ಸಂಪಾದಕೀಯ್:
ಬೊಂಡಾಂತ್ಲಿಂ ಸಕ್ಕಡ್ ಆಬೊಲಿಂ ಏಕ್‌ಚ್ ಲೇಕ್ ನ್ಹಯ್!
ಬೋಂಡ್ ಏಕ್‌ಚ್ ತರೀ, ತ್ಯಾ ಬೊಂಡಾಂತ್ ಆಬೊಲಿಂ ಸಬಾರ್ ಆಸ್ತಾತ್ - ಎಕಾ ಕುಟ್ಮಾಬರಿ! ಆಬೊಲ್ಯಾಚೆಂ ಝಾಡ್ ಏಕ್‌ಚ್ ತರೀ, ತ್ಯಾ ಝಾಡಾರ್ ಸಭಾರ್ ಬೊಂಡಾಂ ಆಸ್ತಾತ್ ಎಕೆ ಸಮಾಜೆಬರಿ! ಎಕಾ ಬೊಂಡಾಂತ್ಲಿಂ ಸಕ್ಕಡ್ ಆಬೊಲಿಂ ಏಕ್‌ಚ್ ಲೇಕ್ ನ್ಹಯ್! ಸಾಂಗಾತಾ ಆಸೊನ್‌ಯ್ ತಾಂಚೆ ಮಧೆಂ ದೀಸ್ ರಾತ್ ಫರಕ್. ಥೊಡಿಂ ಆಬೊಲಿಂ ತರೀ ಬೋಂಡ್ ಸುಕೊನ್ ವೆಚೆ ಘಡ್ಯೆ ಫುಲೊನ್ ಭಾಯ್ರ್ ತಿಳೊಂಕ್ ಸೊದ್ತಾತ್, ಪುಣ್ ಬೊಂಡಾಚ್ಯಾ ಮರ್‍ಣಾಸಾಂಗಾತಾ ತಾಂಣಿ ಜಾವ್ನ್ ಜಿವೆಂಚ್ ಮರ್‍ಣಾಕ್ ವೆಂಗ್ಚಿ ಗತ್ ಯೆತಾ!
ತಸಲಿ ಏಕ್ ಕಾಣಿ, ಪಯ್ಲೆಚ್ ಪಾವ್ಟಿಂ 'ಕವಿತಾ ಕುಳಾರ್' ಸುಂರ್‍ಗಾರಾಂವ್ಕ್ ಆಯಿಲ್ಲ್ಯಾ ರೊನಿ, ಬೆಳ್ತಂಗಡಿನ್ ಹಾಂಗಾಸರ್ ಕವಿತೆ ರುಪಾರ್ ದಿಲ್ಯಾ. ಜಿವಿತಾಂತ್ ಚುಕೊನ್ ಪಡೊನ್ ನಿಮಾಣೆ ಘಡ್ಯೆ ಪ್ರಾಚಿತ್ ಕರ್‍ತಲ್ಯಾಂಚೆರ್ ಹಿ ಕವಿತಾ ಆರ್ಸೊ ಧರ್‍ತಾ.
ಹಿ ಮೊಗಾಚಿ ತಶೆಂ ವೆಯುಕ್ತಿಕ್ ದಿಸ್ಚಿ ಕವಿತಾ, ವೆವೆಗ್ಳ್ಯಾ ಮನ್ಶಾಂನಿ ತಾಂಚ್ಯಾ ತಾಂಚ್ಯಾ ಅನ್ಭೋಗಾಂಚಿಂ ವೊಕ್ಲಾಂ ಘಾಲುನ್ ವಾಚ್ತಾನಾ ಸರೊನ್ ಗೆಲ್ಲ್ಯಾ ಉಡಾಸಾಂಕ್ ಅತ್ಮೆ ಮೆಳ್ತಲೆ ತೆಂ ಖಂಡಿತ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕುರ್ಡೊ ಮೋಗ್
ಪ್ರಾಯ್ ಭರ್‍ತಾನಾ, ವಾಚುಂಕ್ ಮೆಳ್‌ಲ್ಲೆಂ ಮೊಗಾ ವಿಶ್ಯಾಂತ್
ಪಾರ್ಕಿಲೊನಾ ಫಾವೊತೊ ಅರ್ಥ್, ತಾಂಣಿ ಸಾಂಗ್‌ಲ್ಲೆ ಸಾಂಗ್ಣೆಂತ್
ಪಡ್ಲೊಂ ಹಾಂವ್‌ಯೀ ಎಕೆ ಸ್ತ್ರೀಯೆಚ್ಯಾ ಮೊಗಾರ್
ಚಿಂತುನ್ ಮ್ಹಜೆಂ, ತಾಚೆಂ ಏಕ್ ಲ್ಹಾನ್ಶೆಂ ಬಿಡಾರ್
