ಸಂಪಾದಕೀಯ್:
ವಾಸ್ತವಿಕತೆಂತ್ಲಿಂ ‘ಮೊರಾನ್ ಸಾಂಡ್ಲಲಿಂ ಪಾಕಾಂ’ ವೆಗಿಂಚ್ ಚರಿತ್ರೆಚೊ ಹಿಸೊ ಮಾತ್ರ್ ಉರ್‍ತಲಿಂ?
‘ಮೊರಾನ್ ಸಾಂಡ್ಲಲಿಂ ಪಾಕಾಂ’ ಕವಿತೆಂತ್ ಎಕಾ ನೆಂಟ್ಯಾ ಭುರ್ಗ್ಯಾಚೆಂ ಚಿಂತಪ್, ತಾಕಾ ಖಿಣಾಕ್ ಭೊಗ್ಚಿ ದೂಕ್, ಮಾಗೀರ್ ಥೊಡ್ಯಾಚ್ ಖಿಣಾಂನಿ ಹೆಂ ಸಗ್ಳೆಂ ವಿಸ್ರೊನ್ ಸೊಡ್ಚೆಂ ವಿಶಾಲ್ ಕಾಳೀಜ್ ದಿಸ್ತಾ. ಆಮಿ ಲ್ಹಾನ್ ಆಸ್ತಾನಾ ಮೊರಾಚಿಂ ಪಾಕಾಂ ಪುಸ್ತಕಾಚ್ಯಾ ಪಾನಾಂ ಇಡ್ಯಾಂನಿ ದವರ್ತಲ್ಯಾಂವ್. ತಿಂ ಪಿಲಾಂ ಕಾಡ್ತಾತ್ ಮ್ಹಣೊನಯ್ ಪಾತ್ಯೆತೆಲ್ಯಾಂವ್. ಹಾಂಗಾಚೆಂ ಬಯ್ಯಾ ತಸಲೆಂಚ್ ಏಕ್ ಭುರ್ಗೆಂ. ಮಾಗೀರ್ ಬಬ್ಲಾ, ದಾಟ್ಟು, ಮಾಮ್ಮಿ ವೆವೆಗ್ಳ್ಯಾ ಕಾರಣಾಂ ಖಾತೀರ್ ‘ಮೊರಾನಾ ಸಾಂಡ್ಲಲಿಂ ಪಾಕಾಂ’ ಜಿಂ ಹ್ಯಾ ಭುರ್ಗ್ಯಾನ್ ಆರಾವ್ನ್ ಹಾಡ್ಲ್ಯಾಂತ್, ತಿಂ ಕಾಡ್ತಾತ್. ಭುರ್ಗೆಂ ಚಿಂತಾ - ತಿಂ ಚೊರ್ತಾತ್.
ಹಿ ಕವಿತಾ ಭಾಯ್ಲೆ ದೆಕುಕ್ ಸಾದಿ ದಿಸತ್. ಪುಣ್ ಚೋರ್ನ್ ಹಾಡ್ಚ್ಯಾಂತ್ ಆನಿ ಸಾಂಡ್ಲಲಿಂ ಘೆವ್ನ್ ಯೆಂವ್ಚ್ಯಾಂತ್ ಆಸ್ಚೊ ಫರಕ್ ಆಮಿ ಸೊಧುನ್ ಗೆಲ್ಯಾಂವ್ ತರ್, ಮೋರ್ ಪಾಕಾಂ ಕಿತ್ಯಾ ಸಾಂಡ್ತಾ ಮ್ಹಳ್ಳೆಂ ಚಿಂತುಂಕ್ ಗೆಲ್ಯಾಂವ್ ತರ್, ಹೆ ಕವಿತೆಚಿ ರೂಚ್ ದೊಡ್ತಿ ಜಾಂವ್ಕ್ ಸಾಧ್ಯ ಆಸಾ. ಮಾಗೀರ್ ಭಿಜಲ್ಲ್ಯಾ ಕಾವ್ಳ್ಯಾನ್ ಆಂಗ್ ಫಾಪುಡ್ಚೆಂ ಹಾಂಗಾ ಕಿತ್ಲ್ಯಾ ಗರ್ಜೆಚೆಂ ಮ್ಹಳ್ಳೆಂ ಸವಾಲ್ ಆಟೊವ್ನ್ ತಾಕಾ ಜಾಪಿ ಸೊಧುಂಕ್ ತುಮ್ಕಾಂಚ್ ಸೊಡ್ತಾಂ.
