾತರೀತ್ ಬಾಯ್ಲೆನ್ ಮ್ಹಳೆಂ,
"ಆಮಿ ವಯ್ರ್ ಆಸಾತ್ ತಿಂ ಪುರೊ..
.. ತಾಕಾ ರಾವುಂದಿ ಮಾತ್ಶೆಂ ಜಮ್ನಿರ್
..... ಲೆಟ್ ಅಜ್ ಎಂಜೋಯ್ ದ್ ರೇನ್"
ತೆನ್ನಾ ಸಾವ್ನ್ ದರ್ ಪಾವ್ಸಾಕ್
ಹಾಂವ್ ಗ್ಯಾಲರಿಂತ್ ರಾವೊನ್
ಸಕಯ್ಲ್ಯಾನ್ ವ್ಹಾಂವ್ಪಿ ಉದ್ಕಾಂತ್
ಪಳಯ್ತ್ ರಾವ್ತಾಂ.... ವೊರಾಂಚಿಂ ವೊರಾಂ
...... ಲ್ಹಾನ್ಪಣಾಂತ್
ಆಂಗ್ಣಾಂತ್ಲ್ಯಾ ಉದ್ಕಾಂತ್ ಸೊಡಿಲ್ಲೆಂ
ಮ್ಹಜೆಂ ಕಾಗ್ದಾಚೆಂ ಹೊಡೆಂ
.. ಕೆನ್ನಾ ತರೀ ವ್ಹಾಂವತ್ ವ್ಹಾಂವತ್
.. ಹಾಂಗಾ ಪಾವತ್
ಹೆ ಆಶೆನ್!
-ರಾಜಯ್ ಪವಾರ್
कविता:
ऍंजॉय द रेन
त्या दिसा
श्रावणांतलो वत-पावसाचो
खेळ पळयत
हांव गॅलरींत बशिल्लों
जी. ए. कुलकर्णीच्यो कथा वाचीत
.. इतल्यांत
बायल घेवन आयली
हुनहुनीत च्या आनी गरम गरम भजीं
.. हातांतल्यान जी. ए. कुलकर्णीक
कुशीक उडयत म्हणपाक लागली
`लॅट अज ऍंजॉय द रेन'
.. मागीर आमी चिप्प भिजलीं
यादींच्या पावसांत...
गॅलरी सकयल्यान उले आयले
"डॅडी.... मम्मा.."
वेल्यान पळय जाल्यार
आमचें बाय, सतरी परती धरून
..पावस पुंजायतालें बिनधासता
हांवें धेंगसो घालीत म्हलें
"आगो, थंडी जातली, सडसडीत वयर यो"
म्हजीं उतरां कातरीत बायलेन म्हळें,
"आमी वयर आसात तीं पुरो.
...ताका रांवदी मातशें जमनीर
.. लॅट हर ऍंजॉय द रेन"
तेन्नां सावन दर पावसाक
हांव गॅलरींत रावन
सकयल्यान व्हांवपी उदकांत
पळयत रावतां.. वरांचीं वरां
.. ल्हानपणांत
आंगणांतल्या उदकांत सोडिल्लें
म्हजें कागदाचें व्हडें
.. केन्नां तरी, व्हांवत व्हांवत
हांगा पावत
हे आशेन!
- राजय पवार