ಕವಿತಾ:
ಸಾಂಗಾತ್
ಮನ್ಶಾಂ ಪೊಸುನ್ ಜಾಲಿಂ
ಆತಾಂ ಮ್ಹಳೆಂ ಸುಣೊ ಪೊಸುಯಾಂ
ಮಾತ್ಸೊ ಮ್ಹಜೆಚ್ ಭಶೆನ್ ದಿಸ್ಪಿ
ಎಕಾ ಸುಣ್ಯಾಚೊ ಪೆಟೊ ಹಾಡ್ಲೊ
ಕಿತ್ಲೆಂ ಕರ್ತಲೊ?
ಹಾಂವ್ ದಿಸ್ಲೆ ಬರಾಬರ್ ಉಡಿ ಮಾರುನ್
ತಾಣೆಂ ಮ್ಹಜಿ ಪಾಪಿ ಘೆತಿಲ್ಲಿ
ಸುಣೊ ಕಿತ್ಲೊ ಆಪುರ್ಬಾಯೆಚೊ ಮ್ಹಣ್ ಸಾಂಗುಂ?
ಸಕಾಳಿಂ ಮ್ಹಜೆಂ ಪಾಂಗ್ರೂಣ್ ವೊಡುನ್ ಮ್ಹಾಕಾ ಉಟಯ್ತಾ
ಹಾಂವ್ ಸಂಡಾಸಾಂತ್ ಗೆಲ್ಯಾರ್ ತೊ ಭಾಯ್ರ್ ಉಬೊ
ಹಾಂವ್ ಭಾಯ್ರ್ ಸರ್ಲೊಂ ಕಿ ತೊ ಸಂಡಾಸಾಂತ್ ವೆತಾ
ಪಯ್ರ್ ಹಾಂವ್ ನ್ಹಾತಾಲೊಂ
ಪಳಯ್ಲ್ಯಾರ್ ಶಾಬೂಚ್ ನಾ
ದಾರಾರ್ ಟಕ್ ಟಕ್ ಆವಾಜ್
ಪಳಯ್ಲ್ಯಾರ್ ಹೊ ತೊಂಡಾಂತ್ ಶಾಬು ಘೆವ್ನ್ ಉಬೊ
ಕಾಲ್ ಸಕಾಳಿಂ ಕವಿತಾ ಬರಯ್ತಾನಾ
ಏಕ್ ಶಬ್ದುಚ್ ಸುಚನಾ
ಸುಣೋಯ್ ಮ್ಹಜ್ಯಾ ಮರ್ಯಾಂತ್ ರಾವುನ್
ಕವಿತೆ ಕಡೆನ್ ಲಕ್ಷ್ ದೀವ್ನ್ ಆಸಾ
ಖಂಯ್ಚೊ ಬಾಬಾ ಶಬ್ದ್ ವಾಪರ್ಚೊ?
ಮಧೀಂಚ್ ಸುಣ್ಯಾನ್ ಮ್ಹಳೆಂ ‘ಭುಕ್ ಭುಕ್’
ಭುಕ್ ಶಬ್ದ್ ಜುಸ್ತಾಜುಸ್ತ್ ಲಾಗ್ಲೊ ಕವಿತೆಕ್
ಮಾಗೀರ್ ಆಮ್ಕಾಂ ಭುಕ್ ಲಾಗ್ಲ್ಯಾ ಮ್ಹಣ್
ಆಮಿ ಬ್ರೇಕ್‍ಫಾಸ್ಟ್ ಕರುಂಕ್ ಬಸ್ಲೆ
ಮ್ಹಾಕ್ ಪಾವ್ ಆಂವಡ್ತಾ
ಮ್ಹಣೊನ್ ತೋಯ್ ಪಾವ್ ಖಾತಾ
ತೊ ಚ್ಯಾ ಪಿಯೆನಾ, ದೂದ್ ಪಿಯೆತಾ
ಮ್ಹಣೊನ್ ಹಾಂವಯ್ ಆತಾಂ ದೂದ್ ಪಿಯೆತಾಂ, ಚ್ಯಾ ಪಿಯೆನಾ
ಮ್ಹಾಕಾ ಚರ‍್ಚರೀತ್ ತಳಿಲ್ಲೆ ತಾರ್ಲೆ ಆಂವಡ್ತಾತ್
ಮ್ಹಣ್ ತೊ ಬೊಡ್ಕಿ ಆನಿ ಶೆಪ್ಡಿ ಖಾವ್ನ್
ಮದ್ಲೊ ತಾರ್ಲೊ ಮ್ಹಾಕಾ ದವರ್ತಾ
ಆಮಿ ದೊಗೂಯ್ ಸಾಂಜೆರ್ ಭೊವುಂಕ್ ವೆತಾತ್
ಮ್ಹಾಕಾ ತಾಚಿ ಏಕಚ್ ಗಜಾಲ್ ಆಂವಡ್ನಾ
ಮುತ್ತಾ ಆಸ್ತಾನಾ ತೊ ದಾವೊ ಪಾಂಯ್ ವಯ್ರ್ ಉಕಲ್ತಾ
ಪಯ್ಲಿಂ ಎಕ್ಟೆಪಣಾಚೊ ಭೊಂವ್ರೊ ಗರ‍್ಗರ್ ಭೊಂವ್ತಾಲೊ
ಮ್ಹಜ್ಯಾ ಕಾಳ್ಜಾಂತ್
ತಾಚ್ಯಾ ಸಾಂಗಾತಾನ್
ಮ್ಹಜ್ಯಾ ಸುಖಾಚಿ ಬಾಂಯ್ ಭರುನ್ ವೊತ್ತಾ
ಆತಾಂ ಮುತ್ತಾ ಆಸ್ತಾನಾ
ಮ್ಹಜೊ ದಾವೊ ಪಾಯ್ ಉಕಲ್ತಾ
- ಅರುಣ್ ಸಾಖರ್‌ದಾಂಡೆ
(ಸುಣ್ಯಾಚೊ ಪೆಟೊ=ಸುಣ್ಯಾಚೆಂ ಪೀಲ್; ಪಾಪಿ=ಉಮೊ; ಸುಚನಾ=ಕಳನಾ; ಪಾವ್=ಉಂಡೊ; ಶೆಪ್ಡಿ=ಶಿಮ್ಟಿ)