ತರೀ ಆಯ್ಚ್ಯಾ ಕಾಳಾರ್, ಅಸಲೆಂ ಏಕ್ ರೂಪಕ್ ಕಿತ್ಲೆಂ ಪ್ರಸ್ತುತ್? ಆಯ್ಚ್ಯಾ ಭುರ್ಗ್ಯಾಚ್ಯೊ ಆಶಾ, ಖುಶಿ, ಅತ್ರೆಗ್ ಆಜೂನಯ್ ‘ಮೊರಾ ಪಾಕಾಂ’ ತಸಲ್ಯಾ ವಸ್ತುಂಚೆರ್ ಉರ್ಲ್ಯಾತ್ ಮ್ಹಣೊನ್ ಸಾಂಗೊಂಕ್ ಕಷ್ಟ್ ಜಾತಾತ್. ಸಂಸಾರ್ ಬದಲ್ಲಾ. ಹ್ಯಾ ಬದ್ಲಲ್ಲ್ಯಾ ಸಂಸಾರಾಂತ್ ಗಾಂವಾಂನಿ ಲೆಗುನ್ ಭುರ್ಗ್ಯಾಂಚೆ ರುಚಿಂಚೆರ್ ಬದ್ಲಾವಣ್ ಹಾಡ್ಲ್ಯಾ ಮ್ಹಳ್ಳೆಂ ನೆಗಾರುಂಕ್ ಜಾಯ್ನಾ. ಆನ್ಯೇಕ್ ಪಂದ್ರಾ ವರ್ಸಾಂನಿ ಹಿ ಕವಿತಾ ಚರಿತ್ರೆಚೊ ಹಿಸೊ ಮಾತ್ರ್ ಜಾವ್ನ್ ಉರ್ತಲಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮೊರಾನ್ ಸಾಂಡ್ಲಲಿಂ ಪಾಕಾಂ
ಕುಮೆರಿಂತ್ ಮೊರಾನ್ ಸಾಂಡ್ಲಲಿಂ ಪಾಕಾಂ
ಆರಾವ್ನ್ ಆರಾವ್ನ್ ಹಾಡ್ಲಿಂ
ಥೊಡಿಂ ಧಾಕ್ಟಿಂ, ಕಾಂಯ್ ಥೊಡಿಂ ವ್ಹಡ್ಲಿಂ
ಆನಿ ತಾಣಿಂಚ್ ಆಮ್ಚಿಂ ಮನಾಂ ಫೊಡ್ಲಿಂ
ಬಬ್ಲಾನ್ ಏಕ್ ಪಾಕ್
ಚೊರುನ್ ವೆಲೆಂ ಮಿತ್ರಾಂಕ್ ದಾಕವ್ನ್ ಹರ್ಧೆಂ
ಫುಲಂವ್ಕ್
ಬಯ್ಯಾನ್ ವಿಚಾರಿನಾಸ್ತಾಂ ಲಿಪಯ್ಲೆಂ ಏಕ್
ಬುಕಾಪಾನಾಂ ಇಡ್ಯಾಂತ್ ಪಿಲಾಂ ಕಾಡುಂಕ್
ದಾಟ್ಟುಕೀ ಏಕ್ ಜಾಯ್ ಆಸ್ಲೆಂ
ಚಾಂಪ್ಯಾವನಾಂತ್ ಆಪೊವ್ನ್ ಗುಪ್ತಿಂ ‘ತಾಕಾ’
ದೀವುಂಕ್
ವರದಕ್ಕ ವಿಚಾರಿ ಮ್ಹಣ್ ಮಾಮ್ಮಿನ್ ದಿಲೆಂ
ಕಿಸ್ಣಾಚ್ಯಾ ಮಾತ್ಯಾಕ್ ಖೊವಂವ್ಕ್
ಮಾಗೀರ್ ಉರಲ್ಲಿಂ ಮ್ಹಾಕಾ
ಮೊಡ್ಕುರಿಂ ಆನಿ ರಡ್ಕುರಿಂ ಖಂಯ್ಚ್ಯಾ ಕರ್ಮಾಕ್?
ಕೊಣೆಂ ಫಾರ್ಲಿಂ, ಕೊಣೆಂ ಲಿಪಯ್ಲಿಂ
ತಾಚೆರ್ ಸೊಧ್ ಹಾಂವೆಂ ಚಲಯ್ಲೊ
‘ಹಾಂವೆಂ ಹಾಡಲ್ಲಿಂ ಪಾಕಾಂ ತುಮಿ ಕಶಿಂ
ಚೊರ್ಲಿಂ?’
ಬಯ್ಯಾ ಹಾಸ್ಲೆಂ
‘ಹಾಡಲ್ಲಿಂ ವ್ಹಯ್, ಪುಣ್ ಮೊರಾನ್
ಸಾಂಡ್ಲಲಿಂ!’
ದೊಳ್ಯಾ ಖಾಂಚಿಂತ್ಲಿಂ ದುಕಾಂ ಪುಸುನ್
ಭಾಯ್ರ್ ಯೆತಾನಾ
ಬೋಳ್ ರುಕಾರ್ ಭಿಜಲ್ಲೊ ಕಾವ್ಳೊ
ಆಂಗ್ ಪಾಪ್ಡುಂಕ್ ಲಾಗ್ಲೊ
ಥೆಂಬೆ ಉಸಾಳ್ಳೆಚ್ ತೊ ಸುಶೆಗಾತ್ ಉಬ್ಲೊ
-ಜೊ. ಸಿ. ಸಿದ್ದಕಟ್ಟೆ