ಧಾಂವ್ಲೊಂ ಮೊಗಾ ಪಾಟ್ಲ್ಯಾನ್ ಮಾರುನ್ ಶಿಕ್ಪಾಕ್ ಚುಕಾರಿ
ಠರಾಯ್ಲೆಂ ಫಲಿತಾಂಶ್ ಪರೀಕ್ಶಕಾನ್-ಸಕ್ಕಡ್ ವಿಶ್ಯಾಂತ್ ನೆಣಾರಿ
ಸಾಂಡ್ಲೆಂ ಹಾಂವೆಂ ಸಕ್ಕಡ್, ಕರುನ್ ಫುಡಾರ್ ಪಿಡ್ಡ್ಯಾರ್
ಲೊಕಾಚ್ಯಾ ತೊಂಡಾಂನಿ ಜಾಲೊಂ ಹಾಂವ್ ಏಕ್ 'ಪಾಟ್ಲಾವ್ದಾರ್'
ಚಲ್ಲೆ ದೀಸ್ ಬರೆ ಸುರ್ವೆರ್, ತಿ ಹುನ್ ಮೊಗಾಚಿ ಪ್ರಾಯ್
ಫಾಲೆಂ ಜಾತಾನಾ, ಉತ್ರಾಂ ಉತ್ರಾಂನಿ ಸುರು ಜಾಲಿ ಕರಂದಾಯ್
ಚಿಡಾಯ್ತಾ ಹರ್ಯೆಕ್ ದೀಸ್, 'ತೊ ಮ್ಹಜೆ ಖಾತೀರ್ ಸಕ್ಕಡ್ ಕರ್‍ತಲೊ'
ಹಾಕಾ ಕಿತೆಂ ಕಳಿತ್? ಭಿತರ್‍ಲ್ಯಾ ಭಿತರ್ ಕಿತ್ಲೆಂ ರಡ್ತಾಲೊಂ..?
ಸಮ್ಜಯ್ಲ್ಯಾರ್ ಸಾಂಗ್ತಾ, ಪ್ರಾಯ್ ತುಜಿ ನ್ಹಯ್ ಖೆಂಡುಂಕ್ ಮ್ಹಜಿ ಜಾಣ್ವಾಯ್
ಪಡ್ಲಾಂ ದುಖಾಂ ಸಂಸಾರಾಂತ್ ಸೊಸುಂಕ್ ಜಾಯ್ನಾ ಹಿ ವಿರಾರಾಯ್
ಮೊಗಾನ್ ಸಾಂಗ್ತಾಂ ತರೀ ಧಮ್ಕಯ್ತಾ 'ಧಾಂಪ್ ತುಜೆಂ ತೋಂಡ್,
ನಾ ತರ್ ಮುಗ್ದಿತಾಂ ಮ್ಹಜೆಸಂಗಿಂ ತುಜ್ಯಾ ಜೀವನಾಚೆಂ ಬೋಂಡ್'
ಸೊಧ್ನೆರ್ ಆತಾಂ ಕಾಮಾಚ್ಯಾ, ಖರ್ಚಾ ವಾಟೆಕ್ ಪುಣೀ ಮೆಳ್ತಲೊ ಸಾಂಬಾಳ್
ಆಯ್ಕತಾಂ 'ಜಾಂವ್ಚೆಂ ನಾ ತುಜ್ಯಾನ್, ತಕ್ಲಿ ತುಜಿ ಪೊಕೊಳ್'
ಖರ್ಚುಂವ್ಚ್ಯಾಕ್ ಆಸ್‌ಲ್ಲೆ ಈಶ್ಟ್ ಸರ್ವ್ ಆತಾಂ ಜಾಲ್ಯಾತ್ ರಿಣ್ಕಾರಿ
ಭಿಯೆತಾಂ.! ವಸೂಲೆರ್ ಖಂಯ್ ದಿತಿತ್ ಮ್ಹಜೆ ವಯ್ರ್ ಸುಪಾರಿ?
ಕೆಲ್ಲೊ ಹಾಂವೆಂ ಫುಡಾರಾಚೆರ್ ರಾಗ್, ಜೊಡ್ಚ್ಯಾಕ್ ಜಿಣ್ಯೆಂತ್ ಮೋಗ್
ಆತಾಂ ಪಾಟಿಂ, ಜಿಣ್ಯೆ ಖಾತಿರ್ ಕರ್‍ಚ್ಯಾರ್ ಆಸಾಂ ತ್ಯಾ ಮೊಗಾಚೊ ತ್ಯಾಗ್
'ತುಂವೆ ಆಸಜಾಯ್ ಆಸ್‌ಲ್ಲೆಂ', ಉಗ್ಡಾಸ್ ಕಾಡ್ತಾಂ ಸದಾಂ ತಾಚೊ
'ಕಿತ್ಯಾಕ್ ಸಾಯ್ಬಾ ಇತ್ಲೆ ವೆಗಿಂ ಮೊರೊನ್ ಕೆಲೊಯ್ ಗೋಳ್ ಮ್ಹಜೊ'
-ರೊನಿ, ಬೆಳ್ತಂಗಡಿ