ಸಂಪಾದಕೀಯ್:

ಕೆಂಜಾರ್ಚಿ ಮಾತಿ ಆಮ್ಕಾಂ ಕಿತೆಂ ಶಿಕಯ್ತಾ?

ಏಕ್ ವರಸ್ ಕಾಬಾರ್ ಜಾಲೆಂ ಕೆಂಜಾರ್ಚ್ಯಾ ನಿಸ್ಕಳ್ ಗಾಂವಾಚೆರ್ ಶಿರಾಪ್ ಪಡೊನ್. ಹೊ ಪುಸುನ್ ಕಾಡುಂಕ್ ಜಾಯ್ನಾತಲ್ಲೊ ಶಿರಾಪ್ ಕೊಣೇಂಯ್ ಘಾಲ್ಲೊ ನ್ಹಯ್, ಮಾಗೊನ್ ಘೆತಲ್ಲೋಯ್ ನ್ಹಯ್. ಕೆಂಜಾರ್‍ಚ್ಯಾ ಮಸ್ತಕಾಚೆರ್ ಆಪಾಪಿಂಚ್ ಎಕೆ ದುಲಬಿ ಸಕಾಳಿಂ ಯೇವ್ನ್ ಭೆಜಲ್ಲೊ. ತೆಂ ಚಿಂತಾನಾ ಆಜೂನ್ ಆಂಗ್ ಕಾಂಪ್ತಾ. ತೆ ವಾಟೆನ್, ಬಜ್ಪ್ಯಾಂ ವಿಮಾನ್ ಬಂದ್ರಾಕ್ ಪಾಶಾರ್ ಜಾತಾನಾ, ಆಜೂನ್ ದೀಷ್ಟ್ ತೆ ಸುವಾತೆತೆವ್ಶಿಂ ಘುಂವ್ತಾ ಆನಿ ಮ್ಹಾಕಾ ಹಾಕ್-ಬೋಬೊ ಮಾರ್‍ಚ್ಯೊ ಕುಡಿ ದಿಸ್ತಾತ್.

ತ್ಯಾ ಎಕಾ ಅವ್ಘಡಾ ವೆಳಾರ್ ಹರ್‍ಯೆಕೆ ಜಾತಿಕಾತಿಚೊ ಲೋಕ್, ಹಗೆಂ, ಮೊಸೊರ್, ದ್ವೇಶ್, ಹಂಕಾರ್ ಸಗ್ಳೆಂ ವಿಸ್ರೊನ್ ಸಾಂಗಾತಾ ಆಯಿಲ್ಲೆಂ ಆಮಿ ಪಳೆಲಾಂ. ಕಾಂಯ್ ಥೊಡಿಂ ವಾಯ್ಟಾಂ ಘಡ್ಲ್ಯಾಂತ್ ಆಸ್ಯೆತ್, ಪುಣ್ ಹ್ಯಾ ಬರೆಪಣಾಚ್ಯಾ ಮೊಲಾಂ ಮುಕಾರ್ ತಾಂಚಿ ಸಕತ್ ಕಾಂಯ್ ನ್ಹಯ್. ಪುಣ್ ಅಸಲಿಂ ಮೊಲಾಂ ಚಡಿತ್ ಕಾಳ್ ಉರ್ಲಿಂ ನಾಂತ್ ಮ್ಹಳ್ಳಿ ಕಾಂತವ್ಣಿ ಆಜೂನ್ ಧೊಸ್ತಾ. ಕಾಂಯ್ ಅವ್ಘಡಾಂ ಮಾತ್ರ್ ನಿದಲ್ಲೆಂ ಮನ್ಶಾಪಣ್ ಜಾಗೊಂವ್ಕ್ ಸಕ್ತಾತ್?

ಸಿಜ್ಯೆಸ್ ತಾಕೊಡೆ ಕೆನ್ನಾಂಯ್ ವ್ಯಂಗ್ಯ್, ಹಾಸ್ಯ್ ಬರಯ್ತಾ. ಹೆ ಕವಿತೆಂತ್ ಬೋವ್ ಆಪುರ್ಬಾಯೆನ್ ಏಕ್ ವಿಚಾರ್ ತಾಣೆ ಮಾಂಡ್ಲಾ. ತಾಚ್ಯಾ ವಿಚಾರಾಕ್ ತುಮಿ ಕಿತೆಂ ಮ್ಹಣ್ತಾತ್?

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಕೆಂಜಾರ್ಚೆ ಮಾತಿಯೆಂತ್

ಕೆ೦ಜಾರ್ಚಿ ಮಾತಿ ರಗ್ತಾ೦ತ್ ಭಿಜೊನ್
ವೊಲಿ  ಜಾಲ್ಯಾ ಕಶಿ?
ಜಳ್ಚ್ಯಾ ಆಗ್ಟ್ಯಾಂತ್ ಕುಡಿ ಲಾಸುನ್
ಸೊರ್ಮುಣ್  ಪಡ್ಲಾ  ರಾಶಿ

ಕೊಣ್ ಹಿ೦ದು ಕೊಣ್ ಮುಸ್ಲಿಮ್
ಕೊಣ್ ಬಾವ್ಡೊ ಕಿರಿಸ್ತಾ೦ವ್?
ಉಜ್ಯಾ ಜಿಬಾ೦ನಿ ಗ್ರಾಸುನ್ ಸೊಡ್ಲೆ೦
ದೆವಾ ಪಾಸುನ್  ಸೊಸ್ತಾ೦ವ್?

ಜರಿ ದೇವ್ ಆಸಾ ತರ್
ಅಶೆ೦ ಕಶೆ೦ ಘಡ್ಲೆ೦?
ಖಿಣಾ ಭಿತರ್ ದೆ೦ವ್ಚೆ೦ ವಿಮಾನ್
ಖ೦ದ್ಕಾ೦ತ್ ಕಶೆ೦ ಪಡ್ಲೆ೦?

ಕೊಣಾ ಘೊವಾಕ್ ಬಾಯ್ಲ್ ನಾ
ಕೊಣಾ ಬಾಯ್ಲೆಕ್ ನಾ ಪತಿ
ಕೊಣಾ ಆವಯ್ಕ್ ಪೂತ್ ನಾ
ನಿರಾಧಾರಿ ಕುಟ್ಮಾಕ್ ಕೊಣ್ ಗತಿ?

ಚಾರ್ ದಿಸಾ೦ಚ್ಯಾ ಸ೦ಸಾರಾ೦ತ್
ಹಜಾರ್ ಜಾತಿ ಕಾತಿ
ಖಿಣಾನ್ ಯೆ೦ವ್ಚ್ಯಾ ಆಕಾ೦ತಾ೦ತ್
ಮನಿಸ್ ಧುಳ್ ಮಾತಿ!

-ಸಿಜ್ಯೆಸ್ ತಾಕೊಡೆ