ಸಂಪಾದಕೀಯ್:
ಇಂಗ್ಲಿಷ್ ಆನಿ ಕೊಂಕಣಿ ಮದ್ಲ್ಯಾ ಸಂಘರ್ಶಾಂತ್ ಪರ್ತ್ಯಾನ್ ಜೀವ್ ಆಪ್ಣಾಯಿಲ್ಲಿ ಕವಿತಾ
ಮ್ಹಾಕಾ ದಿಸ್ತಾ ಮನೋಹರ್ ಬಾಬಾನ್ ಹಿ ಕವಿತಾ ವೆಗ್ಳ್ಯಾ ಎಕಾ ಸಂದರ್ಭಾರ್ - ಕೊಂಕಣಿ ಸಂವಿಧಾನಾಚೆ ಆಟ್ವೆ ವಳೆರಿಂತ್ ಯೆಂವ್ಚ್ಯಾ ವಗ್ತಾ ಯಾ ಸಾಹಿತ್ಯ ಅಕಾಡೆಮಿನ್ ತಿ ಏಕ್ ಸ್ವತಂತ್ರ್ ಭಾಸ್ ಮ್ಹಣೊನ್ ಮಾಂದುನ್ ಘೆತಲ್ಲ್ಯಾ ವೆಳಾರ್ ಯಾ ಗೊಂಯ್ ರಾಜ್ಯಾಚಿ ರಾಜ್‌ಭಾಸ್ ಜಾಲ್ಲ್ಯಾ ವಗ್ತಾ - ಬರಯಿಲ್ಲಿ ಜಾಯ್ಜಾಯ್. ತಸಲೊಚ್ ಸಂಘರ್ಷ್ ಆತಾಂ ಪರ್ತ್ಯಾನ್ ಗೊಂಯಾಂತ್ ಚಲ್ತೇ ಆಸಾ. ಇಸ್ಕೊಲಾಂನಿ ಶಿಕಪ್ ಶಿಕೊಂವ್ಚೆಂ ಮಾಧ್ಯಮ್ ಇಂಗ್ಲಿಷ್ ಜಾಯ್ಜಾಯ್ ಮ್ಹಳ್ಳೊ ಏಕ್ ಪಂಗಡ್ ಜಾಲ್ಯಾರ್ ಕೊಂಕಣಿ ಯಾ ಮರಾಠಿ ಜಾಯ್ ಮ್ಹಣ್ಚೊ ಆನ್ಯೇಕ್ ಪಂಗಡ್.
ಹೆ ದಿಶೆನ್ ಹಿ ಕವಿತಾ ಪರ್ಗಟ್ ಕರ್‍ಚ್ಯಾ ವಗ್ತಾ ಕೊಂಕಣಿ ಜಾಯ್ ಮ್ಹಣ್ತಲ್ಯಾಂನಿ ಸಗ್ಳೆಂ ‘ಗೊಂಯ್ ಬಂಧ್’ ಕರಿಜಾಯ್ ಮ್ಹಳ್ಳೊ ಉಲೊ ದಿಲಾ - 2011 ಜ್ಯೂನ್ 6 ತಾರಿಕೆರ್.
ಮ್ಹಾಕಾ ದಿಸ್ತಾ ಆಯ್ಚ್ಯಾ ದಿಸಾಯ್ ಹೆ ಕವಿತೆಚೊ ಸ್ಪಿರಿತ್ ಆದ್ಲ್ಯಾಬರೀಚ್ ಜಿವೊ ಆಸಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ನವೆಂ ಗೊಂಯ್
ಆಯ್ಜ್ ಹಾಂಗಾ ನವ್ಯಾ ಗೊಂಯಾಂತ್
ಯುಗ್ ನವೆಂ ಘಡ್ಟಾ
ಗೊಬ್ರಾಂತ್ಲಿ ಕೀಟ್ ಜಾಗುನ್
ಇಂಗ್ಳೊ ಜಾವ್ನ್ ಪೆಟ್ಟಾ
ಚಿಡ್ಡಲ್ಲಿ ಆಮ್ಚಿ ಭಾಸ್
ಜಿವಿತಾಚೊ ಪಿವುನ್ ಪಾವ್ಸ್
ಪರ್‍ನೆ ಫಾಂತರ್‌ಪಟೆ ಫೊಡುನ್
ಲಸ್‍ಲಸೂನ್ ಹಾಂಸ್ತಾ
ಜೆ ಫುಡಾರ್ ಪಾರ್ಕಿನಾಂತ್
ಜೆ ಘರಾಕ್ ವೊಳ್ಕನಾಂತ್
ತಾಂಚೆ ಖಾತೀರ್ ಕಾಳೀಜ್ ಮ್ಹಜೆಂ
ಕಳ್ವವಳೂನ್ ರಡ್ಟಾ
ದೊಳೆ ಆಸೂನ್ ಕುಡ್ಡೆ ತುಮಿ
ಕಾನ್ ಆಸೂನ್ ಭಡ್ಡೆ ತುಮಿ
ಫಾಂತೊಡ್ ಫುಟುನ್, ಘೊಂಟೆರ್ ಜಾಗುನ್
ಜೀಣ್ ನವಿ ಉಡ್ಟಾ
-ಮನೋಹರ್ ರಾಯ್ ಸರ್ದೇಸಾಯಿ