ಸಂಪಾದಕೀಯ್:
ತ್ಸುನಾಮಿಚ್ಯಾ ಲೊಟಾಕ್ ಆಮ್ಚೆ ಕವಿ ಸಾಂಪಡ್ತಾತ್
ಪಾಟ್ಲ್ಯಾ ಎಕಾ ಶೆಕ್ಡ್ಯಾಂತ್ ಮನ್ಶಾಕುಳಾನ್ ಜೊಡ್‌ಲ್ಲಿ ಪ್ರಗತಿ ಮಾಪ್ಚೆಂ ಮಾಪ್ ಮೆಳ್ಚೆಂನಾ. ಇತ್ಲೆಂ ಆಸೊನ್‌ಯ್ ಭುಂಯ್ ಮಾತೆಚ್ಯಾ ರಾಗಾ ಮುಕಾರ್ ಆಮಿ ಮನೀಸ್ ಘಡ್ಯೆನ್ ಕೊಟಾರ್‍ಲೆಬರಿ ಮುದೊ ಜಾತಾಂವ್; ಲಜೆಕಾಂಟಿಯೆಬರಿ ದೊಡೊನ್ ವೆತಾಂವ್. ಆಮಿ ಹರ್ಧೆಂ ಬಡವ್ನ್ ಸಾಂಗ್ಚೆ ಪ್ರಗತೆಚೆರ್ ಸವಾಲ್ ಉಟಂವ್ಚಿಂ ಲಕ್ಷಣಾಂ ಹಿಂ!
ತ್ಸುನಾಮಿವಿಶಿಂ ತಿಸ್ರಿ ಕವಿತಾ ಹ್ಯಾ ಅಂಕಣಾಂತ್ ಆಮಿ ಫಾಯ್ಸ್ ಕರುನ್ ಆಸಾಂವ್. ತ್ಸುನಾಮಿನ್ ಥರ್ಥರಾಯಿಲ್ಲ್ಯಾ ಲೊಕಾಮಧೆಂ ಜಾಯ್ತೆ ಕವೀಯ್ ಆಸಾತ್ ಮ್ಹಳ್ಳ್ಯಾಕ್ ಹಿ ಏಕ್ ಸಾಕ್ಸ್. ಥರ್ಥರೆ, ಕವಿತಾದ್ವಾರಿಂ ಉಚಾರುಂಕ್ ಆಮ್ಚ್ಯಾ ಕವಿಂನಿ ಘೆತ್‌ಲ್ಲೆಂ ಧೈರ್ ಶಾಭಾಸ್ಕೆಚೆಂ!
ರೊನಾಲ್ಡ್ ಸುವಾರಿಸ್ ಆಮಿ ದಿಂವ್ಚಿ ಹುಮೆದ್ ಆಪ್ಣಾವ್ನ್ ಕವಿಂಚೆ ಮೆಳಿಂತ್ ರಿಗೊಂಕ್ ಪ್ರೇತನ್ ಕೆಲ್ಲೊ ಮನೀಸ್. ತಾಚೆಂ ಪ್ರೇತನ್ ಕವಿತಾ ಕುಳಾರಾಚ್ಯಾ ಹೆರ್ ಮೋಗಿಂಕ್ ಏಕ್ ಪ್ರೇರಣ್ ಜಾಂವ್ದಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತ್ಸುನಾಮಿ
ಹೇಯ್ ತುಂ ತ್ಸುನಾಮಿ
ಜಾವ್ನ್ ಆಸ್‌ಲ್ಲೆಂಯ್ ಬೇನಾಮಿ
ಪಾಟ್ಲ್ಯಾ ಸಬಾರ್ ಶೆಕ್ಡ್ಯಾಂನಿ
ಉದೆವ್ನ್ ಜೈತ್ ಲ್ಹಾರಾಂನಿ
ಕೆಲಿಯ್ ಲೊಕಾ ನಿರ್ನಾಮಿ
ಕರಾಳ್ ತುಜ್ಯಾ ಕೃತ್ಯಾಂನಿ
ಫಾರ್‍ಲೆಯ್ ಜೀವ್ ಲಾಕಾಂನಿ
ಕೆಲೆಂಯ್ ಅನಾಥ್ ಹಜ್ರಾಂನಿ
ಘಡಿಯೆಚ್ಯಾ ತುಜ್ಯಾ ಖೆಳಾಂನಿ
ಆಡ್ದೊಸ್ ಮಾಗ್ತಾಂ ದೀನ್‌ಪಣಿಂ
ಕೆನ್ನಾಂಯ್ ಯೇನಾಕಾ ಚುಕೊನ್ ಪುಣಿ
ದುರ್ಭಾಗಿ ಕರುಂಕ್ ಆಮ್ಚಿ ಜಿಣಿ
- ರೊನಾಲ್ಡ್ ಸುವಾರಿಸ್