ಸಂಪಾದಕೀಯ್:

ಕವಯಿತ್ರಿ ಸಂಧ್ಯಾ ಶೇವಗೂರ್ ಆನಿ ನಾ

ಕೊಂಕಣಿ ಕವಯಿತ್ರಿ ತಶೆಂ ಲೇಖಕಿ ಸಂಧ್ಯಾ ರಾಮದಾಸ್ ಶೇವಗೂರ್ ಆಪ್ಲ್ಯಾ ಪನ್ನಾಸ್ ಆನಿ ತೀನ್ ವರ್ಸಾಂಚೆ ಪ್ರಾಯೆರ್ ಎಪ್ರಿಲ್ 13, 2011 ತಾರಿಕೆರ್ ಕಾರ್‌ಸ್ಟ್ರೀಟ್ ಮಂಗ್ಳುರ್ ಹಾಂಗಾಸರ್ ಆಸ್ಚ್ಯಾ ಆಪ್ಲ್ಯಾ ಘರಾಂತ್ ಅಂತರ್‍ಲಿ.  ಸಭಾರ್ ಕಾಳಾಥಾವ್ನ್ ಕೆನ್ಸರಾಂತ್ ತಿ ವೊಳ್ವಳ್ತಾಲಿ ಜಾಲ್ಯಾರಿ ಸದಾಂ ಹಾಸ್ಮುಖಿಚ್ ತಿ ಉರ್‍ತಾಲಿ.  ಪ್ರತಿಭೆಂನಿ ಫುಲ್ಲಲಿ ತಿ ಥೊಡ್ಯಾ ವರ್ಸಾಂ ಆದಿಂ ಪಾಸುನ್ ಮಂಗ್ಳುರಾಂತ್ ಚಲೊನ್ ಆಸ್ಚ್ಯಾ ಕವಿಗೋಷ್ಟಿಂನಿ ವ್ಹರ್ತೆ ಹುಮೆದಿನ್ ಭಾಗ್ ಘೆತಾಲಿ.

ತಿಚೊ ಪತಿ ಶೇವಗೂರ್ ರಾಮದಾಸ್ ಕಾಮತ್ ಏಕ್ ಉತ್ತೀಮ್ ಚಿತ್ರ್-ಕಲಾವಿದ್. ವ್ಯಕ್ತಿಚಿತ್ರಾಂ ಸೊಡಂವ್ಚ್ಯಾಂತ್ ನಾಂವ್ ಜೊಡಲ್ಲೊ ಮನೀಸ್. ತಿಕಾ ಏಕ್ ಪೂತ್ ತಶೆಂ ಎಕ್ಲಿ ಧುವ್ ಆಸಾ.

ವ್ಯಕ್ತಿ ವಿಕಸನ್ ಲಗ್ತಿ ಜಾಯ್ತ್ಯಾ ಕಾಮಾಸಾಳೆಂನಿ ಸಂಧ್ಯಾಬಾಯ್ ಉಲೊವ್ಪಿ ಜಾವ್ನ್ ವೆತಾಲಿ. ತಿಚ್ಯಾ ಸಾಹಿತಿಕ್ ಕಾಮಾ ಖಾತೀರ್ ಪುರಸ್ಕಾರ್ ತಶೆಂ ಗೌರವ್ ತಿಕಾ ಫಾವೊ ಜಾಲ್ಯಾತ್.  ಕವಿತಾ ಕುಳಾರಾಂತ್ ಸೈತ್ ತಿಚ್ಯೊ ದೋನ್ ಕವಿತಾ ಆಮಿ ಹ್ಯಾ ಆದಿಂ ಆಮಿ ಪರ್ಗಟ್ ಕೆಲ್ಯಾತ್.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಕಾಗದಾ ಹೋಡಿ

ಹೀ ಮೆಗೆಲೆ ಚೆರ್ಡಪಣಾ ಕಾಣಿ ಥೋಡಿ
ತೀ ತುಮ್ಗೆಲೀಯಿ ಆಸ್ತಾಲಿ ಬರೋಬರ ಥೋಡಿ
ಆಜಿ ಆಠವತಾ ಮಾಕ್ಕಾ ತೀ ಬೊಂಡ್ಯಾ ಗಾಡಿ
ಗಾಡ್ಯೆ ತಾಂಡೂಕ ಬಾಂದಿಲಿ ತೀ ವಾಯ್ಯಾ ಲಾಡಿ

ಪೌಳೆ ಉದಕಾಂತು ಹೊಳಯಿಲಿ ತಿ ಕಾಗ್ದಾ ಹೋಡಿ
ಹೊಳ್ಳಿನಾ ಮನಾಂತುಲ್ಯಾನ ಕಷ್ಟಾಂ ಸುಖಾಂ ಜೋಡಿ
ಉಜ್ಯಾಪೆಟ್ಯೆಂತು ಪೊಶ್ಶಿಲಿ ತೀ ಕಾಳಿ ಕಾಂಬಳಿ ಕೀಡಿ
ಕಾಜ್ಜಿಳೊ, ಪಿಸೋಳಿ, ಕುರುವಾಯಿ ಸಾನಿ ಹೋಡಿ

ಬೊಂಬ್ಯಾ ವ್ಹಾರ್ಡಿಕೆ ಝಗಡ್ಯಾಂಚಿ ತೀ ಸುಂದರ ಘಡಿ
ಸಂಬಂಧಾಂಚೆ ಬಂಧನ ನಾತ್ತಿಲಿ ತೀ ಅಮೂಲ್ಯ ಘಡಿ
ಆಜಿಯಿ ಘೊಳಾಯ್ತಾ ಮನ ಆಜ್ಯೆಲೆ ಕಾಣಿಯೊ ಗೋಡಿ
ಮೋಗು ಮಾಯ್ಪಾಸಾಂಚೆ ದಿವಸ ಸಾನ ರಾತಿ ಹೋಡಿ

ದೇವಾ ತ್ಯಾ ದಿವಸ ಮೆಗೆಲೆ ಹಾಡಿ ವಾಪಾಸ್ ಹಾಡಿ
ಬದಲಾಕ ಪ್ರಾಯೇ ಹೂನ ರಕ್ತಾ ಹೆ ದಿವಸ ಮೋಡಿ

-ಸಂಧ್ಯಾ ಆರ್. ಶೇವಗೂರ್