ಸಂಪಾದಕೀಯ್:
ವೆವೆಗ್ಳ್ಯಾ ರೂಪಕಾಂನಿ ಕವಿಚ್ಯಾ ದುಕಾಂಕ್ ಜೀವ್ ದಿಲಾ
ವಿನ್ಸಿ ಪಿಂಟೊ ಆಪ್ಲ್ಯಾ ಕವಿತಾಂನಿ ಸವ್ಕಾಸ್ ತರೀ ಬಳ್ವಂತ್ ಪಾವ್ಲಾಂ ಕಾಡುನ್ ಆಸಾ. ತಾಕಾ ಹಿ ಕವಿತಾ ಸಾಕ್ಸ್. ಹರ್ಶೆಂ ಇಲ್ಲೊ ಉಚಾಂಬಳಿ, ಹುಳ್ವುಳೊ ದಿಸ್ತಾಲೊ ತೊ ಆಪ್ಲ್ಯಾ ಕವಿತಾಂನಿ. ಹಾಂಗಾಸರ್ ಎಕ್ದಮ್ ಸಾದೊ, ಸಂವೇದನ್‌ಶೀಳ್ ದಿಸ್ತಾ.
ಆಪುಣ್ ಸ್ವತಾ ಕವಿತಾ ಬರೊಂವ್ಕ್ ಕಷ್ಟೊನ್ ಆಸ್ತಾನಾ, ತಾಕಾ ಭುಜಾವಣ್ ದೀಂವ್ಕ್ ‘ತೆಂ’ ಯೆತಾ. ತೆಂ ಆಯಿಲ್ಲ್ಯಾನಚ್ ಹಿ ಕವಿತಾ ಜಲ್ಮತಾ. ಹಿಂ ದುಕಾಂ ಶಾಸ್ವಿತ್ ನ್ಹಯ್ ತೆಂ ತಾಕಾ ಕಳಿತ್ ಆಸಾ. ಹಾಂಗಾಚಿಂ ದುಕಾಂ ಸಾಂಗ್ಚೆ ಖಾತೀರ್ ತಾಣೆ ವೆವೆಗ್ಳಿಂ ರೂಪಕಾಂ ವಾಪರ್ಲ್ಯಾಂತ್. ತಿಂ ಸೊಭಿತ್ ದಿಸ್ತಾತ್. ಅರ್ಥಾಭರಿತ್ ಆಸಾತ್. ಕಾರಾಚೆಂ ರೂಪಕ್ ಕೊಣಾಯ್ಕಿ ರುಚ್ಚೆ ತಸಲೆಂ.
- ಮೆಲ್ವಿನ್ ರೊಡ್ರಿಗಸ್
ಕವಿತಾ:
ದುಕಾಂ ಝರಿ
ಥೆಂಬೆ.. ಥೆಂಬೆ.. ಥೆಂಬೆ..
ಉದ್ಕಾಂ ಮೊತಿಯಾಂಚೆ
ಥೆಂಬೆ.. ಥೆಂಬೆ... ಥೆಂಬೆ..
ದೂಕ್ ಕವಿಚೆಂ
ಝಾಡಾ-ಪಾನಾಂ ಮಧೆಂ ನಾಚ್ತಾತ್
ಏಕ್ ಫುಲೊನ್ ಗರ್ಭೆಸ್ತ್ ಜಾತಾನಾ
ಆನ್ಯೇಕ್ ಜಲ್ಮತಾ
ಪಾನಾಂ ಬೊಂಚಿಂತ್ಲ್ಯಾನ್ ಧರ್ತೆಕ್
ಹಳೂ ಹಳೂ ಗಳ್ತಾ
ನಳ್ಯಾ ಪಾಕ್ಯಾರ್ ವ್ಹಾಳೊ ಉದ್ಕಾಚೊ
ಏಕ್, ದೋನ್, ತೀನ್, ಚಾರ್
ಅಶೆಂಚ್ ರಂಗೀನ್ ಸಂಗೀತ್
ಪಾವ್ಳ್ಯಾಂನಿ ಗಾಯ್ಲೆಂ ಗೀತ್
ಕಾರಾಚ್ಯಾ ಆರ್ಶ್ಯಾಂತ್ ಥೆಂಬ್ಯಾಚ್ಯೊ ಧಾರಿ
ತಾಂತ್ಯಾಂಕ್ ವೆಂಗ್ಚ್ಯಾ ವೀರ್ಯಾ ಸರಿ
ಏಕ್ ದುಸ್ರ್ಯಾಕ್-ದುಸ್ರೊ ತಿಸ್ರ್ಯಾಕ್ ತೀರ್
ಮೆಳೊನ್ ಏಕ್ ಬಾರೀಕ್ ಯೇರ್
ಎಕಾಚ್ ಖಿಣಾನ್ ಪುಸುನ್ ಕಾಡ್ತಾ ವಾಯ್ಪರ್
ಥೆಂಬೊ... ಥೆಂಬೊ... ಥೆಂಬೊ...
ದೊಳ್ಯಾಂತ್ ದುಕಾಂ ಬೊಬೊ
ದೀಸ್ ಮ್ಹಣ್ ನಾ, ನಾ ರಾತ್
ದೊಳ್ಯಾ ಖಾಂಚಿಂತ್ ಮಿಟಾ ಜಮೊ
ಟಪ್...ಟಪ್.. ಚರೊನ್ ಪೊಲೊ
ಗಳೊನ್ ಹರ್ಧ್ಯಾರ್ ದಿಲೊ ಉಮೊ
ರಾತ್ ದೀಸ್, ಸಕಾಳ್ ಆನಿ ಸಾಂಜ್
ಅಶೆಂ ಉಬ್ಲೆ ಕಿತ್ಲೆ ದೀಸ್
ಜಿಣಿ ಜಾಲಿ ಮ್ಹಜಿ ವಾಂಜ್
ಕವಿತೆಂನಿ ಮ್ಹಜ್ಯಾ ಜೀವ್ ನಾತ್ಲೊ
ಜೆನ್ನಾಂ ಹಾಂವ್ ಎಕ್ಸುರೊ ಆಸ್ತಾನಾ
ತುಂ ಆಯ್ಲೆಂಯ್ ಜಶೆಂ... ಥೆಂಭೆ, ಥೆಂಬೆ
ಪುಸುನ್ ಕಾಡ್ಲೆಂಯ್ ಕಾಳ್ಜಾ ಭ್ಯೆಂ.
-ವಿನ್ಸಿ ಪಿಂಟೊ, ಆಂಜೆಲೊರ್