ಕವಿತಾ:
ಸೂಪರ್ಮೂನ್
ಘರಾ ಘರಾಂನಿ ಮಾಗ್ಣೆಂ ರಜಾರ್
ಕೊಣಾಗೆರ್ ಜಳ್ತಾತ್ ವಾತಿ
ಬಿಜಾಪುರ್‍ಚೊ ಲೋಕ್ ಧಾಂವ್ಲಾ ಬಸ್ಸಾರ್
ಥೊಡ್ಯಾಂಚ್ಯೊ ಝರ್‍ಲ್ಯಾತ್ ಕಾತಿ
ಗಲ್ಫಾಥಾವ್ನ್ ಧುವೆಚೆಂ ಫೊನ್
ಕಿತೆಂ ಕರ್‍ತಾತ್ ಮಾಮ್ಮಿ?
ಸೂಪರ್ಮೂನ್ ಯೆತಾಗೊ ಪುತಾ
ಕೆನ್ನಾಂ ಮೆಳ್ಚೆಂ ಆಮಿ?
ಸುಡ್ತುಗೊಲಾಂತಿ ಬುಡ್ತುಗೊಲ್
ಉಡ್ಪಿ-ಮಂಗ್ಳುರಾಂತಿ ಸುನಾಮಿ
ಬಿದ್ರ್ಯಾಂ-ಬಂಟ್ವೊಳಾಂತಿ ಭುಂಯ್ಕಾಪ್
ಆಮೆನ್ ಜಾತಲ್ಯಾಂವ್ ಆಮಿ
ಜಿಲ್ಲಿಬಾಯ್ ಮಾಳ್ಯಾರ್ ಚಡ್ಲಿ
ದುಕ್ರಾಮಾಸಾಚೆಂ ತೊಪ್ಲೆಂ ಘೆವುನ್
ಲಿಲ್ಲಿಬಾಯ್ ವೊಮ್ತಿಚ್ ಪಡ್ಲಿ
ಇಡ್ಲ್ಯೊ, ಆಪಾಂ ಭೊಕಾವ್ನ್
ವಾಡ್ಯಾ ವಾಡ್ಯಾಂನಿ ಮಾಗ್ಣ್ಯಾ ಜಮಾತಿ
ಖಾಂವ್ಕ್ ಪಿಯೆಂವ್ಕ್ ನಾಕಾ
ಭುರ್ಗ್ಯಾಂ ಬಾಳಾಂಕ್ ರಾಕ್ ಶಾರೊತಿ
ವಾತಿ ಪೆಟಯ್ತಾಂವ್ ತುಕಾ
ಘರಾಂತ್ ಆಮ್ಚ್ಯಾ ಪಿಡಾ ಚುಕಲ್ಲಿ ನಾ
ದುಕಾಂ ಗಳಯ್ತಾ ಎಸ್ತು
ತುಮ್ಚ್ಯಾ ಘರ್‍ಚೆಂ ವಾಸ್ತು ಸಾರ್ಕೆಂ ನಾ
ಮಿಶಿಯೊ ವೊಳಾಯ್ತಾ ಬೊಸ್ತು
ಮಿರ್ನಿಚೊ ತಾಳೊ ಭಾಯ್ರಚ್ ಯೇನಾ
ಉಜೊ ಫುಂಕಿನಾ ಬೊಟ್ಲೆರಾಮ್
ಕಿತೆಂ ಕರ್‍ಚೆಂ ಮತಿಕ್ ವಚನಾ
ಸಿಮಿಸ್ತ್ರಿಂತ್ ತಿಳ್ತಾ ಚಾಮಾದೊರಾಮ್
ಘರ್‍ಚ್ಯಾ ಪಾಕ್ಯಾರ್, ಬಿಲ್ಡಿಂಗಾಚೆ ತಕ್ಲೆರ್
ಲೋಕ್ ಚಡೊನ್ ಬಸ್ತಾ
ಇಗರ್ಜೆ ಪಾಕ್ಯಾರ್, ಘಾಂಟಿಚೆ ತೊರಿರ್
ಚಡೊಂಕ್ ಬಾಕಿ ದಿಸ್ತಾ
ಬೊತ್ಲಿಂ ಸಂಗಿಂ ಗ್ಲಾಸ್ ವ್ಹರಾ
ಚಾಕ್ಣೆಂ ದುಜಾಮ್ ಹಾಡ್ತಾ
ಚಿಯರ್ಸ್ ಮ್ಹಣೊನ್ ಗ್ಲಾಸ್ ಭರಾ
ಪಿಯೆವ್ನ್ ಪ್ರಾಣ್ ಸೊಡ್ತಾಂ
ಸೂಪರ್‌ಮ್ಯಾನ್ ಜಾಣಾಂವ್ ಆಮಿ
ಸೂಪರ್ಮೂನ್ ಕೋಣ್?
ಲೊಕಾ ಜಿಬೆರ್ ಹೆಂಚ್ ಸವಾಲ್
ಕಸ್ಲೆಂ ಸಾಯ್ಬಾ ನವಾಲ್?
ವಾಂಜೆಲ್ ರಜಾರ್ ಕರಾ ಫಾದರ್
ಯೆಂವ್ಚ್ಯಾ ಆದಿಂ ಸುನಾಮಿ
ಇಗರ್ಜೆ ಬಾಂದ್ಪಾಕ್ ದಿವ್ಯಾಂ ಮಾಗಿರ್
ವಾಂಚೊನ್ ಉರ್‍ಲ್ಯಾರ್ ಆಮಿ
-ಸಿಜ್ಯೆಸ್ ತಾಕೊಡೆ